ବହାଦୂରଗଡ଼ ୨୫।୨: ହରିୟାଣା ବାହାଦୂର ଗଡରେ ଇଣ୍ଡିଆନ ନ୍ୟାସନାଲ ଲୋକଦଳ (ଆଇଏନଏଲଡି) ପ୍ରଦେଶ ଅଧ୍ୟକ୍ଷ ତଥା ପୂର୍ବତନ ବିଧାୟକ ନଫେ ସିଂହ ରାଠୀଙ୍କୁ ରବିବାର ଆତତାୟୀ ଗୁଳି କରି ହତ୍ୟା କରିଛନ୍ତି। ଆତତାୟୀ ତାଙ୍କ ଉପରକୁ ଗୁଳିମାଡ଼ କରିବା ବେଲେ ନଫେ ସିଂହ ତାଙ୍କ ଫର୍ଚ୍ୟୁନର କାରରେ ବସି ଥିଲେ। କୁହାଯାଉଛି ତାଙ୍କ ଉପରକୁ ଆତତାୟୀ ୪୦ରୁ ୫୦ ରାଉଣ୍ଡ ଗୁଳି ଚଳାଇଛନ୍ତି। ଆନଏନଏଲଡିର ଜନୈକ ନେତା ତାଙ୍କୁ ଲଗାତାର ହତ୍ୟାଧମକ ମିଳୁଥିଲା ବୋଲି କହିଛନ୍ତି।
ପାର୍ଟି ମୁଖପାତ୍ର ଅମନଦୀପ କହିଛନ୍ତି ଯେ ତାଙ୍କ ସୁରକ୍ଷା ନିମନ୍ତେ ସରକାରଙ୍କୁ ନିବେଦନ କରାଯାଇଥିଲା। ତେବେ ସରକାରଙ୍କ ପକ୍ଷରୁ ତାଙ୍କୁ ଏପର୍ଯ୍ୟନ୍ତ ସୁରକ୍ଷା ଯୋଗାଇ ଦିଆଯାଇନଥିଲା। ତେବେ ରାଠୀଙ୍କ ଉପରେ ଏହା ପ୍ରଥମ ଆକ୍ରମଣ ନୁହେଁ। ଏହା ପୂର୍ବରୁ ମଧ୍ୟ ତାଙ୍କ ଉପରେ ଛୋଟମୋଟ ଆକ୍ରମଣ ହୋଇଥିଲା। ଏଣୁ ତାଙ୍କୁ ସୁରକ୍ଷା ଯୋଗାଇ ଦେବାକୁ ପାର୍ଟି ପକ୍ଷରୁ ସରକାରଙ୍କୁ ଅନୁରୋଧ କରାଯାଇଥିଲା। ଝଜ୍ଜର ଏସପି ଅର୍ପିତ ଜୈନ କହିଛନ୍ତି ଯେ ପୋଲିସକୁ ଗୁଳିକାଣ୍ଡର ସୂଚନା ମିଳିଛି।
{"id":913665,"width":841,"height":473,"sizeSlug":"full","linkDestination":"none"}![](https://www.prameyanews7.com/wp-content/uploads/2024/02/Nafe.jpg)
ଏସପି ଜୈନ କହିଛନ୍ତି ଯେ ଏହି ମାମଲାରେ ସିଆଇଏ ଓ ଏସଟିଏଫ ଟିମକୁ ନିୟୋଜିତ କରାଯାଇଛି। ଏଣୁ ହତ୍ୟାକାରୀ ଖୁବ୍ ଶୀଘ୍ର ଧରାପଡିଯିବେ। କୁହାଯାଉଛି ନଫେ ସିଂହ ତାଙ୍କ ଫର୍ଚ୍ୟୁନରରେ ଯାଉଥିବା ବେଳେ ଏକ ଆଇ-୧୦ କାର ତାଙ୍କ ପିଛା କରୁଥିଲା। ନଫେ ସିଂହଙ୍କ ଗାଡି ବରାହୀ ଫାଟକ ନିକଟରେ ପହଞ୍ଚିବା ମାତ୍ରେ ଆତତାୟୀ ତାଙ୍କ ଉପରକୁ ଅନ୍ଧାଦୁନିଆ ଗୁଳିମାଡ଼ କରିଥିଲେ। କଂଗ୍ରେସ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ଭୂପିନ୍ଦର ସିଂହ ହୁଡ୍ଡା ନଫେସିଂହଙ୍କ ହତ୍ୟାକୁ ନେଇ କ୍ଷୋଭ ପ୍ରକାଶ କରିଥିବା ବେଳେ ଏହାକୁ ଦୁଃଖଦ ବୋଲି କହିଛନ୍ତି।
ହୁଡ୍ଡା ପ୍ରଦେଶର ଆଇନଶୃଙ୍ଖଳା ବିପର୍ଯ୍ୟସ୍ତ ହୋଇପଡିଥିବା କହିଛନ୍ତି। ଏହି ଘଟଣାରୁ ଆଇନଶୃଙ୍ଖଳା ବୋଲି ରାଜ୍ୟରେ କିଛି ନଥିବା ପ୍ରମାଣିତ ହେଉଛି। ଏଣୁ ରାଜ୍ୟରେ ଆଜି ସାଧାରଣ ଲୋକେ ବି ନିଜକୁ ସୁରକ୍ଷିତ ମଣୁ ନଥିବା ହୁଡ୍ଡା କହିଛନ୍ତି। ହୁଡ୍ଡା ମୃତକଙ୍କ ନିମନ୍ତେ ଶୋକ ପ୍ରକାଶ କରିଥିବା ବେଳେ ତାଙ୍କ ପରିବାର ପ୍ରତି ଗଭୀର ସମବେଦନା ଜ୍ଞାପନ କରିଛନ୍ତି।