କଟକ ୧୨/୦୭: ଓଲିଉଡ୍ ଅଭିନେତ୍ରୀ ରିୟା ଦେ’ଙ୍କ ନାଁରେ ଭୁବନେଶ୍ୱରରେ ହୋଇଥିବା ଶିଶୁ ନିର୍ଯାତନା ମାମଲା କଟକ ବିଡ଼ାନାସୀ ଥାନାକୁ ସ୍ଥାନାନ୍ତର ହୋଇଛି । ବିଡ଼ାନାସୀ ଥାନାରେ ମାମଲା ରୁଜୁ ପରେ ଗୁରୁବାର ଅଭିଯୁକ୍ତ ରିୟା ଦେ’ଙ୍କୁ ପୁଲିସ ପଚରାଉଚରା କରିଛି । ଶୁକ୍ରବାର କଟକ ପୁଲିସ ଟିମ୍ ଭୁବନେଶ୍ୱର ଯାଇ ପୀଡ଼ିତାଙ୍କ ବୟାନ ରେକର୍ଡ କରିବ ବୋଲି ବିଡ଼ାନାସୀ ଥାନା ପକ୍ଷରୁ ସୂଚନା ଦିଆଯାଇଛି । ମିଳିଥିବା ସୂଚନା ଅନୁସାରେ, ନାବାଳିକାଙ୍କ ଘର ସାଲେପୁର ଅଞ୍ଚଳରେ ।
ସମ୍ପୃକ୍ତ ନାବାଳିକାଙ୍କୁ ତାଙ୍କର ଜଣେ ପରିଚିତ ମହିଳା କଟକ ବିଡ଼ାନାସୀ ବନ୍ଧତଳ ଅଞ୍ଚଳରେ ଅଭିନେତ୍ରୀ ରିୟାଙ୍କ ଘରେ ଘରୋଇ ସହାୟିକା ଭାବେ କାମ କରିବା ପାଇଁ ଛାଡ଼ିଥିଲେ । ପାରିଶ୍ରମିକ ବାବଦ ମାସକୁ ୮ ହଜାର ଟଙ୍କା ଦେବେ ବୋଲି ସ୍ଥିର ହୋଇଥିଲା । ନାବାଳିକା କାମ କରିବା ମଧ୍ୟରେ କେତେବେଳେ କୌଣସି ଭୁଲ୍ ହେଲେ ରିୟା ତାଙ୍କୁ ମାଡ଼ ମାରୁଥିଲେ । କେବଳ ରିୟା ନୁହଁନ୍ତି, ତାଙ୍କ ସ୍ୱାମୀ ମଧ୍ୟ ବିୟର ବୋତଲରେ ଆକ୍ରମଣ କରୁଥିବା ନାବାଳିକା ଚାଇଲ୍ଡ ଲାଇନ୍ ନିକଟରେ ଅଭିଯୋଗ କରିଥିଲେ ।
ନିର୍ଯାତନା ବଢ଼ିବାରୁ ଦୁଇ ଦିନ ତଳେ ନାବାଳିକା ଲୁଚି ପଳାଇ ଆସି ଭୁବନେଶ୍ୱରରେ ଥିବା ନିଜ ପରିଚିତ ଲୋକଙ୍କ ପାଖରେ ଘଟଣା ସଂପର୍କରେ ଜଣାଇଥିଲେ । ସବୁ ଘଟଣା ଜାଣିବା ପରେ ନାବାଳିକାଙ୍କ ପରିଚିତ ଲୋକ ଚାଇଲ୍ଡଲାଇନ୍କୁ ଖବର ଦେଇଥିଲେ । ଚାଇଲ୍ଡଲାଇନ୍ ଟିମ୍ ଘଟଣା ସ୍ଥଳରେ ପହଞ୍ଚି ନାବାଳିକାକୁ ଉଦ୍ଧାର କରି ଚନ୍ଦ୍ରଶେଖରପୁର ଥାନାରେ ଏତଲା ଦେଇଥିଲେ । ପୁଲିସ୍ ଉକ୍ତ ମାମଲାକୁ ଜିରୋ ଏଫ୍ଆଇଆର୍ ଭାବେ ରୁଜୁ କରି ବିଡ଼ାନାସୀ ଥାନାକୁ ସ୍ଥାନାନ୍ତର କରିଥିଲା ।
