ନୂଆଦିଲ୍ଲୀ: ଭାରତର ଚନ୍ଦ୍ରାବତରଣ ସଫଳ । ବିଜୟୀ ଭାରତର ସଫଳତାରେ ବିଭୋର ବିଶ୍ବ । ଚନ୍ଦ୍ରପୃଷ୍ଠରେ ଚତୁର୍ଥ ଦେଶ ଏବଂ ଦକ୍ଷିଣ ମେରୁରେ ପ୍ରଥମ ଦେଶ ଭାବେ ଚନ୍ଦ୍ରଯାନକୁ ଅବତରଣ କରିଛି ଭାରତ । ଏହାକୁ ନେଇ ଭାରତୀୟ ମହାକାଶ ଗବେଷଣା ପ୍ରତିଷ୍ଠାନ ସବୁଠି ଶୁଭେଚ୍ଛାର ସୁଅ ଛୁଟିଛି । ବିଦେଶୀ ଗଣମାଧ୍ୟମ ଏହି ଖବର ଶୀର୍ଷକରେ ରଖିବା ସହିତ ଇସ୍ରୋକୁ ଭୂରି ଭୂରି ପ୍ରଶଂସା କରିଛନ୍ତି ।  

ମୁନ୍‌ ମିଶନ୍‌ ଚନ୍ଦ୍ରଯାନ-୩ ବୁଧବାର  ସନ୍ଧ୍ୟା ୬ଟା ୪ ମିନିଟ୍‌ରେ ଚନ୍ଦ୍ରପୃଷ୍ଠରେ ସଫ୍ଟ  ଲ୍ୟାଣ୍ଡିଙ୍ଗ୍‌ କରିଛି । ଏଥିସହ ଭାରତ ବିଶ୍ୱର  ଏଭଳି ପ୍ରଥମ ରାଷ୍ଟ୍ର ବନିଯାଇଛି, ଯିଏ କି ଦକ୍ଷିଣ  ମେରୁରେ ନିଜ ଅନ୍ତରୀକ୍ଷ ଯାନକୁ ପହଞ୍ଚାଇଛି ।  ଏହି ମହାକାଶ ଅଭିଯାନ ଉପରେ ସାରା ବିଶ୍ୱର  ନଜର ଥିଲା । ଏହାକୁ ଜୁଲାଇ ୧୪ରୁ ଆନ୍ଧ୍ର  ପ୍ରଦେଶର ଶ୍ରୀହରିକୋଟା ସ୍ଥିତ ସତୀଶ ଧାୱନ ମହାକାଶ କେନ୍ଦ୍ରରୁ ପ୍ରକ୍ଷେପଣ କରାଯାଇଥିଲା ।  ଭାରତର ଏହି ସଫଳତା ପରେ ବିଶ୍ୱବ୍ୟାପୀ  ଗଣମାଧ୍ୟମ ସଂସ୍ଥାମାନେ ଦେଶକୁ ପ୍ରଶଂସା କରିଛନ୍ତି ।

Congratulations @isro on your successful Chandrayaan-3 lunar South Pole landing! And congratulations to #India on being the 4th country to successfully soft-land a spacecraft on the Moon. We’re glad to be your partner on this mission! https://t.co/UJArS7gsTv

— Bill Nelson (@SenBillNelson) August 23, 2023

ବିଶ୍ୱ ଗଣମାଧ୍ୟମ ସଂସ୍ଥାମାନେ ସେମାନଙ୍କ ୱେବ୍‌ସାଇଟ୍‌ରେ ଭାରତର ଚନ୍ଦ୍ର ଅଭିଯାନ  ସଫଳତାକୁ ପ୍ରମୁଖତାର ସହ ସ୍ଥାନିତ କରିଛନ୍ତି । ପାକିସ୍ତାନର ‘ଡନ୍‌’ ଲେଖିଛି ଭାରତର ଚନ୍ଦ୍ରଯାନ-୩  ଲ୍ୟାଣ୍ଡର ଚନ୍ଦ୍ରର ଦକ୍ଷିଣ ମେରୁକୁ ସଫଳତା ପୂର୍ବକ  ସ୍ପର୍ଶ କରିଛି,  ଯାହାକୁ ପାଣି ଏବଂ ଅମ୍ଳଜାନର  ସମ୍ଭାବ୍ୟ ସ୍ରୋତ ବିବେଚନା କରାଯାଉଛି ।  ସମ୍ବାଦପତ୍ର ଭାରତୀୟ ମହାକାଶ ଏଜେନ୍ସି ଇସ୍ରୋ  ନିଜ ମୁଖ୍ୟାଳୟରେ ଘୋଷଣା କରିଛି ଯେ ଶକ୍ତିର  ଅବତରଣ ଆରମ୍ଭ ହୋଇଯାଇଛି, ଯାହାର  ସ୍ୱାଗତ ଜୟକାର ଓ କରତାଳି ସହ ହୋଇଛି ।

