scan steel
web-baneer-728x90
WhatsApp Image 2023-12-06 at 12.52.17
728x90-banner-17.2.24jpg
Untitled-1 copy (1)
previous arrow
next arrow

Prameya News7

Prameya News7, News7 Odia, Odisha Latest News, Odisha Current Headlines, Odisha News Online, Odisha News, khabar odisha,news in oriya

କେନ୍ଦ୍ର ସରକାରଙ୍କ ନୂଆ କୃଷି ଆଇନ ବିରୋଧରେ ଦିଲ୍ଲୀ ସୀମାରେ ଚାଷୀଙ୍କ ହଲ୍ଲାବୋଲ: ୩ରେ କେନ୍ଦ୍ର କୃଷିମନ୍ତ୍ରୀ ଓ ଚାଷୀ ସଂଗଠନର ଆଲୋଚନା

28/11/2020 at 6:12 PM

ନୂଆଦିଲ୍ଲୀ ୨୮/୧୧ : କେନ୍ଦ୍ର ସରକାରଙ୍କ ନୂଆ କୃଷି ଆଇନ ବିରୋଧରେ ତେଜୁଛି ଆନ୍ଦୋଳନ । ଦିଲ୍ଲୀରେ ପ୍ରବେଶ କରିବା ପାଇଁ ହଜାର ହଜାର ଚାଷୀ ପଞ୍ଜାବ-ହରିୟାଣା ସୀମାରେ ଡେରା ପକାଇଛନ୍ତି। ଅନେକ ଚାଷୀ ଦିଲ୍ଲୀ ସୀମା ସ୍ଥିତ ନିରଙ୍କରି ଗ୍ରାଉଣ୍ଡରେ ଡେରା ପକାଇ ସାରିଲେଣି । ଏମାନେ ଲମ୍ବା ଲଢେଇ ପାଇଁ ରଣନୀତି କରି ଆସିଛନ୍ତି ।

ଦିଲ୍ଲୀ ସୀମାରେ ହଜାର ହଜାର ଚାଷୀଙ୍କ ରଣହୁଙ୍କାର। କେନ୍ଦ୍ର ସରକାରଙ୍କ ନୂଆ କୃଷି ଆଇନ ବିରୋଧରେ ହଲ୍ଲାବୋଲ । ସିନ୍ଧୁ ବର୍ଡରରେ ପ୍ରତିବାଦ ଏବଂ ବିକ୍ଷୋଭ ଜାରି ରହିଛି । ଗତକିଛି ଦିନ ଧରି ଚାଷୀମାନେ ଦିଲ୍ଲୀରେ ପ୍ରବେଶ କରିବାକୁ ଉଦ୍ୟମ କରିବା ବେଳେ ପୋଲିସ ସହ ମୁହାଁମୁହିଁ ହୋଇଥିଲେ । ଚାଷୀଙ୍କୁ ରୋକିବା ଲାଗି ପୋଲିସ ଲୁହବୁହା ଗ୍ୟାସ୍, ୱାଟର୍ କ୍ୟାନନ୍ ବ୍ୟବହାର ସହ ବ୍ୟାରିକେଡିଂ କରିଥିବା ବେଳେ, ଚାଷୀମାନେ ମଧ୍ୟ ପୋଲିସକୁ ଟେକା ପଥର ମାଡ କରିବା ସହ ବ୍ୟାରିକେଡ୍ ଭାଙ୍ଗିଥିବା ଦେଖିବାକୁ ମିଳିଥିଲା । ଗତକାଲି ଦିଲ୍ଲୀରେ ପ୍ରବେଶ ଲାଗି କେନ୍ଦ୍ର ସରକାର ଅନୁମତି ଦେବା ପରେ ଏବେ ବୁରାଡିର ନିରଙ୍କର ସମାବେଶ ପଡିଆରେ ପଞ୍ଜାବ ଏବଂ ହରିୟାଣାରୁ ଆସିଥିବା ଚାଷୀମାନେ ବିକ୍ଷୋଭ ପ୍ରଦର୍ଶନ କରୁଛନ୍ତି । ଆଗକୁ ରଣନୀତି କଣ ରହିବ ସେନେଇ ଆଲୋଚନା ଚଳାଇଛନ୍ତି ।

