ଜଳେଶ୍ୱର ୧୫/୦୮: ବଢୁଛି ଜଳକା ନଦୀର ଜଳସ୍ତର । ନଦୀର ମଥାନୀ ଠାରେ ବିପଦ ସଂକେତ ୫,୫୦ ମିଟର ଥିବା ବେଳେ ସକାଳ ୬ଟା ସୁଦ୍ଧା ଜଳସ୍ତର ବୃଦ୍ଧି ପାଇ ୬,୫୫ ମିଟରରେ ପ୍ରବାହିତ ହେଉଛି । ଫଳରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ବନ୍ୟା ଜଳ ଚାଷ ଜମି ଉପରେ ଲହଡ଼ି ମାରୁଛି । ବନ୍ୟା ଫଳରେ ୧୩ଟି ପଞ୍ଚାୟତ ପ୍ରଭାବିତ ହୋଇଛି ।
୫ ହଜାର ହେକ୍ଟରରୁ ଅଧିକ ଚାଷ ଜମିରେ ମାଡ଼ିଯାଇଛି ବନ୍ୟା ପାଣି । ବସ୍ତା ବ୍ଲକର ଦୁଧହଂସା, ବାହାର୍ଦା, କୁଡିଆ, ବାସିତକୁରାଇ, ସଦାନନ୍ଦପୁର, ବରୁଣଗଡିଆ, ବ୍ରାହ୍ମୁଣଦା, ରାଉତପଡା, ଗଡପଦା, ଦରବା, ମୁକୁଳିସି ଓ ମଥାନୀ ପଞ୍ଚାୟତର ଏବଂ ସଦର ବ୍ଲକ ରଶଲପୁର, ଶ୍ରୀରାମପୁର ପଞ୍ଚାୟତ ପାଖାପାଖି ପ୍ରଭାବିତ ହୋଇଛି । ନଦୀର ଉପର ମୁଣ୍ଡରେ ଗତ ଦୁଇଦିନ ଧରି ବର୍ଷା ଯୋଗୁଁ ଜଳସ୍ତର ବୃଦ୍ଧି ପାଇବା ଆଶଂକା କରାଯାଉଛି ।
ଆଗକୁ ଲଘୁଚାପ ସୃଷ୍ଟି ହେବାକୁ ଥିବାରୁ ଚାଷଜମି କ୍ଷତିଗ୍ରସ୍ତ ହେବାର ଆଶଙ୍କା କରାଯାଉଛି । ଜଳସ୍ତର ବୃଦ୍ଧି ପାଉଥିବାରୁ ପ୍ରଶାସନ ମଧ୍ୟ ସଜାଗ ରହିଛନ୍ତି, ବନ୍ୟାକୁ ଦୃଷ୍ଟିରେ ରଖି ୧୩ ଟି ପଞ୍ଚାୟତ ଲୋକଙ୍କୁ ସତର୍କତା ରହିବାକୁ ଅନୁରୋଧ କରାଯାଇଛି । ତା ସହିତ ୬୧ଟି ସ୍କୁଲ ଖୋଲା ରଖାଯାଇ ଶୁଖିଲା ଖାଦ୍ୟ ମହଜୁଦ ରଖାଯାଇଛି । ଆବଶ୍ୟକ ପଡିଲେ ରନ୍ଧାଖାଦ୍ୟ ଦିଆଯିବାରୁ ବ୍ୟବସ୍ଥା କରାଯାଇଛି । ନଦୀ ବନ୍ଧ ଦୁର୍ବଳ ଥିବାରୁ ୨ହଜାର ବାଲିବସ୍ତା ମହଜୁଦ ରଖାଯାଇଥିବା ସୁଚନା ମିଳିଛି ।