ଅଲ୍‌ ଜଜିରା ଲେଖିଛି, ଭାରତ ଚନ୍ଦ୍ରର ଦକ୍ଷିଣ ମେରୁରେ ମହାକାଶ ଯାନ ଅବତରଣ  କରାଇଛି । ଏଭଳି କରି ଭାରତ ବିଶ୍ୱର ପ୍ରଥମ  ଦେଶ ବନିଯାଇଛି । ଏହା ସମଗ୍ର ମାନବାର ସଫଳତା  ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଥିବା ଏହା  ଉଲ୍ଲେଖ କରିଛି । ସେହିପରି ନ୍ୟୁୟର୍କ ଟାଇମ୍ସ ଏହି ଖବରକୁ ପ୍ରମୁଖ ସ୍ଥାନ ଦେଇଛି । ଏଥିରେ  ଲେଖାଯାଇଛି, ଚନ୍ଦ୍ରପୃଷ୍ଠରେ ଲ୍ୟାଣ୍ଡିଙ୍ଗ୍‌ ଦୌଡ଼³  ଭାରତ ଦକ୍ଷିଣ ଧ୍ରୁବୀୟ କ୍ଷେତ୍ରରେ ଓହ୍ଲାଇବାର ପ୍ରଥମ  ଦେଶ ବିବେଚିତ । ଭାରତର ବିକ୍ରମ ନାମକ ଲ୍ୟାଣ୍ଡର୍‌  ଏବଂ ପ୍ରଜ୍ଞା ନାମକ ରୋଭର୍‌ ବୁଧବାର ଚନ୍ଦ୍ରର ଦକ୍ଷିଣ ଧ୍ରୁବରେ ପହଞ୍ଚିଛି । ଚନ୍ଦ୍ରରେ ଅବତରଣ  କରିବାରେ ଭାରତ ଚତୁର୍ଥ ଦେଶ ହୋଇଛି ।

‘ଦ ଗାର୍ଡିଆନ୍‌’ ଲେଖିଛି, ଭାରତ ଏକ ଐତିହାସିକ କ୍ଷଣରେ ଚନ୍ଦ୍ରର ଦକ୍ଷିଣ ମେରୁ  ନିକଟରେ ମହାକାଶ ଯାନକୁ ପହଞ୍ଚାଇଛି ।  ଭାରତର ଏହି ଉପଲବ୍ଧିରେ ଦେଶବ୍ୟାପୀ  ଲୋକମାନେ ଖୁସିର ଉତ୍ସବ ପାଳନ କରୁଛନ୍ତି ।  ଭାରତ ସରକାର ଘରୋଇ ମହାକାଶ ପ୍ରକ୍ଷେପଣ  ଏବଂ ସମ୍ବନ୍ଧିତ ଉପଗ୍ରହ ଉପରେ ଆଧାରିତ  ବ୍ୟବସାୟରେ ନିବେଶ ଲାଗି ପ୍ରୋତ୍ସାହିତ କରିବା  ଉଚିତ ।

ବିବିସି ନିଜ ୱେବସାଇଟରେ ଏହି ଖବରକୁ ଶୀର୍ଷକରେ ରିଖି ଲେଖିଛି, ଚନ୍ଦ୍ରଯାନ-୩ ଇତିହାସ  ରଚିଛି । ଚନ୍ଦ୍ରର ଦକ୍ଷିଣ ମେରୁ ନିକଟରେ ଏହା  ଅବତରଣ କରିଛି । ୧୯୬୯ରେ ଯେତେବେଳେ  ଭାରତୀୟ ମହାକାଶ ଗବେଷଣା ପ୍ରତିଷ୍ଠାନ ସ୍ଥାପନ  ହୋଇଥିଲା, ଏହାର ପ୍ରାଥମିକ ଲକ୍ଷ୍ୟ ବେଶ୍‌ ସରଳ  ଥିଲା । ବାତ୍ୟାର ଭବିଷ୍ୟବାଣୀ କରିବା, ବନ୍ୟାକୁ  କମ୍‌ କରାଇବା ଏବଂ ଦେଶରେ ଦୂରସଞ୍ଚାରକୁ  ମଜଭୁତ କରିବା ପାଇଁ ଉପଗ୍ରହକୁ ଡିଜାଇନ୍‌ ଓ  ଲଞ୍ଚ୍‌ କରାଇବା ଲକ୍ଷ୍ୟ ଥିଲା । ଏବେ ମହାକାଶ  ଏଜେନ୍ସି ନିଜ ଚନ୍ଦ୍ରଯାନ-୩କୁ ଚନ୍ଦ୍ରର ଦକ୍ଷିଣ  ମେରୁରେ ପହଞ୍ଚାଇ ପ୍ରଥମ ଏଜେନ୍ସି ବନିଯାଇଛି ।

ଫ୍ରାନ୍ସର ପ୍ରମୁଖ ସମ୍ବାଦପତ୍ର ‘ଲେ ମୋଣ୍ଡେ’  ନିଜ ୱେବସାଇଟ୍‌ରେ ଶୀର୍ଷକରେ ଲେଖିଛି ଯେ  ଚନ୍ଦ୍ରର ଦକ୍ଷିଣ ମେରୁ ନିକଟରେ ମହାକାଶ ଯାନ  ଓହ୍ଲାଇବାରେ ପ୍ରଥମ ଦେଶ ବନିଯାଇଛି ଭାରତ । ଚନ୍ଦ୍ରପୃଷ୍ଠରେ ମହାକାଶ ଯାନ ପଠାଇଥିବା ଆମେରିକା,  ସୋଭିଏତ ସଂଘ ଏବଂ ଚୀନ୍‌ ସହ ଭାରତ ସାମିଲ  ହୋଇଯାଇଛି । ସିଏନ୍‌ଏନ୍‌ ନିଜ ଶୀର୍ଷକରେ  ଲେଖିଛି, ଯେ ଚନ୍ଦ୍ରରେ ମହାକାଶ ଯାନ ଅବତରଣ  କରାଇବାରେ ଭାରତ ଚତୁର୍ଥ ଦେଶ ହୋଇଛି ।