ଆନନ୍ଦପୁର, ୨୨/୦୮: ଆନନ୍ଦପୁର ଉପଖଣ୍ଡ ହାଟଡିହି ବ୍ଲକ୍ ହାବଳେଶ୍ବର ପଞ୍ଚାୟତ ଜାବିନପୁର ଗାଁରେ ଅଘଟଣ । ଗତକଲି ନିଜ ବିଲ ଦେଖିବା ପାଇଁ ଯାଇ ପାଟରେ ବୁଡି ନିଖୋଜ ଥିବା ଚାଷୀ ଦୁଃଶାସନ ମୁଣ୍ଡାଙ୍କ ମୃତଦେହ ଗାଁ ପାଖ ଏକ କଲଭଟ ନିକଟରୁ ଉଦ୍ଧାର ହୋଇଛି । ସ୍ଥାନୀୟ ଯୁବକମାନେ ଆଜି ଜଣେ ବ୍ୟକ୍ତିଙ୍କ ମୃତଦେହ ଭାସୁଥିବାଦେଖି, ଉଦ୍ଧାର କରିବାରୁ ତାହା ନିଖୋଜ ଦୁଃଶାସନଙ୍କର ବୋଲି ଜଣାପଡିଥିଲା । 

ଦୁଃଶାସନ ପ୍ରତିଦିନ ସେହି ରାସ୍ତା ଦେଇ ନିଜ ବିଲକୁ ଯାଇଥାନ୍ତି । ଗତକାଲି ବୈତରଣୀ ବନ୍ୟା କାରଣରୁ ପାଟରେ ପାଣି ପୁରିଯାଇଥିବାରୁ ବାଟ ନପାଇ ସେ ପାଣିରେ ଭାସିଯାଇଥିବା ଅନୁମାନ କରାଯାଉଛି । ଖବରପାଇ ପୋଲିସ୍ ଘଟଣା ସ୍ଥଳରେ ପହଁଞ୍ଚି ମୃତଦେହ ଜବତ କରି ପୋଷ୍ଟମାର୍ଟମ ପାଇଁ ପଠାଇଥିବା ବେଳେ ଅଧିକ ତଦନ୍ତ ଜାରି ରଖିଛି ।