ପୁରୀ ୦୮/୦୩: ହୋଟେଲ୍‌ ସମ୍ରାଟ୍‌ରେ ଫସିଥିବା ୧୫ ଜଣ ପର୍ଯ୍ୟଟକଙ୍କୁ ଅଗ୍ନିଶମ କର୍ମଚାରୀ ସୁରକ୍ଷିତ ଭାବେ ଉଦ୍ଧାର କରିଛନ୍ତି। ପରେ ସେମାନଙ୍କୁ ତୁରନ୍ତ ନିକଟସ୍ଥ ଡାକ୍ତରଖାନାକୁ ନିଆଯାଇଛି।ଏନେଇ ଅଗ୍ନିଶମ ବିଭାଗ ପକ୍ଷରୁ ସୂଚନା ଦିଆଯାଇଛି। କିନ୍ତୁ ଘଟଣାସ୍ଥଳରେ ପରିସ୍ଥିତି ନିୟନ୍ତ୍ରଣାଧୀନ ହୋଇନାହିଁ। ନିଆଁ ଲାଗିଥିବା ୩ ମହଲା ଘରେ ଭେଣ୍ଟିଲେସନ୍‌ ହେଉଥିବାରୁ ନିଆଁକୁ ଆୟତ୍ତ କରିବା ସହଜ ହୋଇପାରୁନଥିବା ଜଣାପଡ଼ିଛି। ଖବର ଅନୁସାରେ, ପ୍ରଥମେ ସେଠାରେ ଥିବା ସମ୍ରାଟ୍‌ ଫେସନ୍‌ ଲୁଗା ଦୋକାନରେ ନିଆଁ ଲାଗିଥିଲା। ପରେ ଉପର ମହଲାକୁ ନିଆଁ ବ୍ୟାପିଯାଇଥିଲା।

ସୂଚନାଥାଉକି, ପୁରୀ ସହରର ମରିଚିକୋଟ ପାଖ ଲକ୍ଷ୍ମୀ ମାର୍କେଟ୍‌ କମ୍ପ୍ଲେକ୍ସରେ ଭୟାବହ ଅଗ୍ନିକାଣ୍ଡ ହୋଇଛି। ଏହାର କାରଣ ବର୍ତ୍ତମାନ ସୁଦ୍ଧା ଜଣାପଡ଼ିନାହିଁ। ଘଟଣାସ୍ଥଳରେ ଅଗ୍ନିଶମ କର୍ମଚାରୀମାନେ ପହଞ୍ଚି ନିଆଁକୁ ଆୟତ୍ତ କରିବାକୁ ଚେଷ୍ଠା ଜାରି ରଖିଛନ୍ତି। ମାର୍କେଟ୍‌ କମ୍ପ୍ଲେକ୍ସଟି ୩ ମହଲା ବିଶିଷ୍ଟ ହୋଇଥିବା ବେଳେ, ପ୍ରଥମ ମହଲାରେ ଥିବା ଏକ ଡ୍ରେସ୍‌ ଦୋକାନରେ ନିଆଁ ଲାଗିଥିଲା। ପରେ ଏହି ନିଆଁ ବ୍ୟାପିବାରୁ ଉପର ମହଲାରେ ଥିବା ହୋଟେଲ୍‌ ସମ୍ରାଟ୍‌ରେ ଅନେକ ଯାତ୍ରୀ ଫସି ରହିଥିଲେ। ସେମାନଙ୍କୁ ଅଗ୍ନିଶମ ବାହିନୀର ଉଦ୍ଧାର କାରି ଦଳ ସୁରକ୍ଷିତ ଭାବେ ଉଦ୍ଧାର କରିଛନ୍ତି।