ଦିଲ୍ଲୀ: ଫସଲର ଏମ୍ଏସ୍ପି ପାଇଁ ଆଇନ ଆଣିବା ଦାବିରେ ଚାଷୀଙ୍କ ଆନ୍ଦୋଳନ ଜୋରଦାର । ପଞ୍ଜାବ-ହରିଆଣାର ଶମ୍ଭୁ ଓ ଖନୌରି ସୀମାରେ ଗର୍ଜିଲା ଚାଷୀ ସଂଗଠନ । ଦିଲ୍ଲୀ ଭିତରକୁ ଧସେଇ ପଶିବା ବେଳେ ପୋଲିସ ଓ ଚାଷୀ ମୁହାଁମୁହିଁ ହୋଇଛନ୍ତି । ଧସ୍ତାଧସ୍ତି ବେଳେ ଖନୌରି ସୀମାରେ ଜଣେ ଯୁବ ଚାଷୀଙ୍କ ମୃତ୍ୟୁ ହୋଇଛି । ସେହିପରି ସଂଘର୍ଷରେ କିଛି ପୋଲିସକର୍ମୀ ମଧ୍ୟ ଆହତ ହୋଇଛନ୍ତି । ଫଳରେ ଆଗାମୀ ଦୁଇ ଦିନ ପାଇଁ ‘ଦିଲ୍ଲୀ ଚଲୋ’ ଆନ୍ଦୋଳନରେ ବ୍ରେକ୍ ଲାଗିଛି ।
ଚାଷୀ ଆନ୍ଦୋଳନ ଦୁଇ ଦିନ ସ୍ଥଗିତ ରହିଛି । ଏହି ଦୁଇ ଦିନ ମଧ୍ୟରେ ନୂଆ ରଣନୀତି ପ୍ରସ୍ତୁତ କରି ଚାଷୀମାନେ ଆଗକୁ ବଢ଼ିବେ ବୋଲି ଚାଷୀ ନେତା ସରୱଣ ସିଂହ ପାନେ୍ଧର କହିଛନ୍ତି । ହରିଆଣାର ଖନୌରି ସୀମାରେ ବୁଧବାର ୧୧ଟାରେ ଚାଷୀ ଆନ୍ଦୋଳନ ତେଜିଥିଲା । ହରିଆଣା ପୋଲିସ ସହ ସେମାନଙ୍କର ସଂଘର୍ଷ ହୋଇଥିଲା । ସଂଘର୍ଷ ବେଳେ ଜଣେ ୨୧ ବର୍ଷୀୟ ଚାଷୀ ପ୍ରାଣ ହରାଇଥିଲେ ଏବଂ କିଛି ଆହତ ହୋଇଥିଲେ । ଫେବ୍ରୁଆରୀ ୧୩ରୁ ଆରମ୍ଭ ହୋଇଥିବା ଆନ୍ଦୋଳନରେ ପ୍ରଥମ ଥର ପାଇଁ ଜଣେ ଚାଷୀ ସଂଘର୍ଷ ବେଳେ ପ୍ରାଣ ହରାଇଛନ୍ତି । ଫଳରେ ଆନ୍ଦୋଳନକୁ ଧକ୍କା ଲାଗିଛି । ମୃତ ଯୁବ ଚାଷୀ ଜଣକ ହେଉଛନ୍ତି ୨୨ ବର୍ଷିୟ ଶୁଭକରନ ସିଂହ । ତାଙ୍କ ଘର ପଞ୍ଜାବର ଭଠିଣ୍ଡା ଜିଲ୍ଲା ସ୍ଥିତ ବାଲୋକେ ଗ୍ରାମରେ ।
ପୂର୍ବ ଯୋଜନା ଅନୁସାରେ ଆଜି ଚାଷୀମାନେ ଜେସିବି, ପୋକ୍ଲିନ୍ ମେସିନ୍, ଏକ୍ସକାଭେଟର ଓ କ୍ରେନ୍ ଆଦି ଧରି ଆନ୍ଦୋଳନ ସ୍ଥଳରେ ପହଞ୍ଚିଥିଲେ । ଏହାପରେ ହରିଆଣା ପୋଲିସ ଏକ ବିବୃତି ଜାରି କରି ମେସିନ୍ଗୁଡ଼ିକୁ ତୁରନ୍ତ ହଟାଇବା ପାଇଁ କହିଥିଲା । ଏମିତି କି କେନ୍ଦ୍ର କୃଷିମନ୍ତ୍ରୀ ଅର୍ଜୁନ ମୁଣ୍ଡା ଚାଷୀମାନଙ୍କୁ ଶାନ୍ତି ବଜାୟ ପାଇଁ ପରାମର୍ଶ ଦେବା ସହ ଆଲୋଚନା ପାଇଁ ଆହ୍ୱାନ ଦେଇଥିଲେ । କିନ୍ତୁ ଚାଷୀମାନେ କିଛି