ଆଠମଲ୍ଲିକ ୧୪।୩: ହୁତୁହୁତୁ ହୋଇ ଜଳୁଛି ଆଠମଲ୍ଲିକ ବନଖଣ୍ଡ ଧଣ୍ଡାତୋପା ଜଙ୍ଗଲ ଓ ପାହାଡ଼ । ଦୀର୍ଘ ସପ୍ତାହେ ହେଲାଣି ଧଣ୍ଡାତୋପା ରେଞ୍ଜର ତଳେଇପଥର, ପାଞ୍ଚଧାରା ପାହାଡ଼ରେ ବିଭିନ୍ନ ସ୍ଥାନରେ ନିଆଁ ଲାଗୁଛି । ନିଆଁର ଆଁରେ ଜଳି ଯାଉଛି ବହୁ ଦୁର୍ଲଭ ଓ ମୂଲ୍ୟବାନ ବୃକ୍ଷ । ଅନ୍ୟପଟେ ବନ ବିଭାଗ ନିଆଁ ଆୟତ୍ତ କରିବାରେ ବିଫଳ ହେଉଥିବା ଖବର ଆସୁଛି । ଧଣ୍ଡାତୋପା ରେଞ୍ଜର ପାହାଡ ପାଦ ଦେଶରେ ଥିବା ଜନବସତି ଆଡ଼କୁ ଜଙ୍ଗଲ ନିଆଁ ମାଡି ଆସୁଥିବା ଖବର ପାଇବା ପରେ ଅଗ୍ନିଶମ ବିଭାଗ ଗାଁ ଗାଁ ଯାଇ ନିଆଁ ଲିଭାଉଥିବା ଦେଖିବାକୁ ମିଳୁଛି ।

ଅନୁଗୋଳରୁ ଆଠମଲ୍ଲିକ ଯାଉଥିବା ସମୟରେ ଧଣ୍ଡାତୋପା ରେଞ୍ଜର ଫରେଷ୍ଟ ବିଟ୍ ହାଉସ୍ ପଛରେ ଏକ ଶାଳ ଜଙ୍ଗଲରେ ନିଆଁ ଲାଗିଥିବା ଦେଖିବାକୁ ମିଳିଥିଲା । ନିଆଁର ପ୍ରକୋପ ଅଧିକ ଥିବାରୁ ଭିତରକୁ ଯିବା ସମ୍ଭବ ହୋଇପାରିନଥିଲା ।  ପରେ ଆଠମଲ୍ଲିକ ଡିଏଫଓଙ୍କୁ ଜଣାଇବା ପରେ ସେ ଟିମ୍ ପଠାଇ ନିଆଁକୁ ଆୟତ୍ତ କରିଥିବା ଜଣାପଡିଛି ।