ଗିରଫ ପରେ ନକଲି ଆଇଏଏସ୍ ଅଫିସରଙ୍କ କଳା କାରନାମାର ଫିଟୁଛି ଗୁମର । ଗୋଟିଏ ଦୁଇଟି ନୁହେଁ ତାଙ୍କ ନାମରେ ଅଭିଯୋଗର ଲମ୍ବା ତାଲିକା ଆସିଛି । ନିଜକୁ ମାଲକାନଗିରି ଉପଜିଲ୍ଲାପାଳ ଲିଙ୍ଗରାଜ ପଣ୍ଡା ବୋଲି ପରିଚୟ ଦେଇ ଚାକିରି ଦେବା ନାଁରେ ଅନେକ ଲୋକଙ୍କୁ ସେ ଠକିଛନ୍ତି । ମିଥ୍ୟା ଫେସବୁକ୍ ଆଇଡି ତିଆରି କରି ବିଭିନ୍ନ ଲୋକଙ୍କୁ ଚାକିରି ପ୍ରଲୋଭନ ଦେଖାଇ ସେମାନଙ୍କଠାରୁ ଟଙ୍କା ନେଇଥିବା ଅଭିଯୋଗ ହୋଇଛି । ଝାରପୋଖରିଆ ଥାନା ଅଂଚଳରେ ସନ୍ତୋଷ ମହାନ୍ତି ନାମକ ଜଣେ ଯୁବକଙ୍କୁ ଜେଲ ୱାଡେନ ଚାକିରି କରାଇ ଦେବାକୁ କହି ଦେଢ ଲକ୍ଷ ଟଙ୍କା ଠକି ଥିବା ଜଣାଯାଇଛି । ଏହା ସହିତ ଭଦ୍ରକ ଜିଲ୍ଲା ବାସୁଦେବପୁର ଅଂଚଳରେ କିଛି ଯୁବକଙ୍କୁ ସେ ରିଜର୍ଭ ବ୍ୟାଙ୍କରେ ଚାକିରୀ କରାଇ ଦେବାର ଲୋଭ ଦେଖାଇଥିଲେ । ଅଲେଖ କୁମାର ମାଝୀ ଏବଂ ଅନୀଲ ଜେନାଙ୍କ ନିକଟରୁ ୩୦ ହଜାର ଟଙ୍କା ଲେଖାଏଁ ଠକିଛନ୍ତି । ଏହା ସହିତ ସାରସକଣା ତହସିଲଦାରଙ୍କୁ ଫୋନ କରି ଆଇଏଏସ୍ ଅଫିସର କହି ଧମକ ଦେଇ ଆସୁଥିବା ଜଣାଯାଇଛି । କେବଳ ଏତିକି ନୁହେଁ ଅଭିଯୁକ୍ତ ରଜତ ପଣ୍ଡା ଏକାଧିକ ବିବାହ କରିଥିବା କଥା ସାମ୍ନାକୁ ଆସିଛି । ଭୁବନେଶ୍ବରରେ ସେ ପୂର୍ବରୁ ଗୋଟିଏ ବିବାହ କରିଥିବା ବେଳେ ନିଜକୁ ଆଇଏଏସ୍ ଅଫିସର କହି ଗତ ୨୦ ତାରିଖରେ ଉଦଳା ତାରିଣୀ ମନ୍ଦିରରେ ଦାମୋଦରପୁର ଗାଁର ଜଣେ ଯୁବତୀଙ୍କ ବିବାହ କରିଥିଲେ । ଏବେ ଝାରପୋଖରିଆ ପୋଲିସ୍ ଖୁଂଟା ଥାନାରୁ ନକଲି ଆଇଏଏସ ରଜତ ପଣ୍ଡାଙ୍କୁ ଅଧତ୍କ ପଚରାଉଚରା ପାଇଁ ନେଇଛନ୍ତି ।