ବୁରାଡିର ନିରଙ୍କର ଗ୍ରାଉଣ୍ଡରେ ଜମା ହୋଇଥିବା ଚାଷୀମାନେ ନିଜ ସହ ରାସନ ଏବଂ ଆବଶ୍ୟକ ସାମଗ୍ରୀ ଆଣିଛନ୍ତି । ଶୀତରୁ ରକ୍ଷା ପାଇବା ଲାଗି ଖାସ ବ୍ୟବସ୍ଥା କରାଯାଇଛି । ଏଠାରେ କୋଭିଡ୍ ଟେଷ୍ଟ ବ୍ୟବସ୍ଥା ମଧ୍ୟ ରହିଛି । ତେଣୁ ଚାଷୀ ଆନ୍ଦୋଳନ ଲମ୍ବା ସମୟ ପର୍ଯ୍ୟନ୍ତ ଚାଲିବ ବୋଲି ଅନୁମାନ କରାଯାଉଛି । ଟ୍ରାଫିକ୍ ସ୍ଥିତିକୁ ଆଖିରେ ରଖି ନିରଙ୍କରି ଗ୍ରାଉଣ୍ଡ ଆଖପାଖର ସମସ୍ତ ରାସ୍ତାରେ ସର୍ବସାଧାରଣଙ୍କ ଯାତାୟତ ବନ୍ଦ କରିଛି ପୋଲିସ । ଚାଷୀ ସଂଗଠନ ସହ କେନ୍ଦ୍ର କୃଷିମନ୍ତ୍ରୀ ନରେନ୍ଦ୍ର ସିଂହ ତୋମାର ଡିସେମ୍ବର ୩ରେ ଆଲୋଚନା କରିବେ। ତୋମାର କହିଛନ୍ତି ‘ମୁଁ କୃଷକମାନଙ୍କୁ ନିବେଦନ କରୁଛି ସେମାନେ ଆନ୍ଦୋଳନ ଛାଡି କଥାବାର୍ତ୍ତା ପାଇଁ ଆସନ୍ତୁ।

ଚାଷୀ ସଂଗଠନ ଦିଲ୍ଲୀ ପହଞ୍ଚିବା ସହ ରାଜନୀତି ସରଗରମ ହୋଇଛି। ପ୍ରଥମେ ପଞ୍ଜାବ ଏବଂ ହରିୟାଣା ରାଜ୍ୟ ସରକାର ମୁହାଁମୁହିଁ ହୋଇଥିବା ବେଳେ ଏବେ କଂଗ୍ରେସ ନେତା ରାହୁଲ ଗାନ୍ଧୀ ଟୁଇଟ୍ କରିଥିବା ଏକ ଫଟୋକୁ ନେଇ ରାଜନୀତି ଜୋର ଧରିଛି । ବୟସ୍କ ଚାଷୀଙ୍କ ଉପରକୁ ଜଣେ ପୋଲିସ ଲାଠି ଉଞ୍ଚାଇଥିବା ଫଟୋ ସେୟାର କରି ରାହୁଲ ନିନ୍ଦା କରିବା ସହ ପ୍ରଧାନମନ୍ତ୍ରୀ ମୋଦିଙ୍କୁ ସମାଲୋଚନା କରିଛନ୍ତି । ଏହାପରେ ଏହାର ଭିଡିଓ ଜାରି କରିଛି ବିଜେପି । ଯେଉଁଥିରେ ଦେଖିବାକୁ ମିଳିଛି ପୋଲିସ ଜଣକ ବେଶ ଦୂରରୁ ଲାଠି ଦେଖାଇ ଡରାଉଛନ୍ତି । ସେପଟେ ହିଂସକ ଆନ୍ଦୋଳନ ନେଇ ପଞ୍ଜାବ ଚାଷୀଙ୍କ ବିରୋଧରେ ହରିୟାଣା ସରକାର ମାମଲା ରୁଜୁ କରିଛନ୍ତି । ଏପରିକି ଆନ୍ଦୋଳନକାରୀଙ୍କ ଭିତରେ ଖଲିସ୍ତାନୀ ଥିବା କହି ଖଟ୍ଟର ସରକାର ବିବାଦ ସୃଷ୍ଟି କରିଛନ୍ତି । ଆଗକୁ ଦେଶର ରାଜଧାନୀ ଦିଲ୍ଲୀରେ ଚାଷୀ ଆନ୍ଦୋଳନ ଜୋରଦାର ହେବ ବୋଲି ଆଶଙ୍କା କରାଯାଉଛି ।

   Related Posts