ଅଭିଯୋଗଟି ଥାନାକୁ ଆସିବା ପରେ ବିଡ଼ାନାସୀ ପୁଲିସ ମାମଲା ରୁଜୁ କରି ତୁରନ୍ତ ଆରମ୍ଭ କରିଛି । ବିଏନ୍ଏସ୍ର ଦଫା ୧୧୫(୨), ୧୩୬(୨) ଓ ବାଳ ଶ୍ରମିକ ନିରୋଧ ଓ ନିୟନ୍ତ୍ରଣ ଆଇନର ଧାରା ୧୪ରେ ମାମଲା ରୁଜୁ ହୋଇଛି । ଗୁରୁବାର ସକାଳେ ଥାନା ଅଧିକାରୀ ଯୁବରାଜ ସ୍ୱାଇଁ ଅଭିନେତ୍ରୀ ରିୟା ଦେ’ଙ୍କ ଫ୍ଲାଟ୍କୁ ଯାଇ ପଚରାଉଚରା କରିଛନ୍ତି । ଏହି ସମୟରେ ରିୟାଙ୍କ ସହିତ ତାଙ୍କ ସ୍ୱାମୀ ସୁନିଲ ଦଳେଇ ମଧ୍ୟ ଉପସ୍ଥିତ ଥିଲେ । ଦୁହେଁ ମାଡ଼ ମରାଯିବା ଘଟଣାକୁ ଅସ୍ୱୀକାର କରିଥିବା ପୁଲିସ କହିଛି ।
ଏନେଇ ପାଖ ପଡ଼ୋଶୀଙ୍କୁ ମଧ୍ୟ ପୁଲିସ ପଚରାଉଚରା କରୁଛି । ଦୁଇ ଦିନ ତଳେ ସହାୟିକା ଜଣକ ଘରୁ କେଉଁଆଡ଼େ ଚାଲିଯିବା ପରେ ଆମେ ଏନେଇ ବିଡ଼ାନାସୀ ଥାନାରେ ଏକ ଏତଲା ମଧ୍ୟ ଦେଇଥିଲୁ । ପୁଲିସ ଏକ ମିସିଂ କେସ୍ ମଧ୍ୟ କରିଥିବା ରିୟା ପୁଲିସକୁ ଜଣାଇଛନ୍ତି। ବିଡ଼ାନାସୀ ଥାନା ପୁଲିସ ମଧ୍ୟ ଏଭଳି ନିଖୋଜ ଘଟଣା ନେଇ ରିୟା ଦୁଇ ଦିନ ତଳେ ଅଭିଯୋଗ କରିଥିଲେ ବୋଲି କହିଛି ।
ଅନ୍ୟପଟେ ଶୁକ୍ରବାର ତଦନ୍ତକାରୀ ଟିମ୍ ଭୁବନେଶ୍ୱର ଯାଇ ଅଭିଯୋଗକାରିଣୀ ସହାୟିକାଙ୍କୁ ପଚାରାଉଚରା କରିବ ବୋଲି ଥାନା ଅଧିକାରୀ ଶ୍ରୀ ସ୍ୱାଇଁ ଜଣାଇଛନ୍ତି । ଏଯାବତ ହୋଇଥିବା ତଦନ୍ତରେ ସହାୟିକାଙ୍କ ବୟସ ୧୯ ଓ ସେ ଦେଢ଼ ବର୍ଷ ତଳୁ ରିୟାଙ୍କ ଘରେ କାମ କରୁଥିଲେ ବୋଲି ଜଣାପଡ଼ିଥିବା ପୁଲିସ କହିଛି । ସେ ନାବାଳିକା ଥିବା ବେଳେ ନିର୍ଯାତନାର ଶିକାର ହୋଇଛନ୍ତି କି ନାହିଁ ତାହା ତଦନ୍ତ ପରେ ଜଣାପଡ଼ିବ ବୋଲି ଥାନା ଅଧିକାରୀ ଶ୍ରୀ ସ୍ୱାଇଁ ସୂଚନା ଦେଇଛନ୍ତି ।
