ନୂଆଦିଲ୍ଲୀ: ଆର୍ଥିକ ସଂକଟରେ ଥିବା ଆମେରିକାର ସିଲିକନ ଭ୍ୟାଲି ବ୍ୟାଙ୍କକୁ ନେଇ ବଡ଼ ଖବର ସାମନାକୁ ଆସିଛି । ସିଲିକନ ଭ୍ୟାଲି ବ୍ୟାଙ୍କକୁ ଫାର୍ଷ୍ଟ ସିଟିଜନ୍ସ ବ୍ୟାଙ୍କ କିଣି ନେଇଛି । ବ୍ୟାଙ୍କକୁ ଆର୍ଥିକ ସଂକଟରୁ ବାହାର କରିବା ପାଇଁ ଫାର୍ଷ୍ଟ ସିଟିଜନ ବ୍ୟାଙ୍କ ଏହାକୁ ଫେଡେରାଲ ଡିପୋଜିଟ୍ ଇନସ୍ୟୁରାନ୍ସ କର୍ପୋରେସନଠାରୁ କିଣି ନେଇଛି ।

ସୋମବାର ଫେଡେରାଲ ଡିପୋଜିଟ୍ ଇନସ୍ୟୁରାନ୍ସ କର୍ପୋରେସନ ପକ୍ଷରୁ ଜାରି ଏକ ବୟାନରେ ଏହା କୁହାଯାଇଛି । ଏହାସହ ଫାର୍ଷ୍ଟ ସିଟିଜନ୍ସ ବ୍ୟାଙ୍କ ଏବଂ ଟ୍ରଷ୍ଟ, ସିଲିକନ ଭ୍ୟାଲି ବ୍ୟାଙ୍କର ସମସ୍ତ ଡିପୋଜିଟ୍ ଏବଂ ଲୋନକୁ କିଣିବା ପାଇଁ ରାଜି ହୋଇଛି ।

ଏଫଡିଆଇସି ନିଜ ବୟାନରେ କହିଛି ଯେ ମାର୍ଚ୍ଚ ୨୭ରେ ସିଲିକନ ଭ୍ୟାଲି ବ୍ରିଜ ବ୍ୟାଙ୍କ, ନ୍ୟାସନାଲ ଆସୋସିଏସନର ୧୭ ଶାଖା ଫାର୍ଷ୍ଟ ସିଟିଜନ୍ସ ନାଁରେ ଖୋଲିବ । ସିଲିକନ ଭ୍ୟାଲି ବ୍ୟାଙ୍କର ଗ୍ରାହକ ଏହି ବ୍ରାଞ୍ଚଗୁଡିକର ଉପଯୋଗ କରିପାରିବେ । ତେବେ ଏଥିପାଇଁ ଫାର୍ଷ୍ଟ ସିଜିଜନ୍ସରୁ ମିଳିଥିବା ନୋଟିସର ଆବଶ୍ୟକତା ପଡିବ । ଏହାସହ ବୟାନରେ ଏହା ମଧ୍ୟ କୁହାଯାଇଛି ଯେ ଏହାର ଅନ୍ୟ ବ୍ରାଞ୍ଚଗୁଡିକରେ ବ୍ୟାଙ୍କିଂ ସର୍ଭିସ୍ ଅନୁମତି ଦେବା ପାଇଁ ସିଷ୍ଟମରେ ପରିବର୍ତ୍ତନ ହୋଇସାରିଛି ।

ମାର୍ଚ୍ଚ ୧୦ର ଡାଟା ଅନୁସାରେ ସିଲିକନ ଭ୍ୟାଲି ବ୍ୟାଙ୍କର ମୋଟ ସମ୍ପତ୍ତି ୧୬୭ ବିଲିୟନ ଡଲାର ରହିଥିଲା । ଏହାର ମୋଟ ଡିପୋଜିଟ୍ ୧୧୯ ବିଲିୟନ ଡଲାର ରହିଥିଲା । ଏଥିରେ ୭୨ ବିଲିୟନ ଡଲାରର ସମ୍ପତ୍ତି କିଣା ସାମିଲ ରହିଛି, ଯାହା ଉପରେ ୧୬.୬ ବିଲିୟନ ଡଲାରର ରିହାତି ରହିଛି । ଏଫଡିଆଇସି ପାଖରେ ପ୍ରାୟ ୯୦ ବିଲିୟନ ଡାଲର ସିକ୍ୟୁରିଟିଜ୍ ଏବଂ ରିସିଭରଶିପ୍ ରହିଛି । ଫେଡେରାଲ ରିଜର୍ଭ ଡାଟା ଅନୁସାରେ ୨୦୨୨ର ଶେଷ ସୁଦ୍ଧା ସମ୍ପତ୍ତି ମାମଲାରେ ଫାର୍ଷ୍ଟ ସିଟିଜନ୍ସ ଆମେରିକାର ୩୦ତମ ସର୍ବବୃହତ ବ୍ୟାଙ୍କ ଅଟେ ।