ଭୁବନେଶ୍ବର ୩|୧୧: ପ୍ରଥମେ କହିଲେ, ସ୍ବଭାବିକଠାରୁ ଅଧିକା ବର୍ଷା ହେଲା । ଏବେ କହିଲେ, ୯ ଜିଲ୍ଲାର ୬୬ ବ୍ଲକରେ ମରୁଡ଼ି । ଆଉ ଏତିକି ବେଳେ ପଡ଼ିଛି ଚକଡ଼ା ଚଡ଼କ । ଚକଡ଼ା କ୍ଷତିଗ୍ରସ୍ତ ଚାଷୀ ମରୁଡ଼ି ଘୋଷଣା ଦାବିରେ ରାସ୍ତାକୁ ଓହ୍ଲାଇଲେଣି । କିନ୍ତୁ ମରୁଡ଼ି ଘୋଷଣା ହୋଇଥିବା ଅଞ୍ଚଳ ଠିକ୍ ଭାବେ ଆକଳନ ହୋଇ ନଥିବା କହିଲେଣି ବିରୋଧୀ । ପ୍ରସଙ୍ଗକୁ ବିଧାନସଭାରେ ଉଠାଇବାକୁ ଚେତାବନୀ ଦେଲେଣି ବିରୋଧୀ । ନଅ ଜିଲ୍ଲାର ୬୬ ବ୍ଲକକୁ ମରୁଡ଼ି ଘୋଷଣା କରିଦେଲେ ସରକାର । ସେସବୁ ଅଞ୍ଚଳର ଚାଷୀଙ୍କୁ ଦିଆଯିବ କ୍ଷତିପୂରଣ । କିନ୍ତୁ ଏବେ ଚକଡା ପୋକ ଯୋଗୁଁ କ୍ଷତିଗ୍ରସ୍ତ ଜମିକୁ ମରୁଡ଼ି ଘୋଷଣା କରିବାକୁ ଉଠିଲାଣି ଦାବି । ଚକଡ଼ା ଦ୍ବାରା କ୍ଷତିଗ୍ରସ୍ତ କଳାହାଣ୍ଡି ଭବାନୀପାଟଣା ବ୍ଲକର ୧୧ଟି ପଞ୍ଚାୟତର ଲୋକେ ମରୁଡ଼ି ଘୋଷଣା ଦାବିରେ ରାସ୍ତାକୁ ଓହ୍ଲାଇଛନ୍ତି । ସେପଟେ ବଲାଙ୍ଗିର ଜିଲ୍ଲାରେ ମଧ୍ୟ ଚକଡ଼ା ପାଇଁ ହଜାରେ ହେକ୍ଟର୍ ଧାନ ଜମି ନଷ୍ଟ ହୋଇଥିବା ଅଭିଯୋଗ ଆସିଛି । କଳାହାଣ୍ଡି ଜିଲ୍ଲାରେ ଏବର୍ଷ ସବୁଠୁ ଅଧିକା ବର୍ଷା ହୋଇଛି ବୋଲି ଏସଆରସିଙ୍କ ତଥ୍ୟ କହୁଛି । ତା ପରେ ବି ଜିଲ୍ଲାର ୫ଟି ବ୍ଲକ୍ ମରୁଡ଼ି । ମରୁଡ଼ି ଘୋଷଣା କରି ଚାଷୀଙ୍କୁ ସରକାର, ଠିକ୍ ଭାବେ ସହାୟତା ଦେବେ କି ନାହିଁ ତାକୁ ନେଇ ଉଠିଲାଣି ପ୍ରଶ୍ନ । ପ୍ରସଙ୍ଗକୁ ଆସନ୍ତା ଅଧିବେଶନରେ ଉଠାଇବେ ବୋଲି କହିଲେଣି ବିରୋଧୀ । ଏବର୍ଷ ରାଜ୍ୟରେ ସ୍ବଭାବିକ ଠାରୁ ୧୧.୩ ପ୍ରତିଶତ ଅଧିକା ବର୍ଷା ହୋଇଛି । ୧୧ ଜିଲ୍ଲାରେ ୧୯ ପ୍ରତିଶତରୁ ଅଧିକା ବର୍ଷା ହୋଇଥିବା ରେକର୍ଡ ହୋଇଛି । ତଥାପି ସରକାରଙ୍କ ଆଇ ଏଷ୍ଟିମେଟ୍ ରିପୋର୍ଟରେ ୯ ଜିଲ୍ଲାର ୬୬ ବ୍ଲକରେ ମରୁଡ଼ି ।