ଉତ୍ତରପ୍ରଦେଶ 12/03 :  ଉତ୍ତରପ୍ରଦେଶ କାନପୁରରେ ହୃଦୟବିଦାରକ ଘଟଣା । ଘରେ ଶୋଇଥିବା ବେଳେ ନିଆଁରେ ପୋଡି ହୋଇ ଗୋଟିଏ ପରିବାରର ୩ ପିଲାଙ୍କ ସମେତ ୫ ଜଣଙ୍କର ମୃତ୍ୟୁ । ବିଳମ୍ବିତ ରାତିରେ ଉତ୍ତରପ୍ରଦେଶ କାନପୁରର ଦେହାତ ଅଞ୍ଚଳରେ ଏଭଳି ଅଭାବନୀୟ ଘଟଣା ଘଟିଛି।

ଚାଳ ଛପର ଘରେ ଶୋଇଥିବା ବେଳେ ହଠାତ୍ ଘରେ ସର୍ଟ ସର୍କିଟ୍ ଯୋଗୁ ନିଆଁ ଲାଗିଯାଇଥିଲା। ହେଲେ ନିଦରେ ଥିବା କାରଣରୁ କେହି କିଛି ଜାଣିପାରି ନଥିଲେ। ନିଆଁ ପୂରା ଘରକୁ କବଜା କରିବା ପରେ ପରିବାର ଲୋକଙ୍କ ନିଦ ଭାଙ୍ଗିଥିଲେ ବି ତା ଭିତରୁ ଆଉ ବାହାରିବା ସମ୍ଭବ ହୋଇ ନଥିଲା। ଫଳରେ ସ୍ୱାମୀ-ସ୍ତ୍ରୀଙ୍କ ସମେତ ୩ ଜଣ ପିଲା ଜୀବନ୍ତ ଜଳି ଯାଇଥିଲେ ।  କୌଣସି ପ୍ରକାରେ  ଜଣେ ବୃଦ୍ଧା ଓ ନବଜାତକଙ୍କୁ  ଘରୁ ବାହାରକୁ  ଆଣାଯାଇଥିଲା। ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ଏବେ ତାଙ୍କ ଅବସ୍ଥା ଗୁରୁତର ରହିଛି।

 ଅଗ୍ନିକାଣ୍ଡ ସମୟରେ ଗାଁରେ ବାହାଘର ଭୋଜି ଚାଲିଥିଲା। ନିମନ୍ତ୍ରଣରେ ଆସିଥିବା ଲୋକମାନେ ଭୋଜି ଖାଇ ଯାଉଥିବା ବେଳେ ନିଆଁ ଲାଗିବାଥିବା ଦେଖିଥିଲେ । ଗାଁ ଲୋକ ଓ ସ୍ଥାନୀୟ ଲୋକମାନେ ମିଶି ନିଆଁକୁ ଆୟତ କରିଥିଲେ । ଅଗ୍ନିକାଣ୍ଡ ପରେ ଘଟଣାସ୍ଥଳରେ ଜିଲ୍ଲାପାଲଙ୍କ ସହ ବରିଷ୍ଠ ଅଧିକାରୀ ପହଞ୍ଚି ଘଟଣାର ତଦନ୍ତ ଜାରି ରଖିଛନ୍ତି।