ନୂଆଦିଲ୍ଲୀ: ଆମେରିକାରେ ସୃଷ୍ଟି ବ୍ୟାଙ୍କିଂ ସଂକଟ ବିଶ୍ୱ ଅର୍ଥନୀତିକୁ ଦୋହଲାଇ ଦେଇଛି । କେବଳ ୨ ଦିନରେ ହିଁ ଗ୍ଲୋବାଲ ଫାଇନାନସିଆଲ୍ ଷ୍ଟକ୍ସର ବଜାର ମୂଲ୍ୟ ୪୬୫ ବିଲିୟନ ଡଲାର (ପ୍ରାୟ ୩୮୩୦୦୦୦ କୋଟି ଟଙ୍କା) କମି ଯାଇଛି । ସିଲିକନ ଭ୍ୟାଲି ବ୍ୟାଙ୍କ ଧରାଶାୟୀ ହେବା ପରେ ସାରା ଦୁନିଆର ନିବେଶକ, ଲ୍ୟାଣ୍ଡର୍ସ ନିଜର ନିଜ ଭାଗିଦାରୀ ହ୍ରାସ କରିବାରେ ଲାଗିଛନ୍ତି । ମଙ୍ଗଳବାର ଗ୍ଲୋବାଲ ଫାଇନାନସିୟାଲ ଷ୍ଟକ୍ସରେ ବଡ଼ ଧରଣର ହ୍ରାସ ଦେଖିବାକୁ ମିଳିଛି ।

ଏସଏଲସିଆଇ ଏସିଆ ପେସିଫିକ୍ ଫାଇନାନସିଆଲ୍ ସୂଚକାଙ୍କରେ ୨.୭ ପ୍ରତିଶତର ହ୍ରାସ ଘଟିଛି ଏବଂ ଏହା ଗତ ବର୍ଷ ନଭେମ୍ୱର ୨୯ ପରେ ନିଜର ସର୍ବନିମ୍ନ ସ୍ତରରେ ପହଞ୍ଚିଛି । ଅନ୍ୟପଟେ ଜାପାନର ମିତ୍ସୁବିଶି ୟୁଏଫଜେ ଫାଇନାନସିୟାଲ ଗ୍ରୁପରେ ୮ ପ୍ରତିଶତରୁ ଅଧିକ ହ୍ରାସ ଘଟିଛି । ସେହିପରି ଦକ୍ଷିଣ କୋରିଆର ହାନା ଫାଇନାନସିଆଲ୍ ଗ୍ରୁପରେ ୪.୭ ପ୍ରତିଶତ ହ୍ରାସ ଏବଂ ଅଷ୍ଟ୍ରେଲିଆର ଏଏନଜେଡ୍ ଗ୍ରୁପ୍ ହୋଲ୍ଡିଙ୍ଗ ଲିମିଟେଡର ସେୟାରରେ ୨.୮ ପ୍ରତିଶତ ହ୍ରାସ ଘଟିଛି ।

MSCI ୱାର୍ଲଡ ଫାଇନାନସିଆଲ୍ ସୂଚକାଙ୍କ ଏବଂ MSCI ଇମର୍ଜିଂ ଫାଇନାନସିୟାଲ ସୂଚକାଙ୍କରେ ସୂଚୀବଦ୍ଧ କମ୍ପାନିଗୁଡିକର ବଜାର ପୁଞ୍ଜି ଶୁକ୍ରବାରଠାରୁ ପ୍ରାୟ ୪୬୫ ବିଲିୟନ ଡଲାର (୩୮୩୦୦୦୦ କୋଟି ଟଙ୍କା) କମି ସାରିଛି ।

ୟୁରୋପିୟନ ବ୍ୟାଙ୍କ ଏବଂ ବୀମା କମ୍ପାନି ଗୁଡିକର ସେୟାର ମୂଲ୍ୟରେ ମଧ୍ୟ ବଡ଼ ଧରଣ ହ୍ରାସ ରେକର୍ଡ ହୋଇଛି । କ୍ରେଡିଟ୍ ସୁଇସ୍ ଗ୍ରୁପ୍ ଏଜିର ସେୟାର ୧୫ ପ୍ରତିଶତ କମି ରେକର୍ଡ ସ୍ତରକୁ ଖସି ଆସିଛି । ଅନ୍ୟପଟେ ଏହାର ବଣ୍ଡ୍ସର ଇନ୍ସ୍ୟୁରାନ୍ସ ମୂଲ୍ୟ ଆଜି ଯାଏ ସର୍ବୋଚ୍ଚ ସ୍ତରରେ ପହଞ୍ଚିଛି । ଜାପାନର ଫାଇନାନସିୟାଲ ଷ୍ଟକ୍ସରେ ମଧ୍ୟ ହ୍ରାସ ଦେଖିବାକୁ ମିଳିଛି ।