ଭବାନୀପାଟଣା ୬|୬: ପଞ୍ଜାବରୁ ଆସି ଭବାନୀପାଟଣା ସହରରେ  ରହୁଥିବା  ଏକ ପରିବାର ୫୦ ଲକ୍ଷରୁ ଉର୍ଦ୍ଧ୍ବ ଟଙ୍କା ଠକି ନେଇ ଫେରାର ହୋଇଯାଇଛନ୍ତି । ତେଣୁ ଟଙ୍କା ହରାଇଥିବା ମହିଳାମାନେ କଳାହାଣ୍ଡି ଏସପିଙ୍କୁ ଭେଟି ଚାରଶୋ ବିଶ୍ ଫ୍ୟାମିଲିକୁ ଖୋଜି ବାହାର କରିବାକୁ ନିବେଦନ କରିଛନ୍ତି । 

ଗତ ୨୫ବର୍ଷ ହେବ ପଞ୍ଜାବରୁ ରଞ୍ଜିତ କୌର ତାଙ୍କ ଝିଅ ଲପପ୍ରୀତ କୌର ଓ ପୁଅ ସୁଖେଦବ ସିଂ  ଭବାନୀପାଟଣା ସହର ବାହାଦୁର ବଗିଚାପଡାରେ ରହି ଆସୁଥିଲେ । ତେବେ ଉତ୍ତମ ସଂପର୍କକୁ ଆଧାର କରି ବିଭିନ୍ନ ଏସଏଚଜି, ବ୍ୟାଙ୍କ କରଜ, ସୁଧରେ ଟଙ୍କା , ସ୍ବାମୀଙ୍କ ଚିକିତ୍ସା ଆଳରେ ୫୦ଲକ୍ଷରୁ ଉର୍ଦ୍ଧ୍ବ ଟଙ୍କା ନେଇ ଫେରାର ମାରିଛନ୍ତି । ବିଶେଷକରି ଏହି ଠକେଇର ଶୀକାର ମହିଳାମାନେ ହୋଇଛନ୍ତି ।

ଗତ ୨୯ ତାରିଖରୁ ଭଡା ଘର ଛାଡି ଫେରାର ପରେ ଠକେଇ ମାମଲା ସମ୍ନାକୁ ଆସିଛି । ଏହି ପରିବାର ସ୍ଥାନୀୟ ଆଧାର କାର୍ଡ, ଭୋଟର ଆଇଡି କାର୍ଡ କରିଥିବା ବେଳେ ବ୍ୟାଙ୍କ ଓ ଏସଏଚଜି ଗ୍ରୁପରେ ଏହି ଦସ୍ତାବେଜ ମାଧ୍ୟମରେ ଋଣ କରିନେଇଛନ୍ତି ।

ସେପଟେ ଭବାନୀପାଟଣା ଟାଉନ ଥାନାରେ ଏନେଇ ମାମଲା ରୁଜୁ ହୋଇଥିବା ବେଳେ ତଦନ୍ତ ଆରମ୍ଭ ହୋଇଛି ।