ନୂଆଦିଲ୍ଲୀ: ତ୍ରିପୁରା ବିଧାନସଭା ନିର୍ବାଚନରେ ବିଜେପି ପୁଣି ଥରେ ବିପୁଳ ବିଜୟ ହାସଲ କରିପାରେ । ବୁଥ ବାହୁଡା ମତରେ ଏହିପରି ପୂର୍ବାନୁମାନ କରାଯାଇଛି । ସମସ୍ତ ଏକ୍ସଜିଟ୍ ପୋଲରେ ଏହି ସଂକେତ ମିଳିଛି । ଫେବ୍ରୁଆରୀ ୧୬ରେ ୬୦ ବିଧାନସଭା ଆସନରେ ନିର୍ବାଚନ ହୋଇଥିଲା । ଏଥର ନିର୍ବାଚନରେ କଂଗ୍ରେସ ଏବଂ ବାମ ଦଳ ମଧ୍ୟରେ ମେଣ୍ଟ ହୋଇଛି ।
ଆଜ ତକ୍- ଆକ୍ସିସ ମାଇ ଇଣ୍ଡିଆର ସର୍ଭେରେ ବିଜେପି ଏବଂ ଏହାର ସହଯୋଗୀ ଦଳକୁ ୪୫ ପ୍ରତିଶତ ଭୋଟ ମିଳିଛି । ବିଜେପି ୩୬-୪୫ ଆସନରେ ବିଜୟୀ ହୋଇ ସରକାର ଗଠନ କରିପାରେ । କଂଗ୍ରେସ ଏବଂ ବାମ ଦଳ ମେଣ୍ଟକୁ ୬ରୁ ୧୧ ଆସନ ମିଳିପାରେ । ସେହିପରି ତିପରା ମୋଥାକୁ ୯ରୁ ୧୬ ଆସନ ମିଳିବା ନେଇ ପୂର୍ବାନୁମାନ ହୋଇଛି ।
ସେହିପରି ଜି ନ୍ୟୁଜ୍ ମେଟ୍ରିଜ୍ ଏକ୍ସଜିଟ୍ ପୋଲରେ ବିଜେପି ୨୯-୩୬, କଂଗ୍ରେସ+ବାମ ୧୩-୨୧, ତିପରା ମୋଥା ୧୧-୧୬ ଏବଂ ଅନ୍ୟଙ୍କୁ ୦-୩ ଆସନ ମିଳିପାରେ ।
ତ୍ରିପୁରା ବିଧାନସଭାରେ ମୋଟ ୬୦ ଆସନ ରହିଛି । ଗତ ୨୦୧୮ ନିର୍ବାଚନରେ ୩୬ ଆସନରେ ବିଜେପି ବିଜୟୀ ହୋଇଥିଲା ଏବଂ ପ୍ରଥମ ଥର ପାଇଁ ରାଜ୍ୟରେ ସରକାର ଗଠନ କରିଥିଲା । ତତ୍କାଳୀନ ରାଜ୍ୟ ବିଜେପି ଅଧ୍ୟକ୍ଷ ବ୍ଲିପବ ଦେବ ମୁଖ୍ୟମନ୍ତ୍ରୀ ହୋଇଥିଲେ ।
