ଭୁବନେଶ୍ଵର: ଅସହ୍ୟ ଗରମ । ଗମଗମ ବୋହୁଛି ଝାଳ । ସହି ହେଉନି ଗୁଳୁଗୁଳି ।  ଗୋଟିଏ ପଟେ ରାଜ୍ୟବାସୀ ଗରମକୁ ନେଇ ଅସ୍ତବ୍ୟସ୍ତ ହେଉଥିବା ବେଳେ ଅନିଶ୍ଚିତ ମୌସୁମୀକୁ ନେଇ ଚିନ୍ତାରେ ଚାଷୀ । ଚାହୁଁ ଚାହୁଁ ଜୁନର ଅଧା ଦିନ ଗଡ଼ିଗଲାଣି । ୭୯ ପ୍ରତିଶତ କମ୍ ବର୍ଷା ରେକର୍ଡ଼ କରାଯାଇଛି । ଜୁନ୍ ୧ ରୁ ୧୭ ତାରିଖ ଭିତରେ ୯୧ ମିମି ବର୍ଷା ହେବା କଥା କିନ୍ତୁ ହୋଇଛି ମାତ୍ର ୧୯ ପ୍ରତିଶତ ।

ମାଟି ଫାଟି ଆଁ କଲାଣି । ଚାଷ କାମ ଆଗେଇ ପାରୁନି । ଆଇଏମଡ଼ି ରେକର୍ଡ଼ ଅନୁଯାୟୀ ଗୋଟିଏ ବର୍ଷରେ ସର୍ବାଧିକ ୧୧ ଟି ଗ୍ରୀଷ୍ମ ଲହରୀ ଆସିଥାଏ । ଏଥର କିନ୍ତୁ ୨୧ ଗ୍ରୀଷ୍ମ ଲହରୀକୁ ସହି ସାରିଲେଣି ରାଜ୍ୟବାସୀ । ତେଣୁ ବର୍ଷା କମ ସାଙ୍ଗକୁ ଚାଷ କାମରେ ପ୍ରବଳ ବ୍ୟାଘାତ ସୃଷ୍ଟି ହେଲାଣି । ତେବେ ସବୁଠୁ ସାଙ୍ଘାତିକ କଥା ହେଲା ଚଳିତ ବର୍ଷ ଏଲ ନିନୋ ପ୍ରଭାବରେ ବନ୍ୟା ଓ ମରୁଡ଼ି ଭଳି ପ୍ରତିକୂଳ ପରିସ୍ଥିତିକୁ ମୁକାବିଲା କରିବ ଆମ ରାଜ୍ୟ ।

ତେଣୁ କୃଷି ବିଶେଷଜ୍ଞଙ୍କ କହିବା କଥା ହେଲା ୧୨୦-୧୩୦ ଦିନ ଭିତରେ ଅମଳ କରି ହେଉଥିବା ଧାନ ଚାଷ କରିବା ପାଇଁ ପରାମର୍ଶ ଦେଇଛନ୍ତି । ଢିପ ଜମିରେ ଚାଷ କରିବା ଓ ରୋଇବା ପରିବର୍ତ୍ତେ ବୁଣିବା ଧାନ କରିବା ପାଇଁ କହିଛନ୍ତି । ଏହାଛଡ଼ା ବନ୍ୟାକୁ ସହି ପାରୁଥିବା ଧାନ ଚାଷ କରିବା ପାଇଁ ମଧ୍ୟ ଚାଷୀକୁ ପରାମର୍ଶ ଦେଇଛନ୍ତି ।

ତେବେ ଆଗାମୀ ୩ ଦିନ ପାଇଁ ଦିନ ତାପମାତ୍ରା ରେ କୌଣସି ବଡ଼ ପରିବର୍ତ୍ତନ ନ ଥିବା କହିଛି ପାଣିପାଗ ବିଜ୍ଞାନ କେନ୍ଦ୍ର । କିଛି ଜିଲାରେ ୪ ରୁ ୭ ଡ଼ିଗ୍ରୀ ତାପମାତ୍ରା ବୃଦ୍ଧି ହେବା ସମ୍ଭାବନା ରହିଛି ।  ସାମୁଦ୍ରିକ ପବନ ଉପକୂଳରୁ ଆସୁଥିବାରୁ ଟିକେ କମ୍ ଗରମ ଅନୁଭୂତ ହେବା ନେଇ ମଧ୍ୟ ପାଣିପାଗ ବିଶେଷଜ୍ଞ ମାନେ ମତ ଦେଇଛନ୍ତି  । ଗତ ୨୪ ଘଣ୍ଟାରେ  ସୋନପୁରରେ ସର୍ବାଧିକ ୪୫.୭ ଡ଼ିଗ୍ରୀ ସେଲସିୟସ ରେକର୍ଡ଼  କରାଯାଇଥିଲା ।

ଏ ଖବର ପଢନ୍ତୁ-ଉତ୍କଟ ମରୁଡି ଯୋଗୁ ଭୋକରେ ଆଉଟୁପାଉଟୁ ୧.୩କୋଟିରୁ ଅଧିକ ଲୋକ, ୬ମାସରେ ସ୍ଥିତି ଆହୁରି ହେବ ଭୟଙ୍କର! ଚେତାଇଲା ୟୁଏନ୍‌