କୋଲକାତା,୨୮/୦୭: ରିଲ୍ସ ପାଇଁ ସବୁ ମାୟାରେ ବାୟା । ପିଲାଠୁ ବୁଢା ଯାହାକୁ ଦେଖି ସେ ରିଲ୍ସ କରିବାରେ ବ୍ୟସ୍ତ । ଖାସ୍ କରି ସୋସିଆଳ ମିଡିଆ ଏବେ ଅନେକ ଲୋକଙ୍କ ଦୈନନ୍ଦିନ ଜୀବନର ଅବିଚ୍ଛେଦ୍ୟ ଅଂଶ ପାଲଟି ଗଲାଣି । ରିଲ୍‌ସ କରି ତାର ଭିଡିଓ ଇନଷ୍ଟା ହେଉ ବା ଫେସ୍‌ବୁକ୍‌ ବା ୟୁଟ୍ୟୁବ୍‌ରେ ଅପଲୋଡ କରିବା କିଛି ନୂଆ କଥା ନୁହେଁ ।

ଖାଲି ଅପଲୋଡ଼ ନୁହେଁ ସେୟାର କରିବା ପଇସା ଇନକମ୍‌ ଚକ୍କର ଯୁବପୀଢ଼ିଙ୍କର ଫ୍ୟାସନରେ ପରିଣତ ହୋଇଗଲାଣି । କିନ୍ତୁ ରିଲ୍ସ କରିବା ଫୋନ ଦରକାର ପଡିଲା ବୋଲି ଦମ୍ପତ୍ତି ନିଜ ପୁଅକୁ ବିକେଦେବା ଘଟଣା ଶୁଣିଲେ ଆପଣ ବି ତାଜୁବ ହୋଇଯିବେ । ଏମିତି ଘଟଣା ଘଟିଛି ପଶ୍ଚିମବଙ୍ଗରେ । ଯେ କେହି ବି ଏକଥା ଶୁଣିଛନ୍ତି ସେ ବି ଆଶ୍ଚର୍ଯ୍ୟ ହୋଇପଡିଛନ୍ତି ।

ଖାସ୍ କରି ରିଲ୍‌ସ କରିବା ଲାଗି ଆଇଫୋନ୍‌ କିଣିବାକୁ ଏହି ଦମ୍ପତି ସେମାନଙ୍କର ୮ ମାସର ଶିଶୁପୁତ୍ରକୁ ବିକ୍ରି କରିଦେଇଛନ୍ତି । ତେବେ ଘଟଣା ଜଣାପଡ଼ିବା ପରେ ପୋଲିସ ପତ୍ନୀଙ୍କୁ ଗିରଫ କରିଥିବା ବେଳେ ସ୍ୱାମୀ ଫେରାର ହୋଇଯାଇଛନ୍ତି । ସୂଚନା ଥାଉକି, ପଶ୍ଚିମବଙ୍ଗର ଉତ୍ତର ୨୪ ପ୍ରଗଣା ଜିଲ୍ଲାରେ ରହୁଛନ୍ତି ଜୟଦେବ ଘୋଷ ଓ ପତ୍ନୀ ସାଥୀ ଘୋଷ । ସେମାନଙ୍କର ଏକ ୭ ବର୍ଷର କନ୍ୟା ସନ୍ତାନ ଏବଂ ୮ ମାସର ପୁତ୍ର ସନ୍ତାନ ଅଛନ୍ତି । ବିଭିନ୍ନ ସ୍ଥାନ ବୁଲି ରିଲ୍‌ସ କରିବା ଏହି ଦମ୍ପତିଙ୍କର ପ୍ରବଳ ନିଶା । କିନ୍ତୁ ଅର୍ଥାଭାବ ଯୋଗୁ ଭଲ ଆଇଫୋନ୍‌ କିଣିବା ସେମାନଙ୍କ ପକ୍ଷେ ସମ୍ଭବ ହୋଇନଥିଲା । ତେଣୁ ସେମାନେ ନିଜର ୮ମାସର ପୁଅକୁ ବିକ୍ରି କରିବାକୁ ଯୋଜନା କରିଥିଲେ ।

ସେହି ଅନୁସାରେ ସେମାନେ ଖରଦା ଅଞ୍ଚଳରେ ପ୍ରିୟଙ୍କା ଘୋଷ ନାମକ ମହିଳାଙ୍କୁ ଶିଶୁପୁତ୍ରକୁ ବିକ୍ରି କରି ଟଙ୍କା ଆଣିବା ପରେ ଏକ ଆଇଫୋନ୍‌ ୧୪ କିଣିଥିଲେ । ଏହା ପରେ ସେମାନେ ରାଜ୍ୟର ବିଭିନ୍ନ ସ୍ଥାନକୁ ଯାଇ ରିଲ୍‌ସ କରିବା ସହ ତାକୁ ସୋସିଆଲ ମିଡିଆରେ ସେୟାର ମଧ୍ୟ କରିବାକୁ ଲାଗିଲେ । ଶିଶୁପୁତ୍ରକୁ ବିକ୍ରି କରିବା ପୂର୍ବରୁ ସେମାନେ ଝିଅକୁ ବିକ୍ରି କରିବାକୁ ଉଦ୍ୟମ କରିଥିଲେ । ତେବେ ଶିଶୁପୁତ୍ରଟି ବେଶ୍‌ କିଛିଦିନ ଧରି ଗାୟବ ହେବା ଏବଂ ଏହି ଦମ୍ପତିଙ୍କର ହାବଭାବରେ ପରିବର୍ତ୍ତନ ଦେଖି ପାଖ ପଡ଼ିଶାମାନେ ସନ୍ଦେହ କରିଥିଲେ । ତା’ଛଡ଼ା ସେମାନଙ୍କ ହାତରେ ଦାମୀ ଆଇଫୋନ୍‌ ଦେଖିବା ପରେ ପଡ଼ୋଶୀଙ୍କ ସନ୍ଦେହ ବଢ଼ିବାକୁ ଲାଗିଥିଲା ।

ପଡ଼ୋଶୀମାନେ ସାଥୀଙ୍କୁ ଘଟଣା ସମ୍ପର୍କରେ ପଚାରିବାରୁ ପ୍ରଥମେ ସେ ସେମାନଙ୍କ କଥାକୁ ଏଡ଼ାଇ ଯାଇଥିଲେ । ମାତ୍ର ପଡ଼ୋଶୀମାନେ ଚାପ ପକାଇବାରୁ ସେ ଶିଶୁପୁତ୍ରକୁ ବିକ୍ରି କରି ଆଇଫୋନ୍‌ କିଣିଥିବା ସ୍ୱୀକାର କରିଥିଲେ । ଅଭିଯୋଗ ପାଇ ପୋଲିସ ଶନିବାର ସାଥୀଙ୍କୁ ଗିରଫ କରିବା ସହ ଶିଶୁପୁତ୍ରକୁ ଉଦ୍ଧାର କରିଛି । ଶିଶୁପୁତ୍ରକୁ କିଣିଥିବା ମହିଳାଙ୍କୁ ମଧ୍ୟ ପୁଲିସ ଗିରଫ କରିଛି । ତେବେ ଅଭିଯୁକ୍ତ ଜୟଦେବ ଫେରାର ହୋଇଯାଇଛନ୍ତି । ତାଙ୍କୁ ଧରିବା ଲାଗି ପୁଲିସ ପକ୍ଷରୁ ଉଦ୍ୟମ ଜାରି ରହିଛି ।