ସୁବର୍ଣ୍ଣପୁର ୧୩/୦୩: ହୀରାକୁଦ ଜଳଭଣ୍ଡାର କେନାଲ ପାଣି ବିନିକା ଅଞ୍ଚଳକୁ ପହଞ୍ଚି ପାରୁନି । ଫଳରେ ଶ୍ରୀ ଗଣେଶ ଆଞ୍ଚଳିକ କୃଷକ ସଂଘ ଓ ଅଞ୍ଚଳର ଚାଷୀ ବିନିକା ତହସିଲ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛନ୍ତି । ତହସିଲ କାର୍ଯ୍ୟାଳୟ ସମ୍ମୁଖରେ ଅଞ୍ଚଳର ଚାଷୀମାନେ ବିକ୍ଷୋଭ ପ୍ରଦର୍ଶନ କରିବା ସହ ବିଭିନ୍ନ ନାରାବାଜି ଦେଇଛନ୍ତି ।

ଶ୍ରୀ ଗଣେଶ ଆଂଚଳିକ କୃଷକ ସଂଘ ପକ୍ଷରୁ ତଳିଆ ଅଞ୍ଚଳକୁ ତୁରନ୍ତ କେନାଲ ପାଣି ଯୋଗାଇ ଦେବାପାଇଁ ଗତ ୯ ତାରିଖରେ ବିନିକା ତହସିଲଦାରଙ୍କ ଜରିଆରେ ଓଡିଶାର ମୁଖ୍ୟ ମନ୍ତ୍ରୀ ନବୀନ ପଟ୍ଟନାୟକଙ୍କୁ ଏକ ଦାବିପତ୍ର ପ୍ରଦାନ କରାଯାଇଥିଲା । ଦାବିପତ୍ର କରିବା ପରେ କେନାଲରେ ହୀରାକୁଦ ଜଳଭଣ୍ଡାରରୁ ପାଣି ଛଡାଯାଇଥିଲା ।

ଚାଷୀ ପାଇଁ ଯେଉଁ ଭାବରେ ପାଣି ଦରକାର ସେହି ଭଳି ଭାବରେ କେନାଲରେ ପାଣି ଆସୁ ନାହିଁ । ବର୍ତ୍ତମାନ ଚାଷ କାର୍ଯ୍ୟ ବିଳମ୍ୱ ହେବା ସାଙ୍ଗକୁ ଚାଷ ଜମି ଗୁଡ଼ିକ ଫାଟି ଆଁ କଲାଣି । ଯେଉଁଥିପାଇଁ ଚାଷୀ ପାଇଁ ଚାଷ କରିବାରେ ଚିନ୍ତା ହୋଇପଡିଛି । କେନାଲ ପାଣିକୁ ନେଇ ବାରମ୍ବାର ଦାବି କରିବା ସହିତ ଦାବୀପତ୍ର ମଧ୍ୟ ବହୁ ସମୟ ଦେବାପରେ କୌଣସି ସମାଧାନ ନହେବାରୁ ପୁଣି ବାଧ୍ୟ ହୋଇ ତହସିଲ କାର୍ଯ୍ୟାଳୟ ସମ୍ମୁଖରେ ଚାଷୀ ସଂଗଠନ ଓ ଚାଷୀ ମାନେ ବିକ୍ଷୋଭ ପ୍ରଦର୍ଶନ କରୁଛନ୍ତି ।

ଘଟଣା ସ୍ଥଳରେ ବର୍ତ୍ତମାନ ପର୍ଯ୍ୟନ୍ତ କୌଣସି ପ୍ରଶାସନିକ ଅଧିକାରୀ ପହଞ୍ଚି ନାହାନ୍ତି l କୌଣସି ପ୍ରକାର ଅପ୍ରୀତିକର ପରିସ୍ଥିତି ସୃଷ୍ଟି ନହେବା ପାଇଁ ପୋଲିସ ଫୋର୍ସ ମଧ୍ୟ ମୁତୟନ ହୋଇଥିଲେ l