ଶୁଣିବାକୁ ପ୍ରସ୍ତୁତ ନଥିଲେ । ଶମ୍ଭୁ ଓ ଖନୌରି ସୀମାରେ ଚାଷୀ ଆନ୍ଦୋଳନ ତେଜିବାକୁ ଲାଗିଥିଲା । ଚାଷୀମାନେ ବ୍ୟାରିକେଡ୍ ନିକଟତର ହେବା ପରେ ସ୍ଥିତିକୁ ନିୟନ୍ତ୍ରଣ କରିବା ପାଇଁ ହରିଆଣା ପୋଲିସ ରବର ଗୁଳି ଓ ଲୁହବୁହା ଗ୍ୟାସ୍ ମାଡ଼ କରିଥିଲା । ହରିଆଣା ପୋଲିସର ଗୁଳିମାଡ଼ରେ ଯୁବଚାଷୀ ଶୁଭକରନ ପ୍ରାଣ ହରାଇଥିବା ଚାଷୀମାନେ ଅଭିଯୋଗ କରିଛନ୍ତି । ତାଙ୍କ ମୁଣ୍ଡରେ ଗୁଳି ବାଜିଥିବା କୁହାଯାଉଛି ।
ଅଲ୍ ଇଣ୍ଡିଆ କିଷାନ କଂଗ୍ରେସ ଅଧ୍ୟକ୍ଷ ସୁଖପାଲ ସିଂହ ଖଇରା କହିଛନ୍ତି, ଚାଷୀମାନେ ଶାନ୍ତିପୂର୍ଣ୍ଣ ଢଙ୍ଗରେ ଆନ୍ଦୋଳନ କରୁଥିବା ବେଳେ ପୋଲିସ ଲୁହବୁହା ଗ୍ୟାସ୍ ଏବଂ ଗୁଳି ମାଡ଼ କରିଥିଲା । ଏଥିରେ ଅନେକ ଚାଷୀ ଆହତ ହୋଇଥିଲେ । ସମସ୍ତଙ୍କୁ ରାଜିନ୍ଦ୍ର ହସ୍ପିଟାଲରେ ଭର୍ତ୍ତି କରାଯାଇଥିଲା । ଏହାପରେ ଶୁଭକରନଙ୍କୁ ଡାକ୍ତର ମୃତ ଘୋଷଣା କରିଥିଲେ । ପୋଲିସର ଏଭଳି କାର୍ଯ୍ୟାନୁଷ୍ଠାନକୁ ବିରୋଧ କରି ଚାଷୀମାନେ ହରିଆଣାର ସବୁ ଜିଲ୍ଲାରେ ରାସ୍ତାରୋକ କରିବେ ବୋଲି ଚେତାବନୀ ଦେଇଛନ୍ତି ।
wp:embed {"url":"https://www.prameyanews7.com/bjp-slams-karnataka-government-for-10-percent-tax-on-temples-says-anti-hind/","type":"wp-embed","providerNameSlug":"prameya-news-7"}ଆନ୍ଦୋଳନ ବେଳେ କିଛି ଚାଷୀ ପୋଲିସର ଲୁହ ବୁହା ଗ୍ୟାସ ଓ ରବର ଗୁଳିକୁ ଜବାବ ଦେବା ଲାଗି ଧାନ ନଡ଼ାରେ ନିଆଁ ଲଗାଇ ଲଙ୍କାଧୂଆଁ ଦେଇଥିଲେ । ଲଙ୍କାଧୂଆଁ ବ୍ୟାପିବା ବେଳେ କିଛି ଚାଷୀ ପୋଲିସ ଉପରେ ଆକ୍ରମଣ କରିଥିଲେ । ଏହାଦ୍ୱାରା ୧୨ ପୁଲିସ କର୍ମୀ ଆହତ ହୋଇଛନ୍ତି । ଚାଷୀ ସଂଗଠନ କେଏମ୍ଏମ୍ର ସଂଯୋଜକ ସରୱଣ ସିଂହ ପାନେ୍ଧର ଲୁହବୁହା ଗ୍ୟାସ୍ ସଂସ୍ପର୍ଶରେ ଆସିଥିଲେ । ଏହାପରେ ତାଙ୍କୁ ଆନ୍ଦୋଳନ ସ୍ଥଳରୁ ବାହାରକୁ ନିଆଯାଇଥିଲା ।