ଭୁବନେଶ୍ୱର ୧୫/୦୩: ବୁଧବାର ରାଜଧାନୀର ଲୋୟର  ପିଏମଜିଠାରେ ହଜାର ହଜାର ପ୍ରାଥମିକ ଶିକ୍ଷକ ଆନ୍ଦୋଳନ ପାଇଁ ଏକାଠି ହୋଥିଲେ। ୩ ଦଫା ଦାବି ନେଇ ସେମାନେ ସେଠାରେ ବଡ଼ ଧରଣର ବିକ୍ଷୋଭ ପ୍ରଦର୍ଶନ କରିଥାଆନ୍ତେ। କିନ୍ତୁ ପୋଲିସ ଅନୁମତି ନମିଳିବାରୁ ସେମନେ ପ୍ରଦର୍ଶନୀ ପଡ଼ିଆରେ ଧାରଣା ଦେଇଥିଲେ। ଅନ୍ୟପଟେ ଏହାପରେ ଶିକ୍ଷକ ସଂଘର ୧୧ ଜଣିଆ ପ୍ରତିନିଧି ଦଳ ରାଜ୍ୟ ଗଣ ଶିକ୍ଷା ମନ୍ତ୍ରୀ ସମୀର ଦାସଙ୍କ ସହିତ ଆଲୋଚନା କରିଥିଲେ।ଏହି ବୈଠକ ପରେ ମନ୍ତ୍ରୀ ସମୀର ଦାସ ଶିକ୍ଷକଙ୍କ ଦାବିକୁ ନେଇ ଉଚ୍ଚ ସ୍ତରୀୟ କମିଟିରେ ଜଣାଇବେ ବୋଲି କହିଛନ୍ତି। ସେପଟେ ଏହି ଆଲୋଚନାରେ କୌଣସି ନିସ୍କର୍ଷ ନବାହାରିବାରୁ ପ୍ରାଥମିକ ଶିକ୍ଷକ ସଂଘ ୟୁନିଫର୍ମ ବର୍ଜନ କରିବାନେଇ ନିଷ୍ପତ୍ତି ନେଇଛି। କିନ୍ତୁ ଏପରି ନକରିବାକୁ  ଶିକ୍ଷାମନ୍ତ୍ରୀ ଶିକ୍ଷକମାନଙ୍କୁ ଅନୁରୋଧ କରିଛନ୍ତି।

ଖବର ଅନୁସାରେ, ବିଧାନସଭାର ମନ୍ତ୍ରୀଙ୍କ ପ୍ରକୋଷ୍ଟରେ ଶିକ୍ଷକ ସଙ୍ଘ ପକ୍ଷରୁ ୧୧ ଜଣିଆ ପ୍ରତିନିଧି ଦଳ ବିଭାଗୀୟ ମନ୍ତ୍ରୀଙ୍କ ନିକଟରେ ନିଜର ଦାବି ଉପସ୍ଥାପନ କରିଥିଲେ। ଆଲୋଚନା ପରେ ମନ୍ତ୍ରୀ ପ୍ରତିକ୍ରିୟା ଦେଇ କହଛନ୍ତି ଯେ, ‘’ଶିକ୍ଷକମାନଙ୍କ ସହ ଆଲୋଚନା ହେଲା, ପୂର୍ବରୁ  ଉଚ୍ଚ ସ୍ତରୀୟ କମିଟି ସହ ସେମାନଙ୍କ ଆଲୋଚନା ହୋଇଥିଲା। ସେମାନଙ୍କ ଦାବି ଏହି କମିଟିକୁ ପଠାଯିବ। ତାଙ୍କ ଦାବି ନେଇ ଆଲୋଚନା ଜାରି ରହିଛି। ବିଭିନ୍ନ ପର୍ଯ୍ୟାୟରେ ଆହୁରି ଆଲୋଚନା ହେବ। ଆଲୋଚନା ମାଧ୍ୟମରେ ସେମାନଙ୍କର ଦାବି ବିଷୟରେ ସମାଧାନ ହେବ। ଏହା ସହିତ ଶିକ୍ଷକ ସମାଜକୁ ଅନୁରୋଧ ସେମାନେ ଗଣବେଶ (ୟୁନିଫର୍ମ) ବର୍ଜନ କରନ୍ତୁ ନାହିଁ, ଏହି ନିଷ୍ପତ୍ତିରୁ ବିରତ ରୁହନ୍ତୁ’’।

ସୂଚନା ଥାଉକି, ବୁଧବାର ଆନ୍ଦୋଳ କରିବାପାଇଁ ଭୁବନେଶ୍ୱରରେ ହଜାର ହଜାର କନିଷ୍ଠ ଶିକ୍ଷକ ଶିକ୍ଷୟତ୍ରୀ ଏକାଠି ହୋଇଥିଲେ। ଠିକା ନିଯୁକ୍ତି ଉଚ୍ଛେଦ କରିବା, ନୂଆ ପେନସନ ପ୍ରତ୍ୟାହର କରି ପୁରୁଣା ପେନସନ ଲାଗୁ କରିବା, ୬ ବର୍ଷ ଚାକିରି କାଳକୁ ଗଣନା କରିବା ଓ ୬ଟି ଇନକ୍ରିମେଣ୍ଟ ଦେବା ଇତ୍ୟାଦି ସେମାନେ ତାଙ୍କ ଚାକିରି ସମୟରେ ଦାବି କରିଛନ୍ତି।

୨୦୨୨ ଡିସେମ୍ବରରେ ସରକାର ଏହି ଦାବିଗୁଡ଼ିକ ପୂରଣ କରିବାକୁ ଉଚ୍ଚସ୍ତରୀୟ କମିଟି ଗଠନ କରିଥିଲେ। କିନ୍ତୁ ୩ ମାସ ହେଲା ସରକାର ଏହି ଦାବିକୁ ଅଣଦେଖା କରୁଛନ୍ତି, ଲିଖିତ ପ୍ରତିଶୃତି ବି ପାଣିର ଗାର ପାଲଟିଛି ବୋଲି ଆନ୍ଦୋଳନ ପାଇଁ ଆଶିଥିବା ଶିକ୍ଷକ କହିଛନ୍ତି। ତେବେ ପୂର୍ବରୁ ମାର୍ଚ୍ଚ ୧୫ ରେ ବଡ଼ ଧରଣର ବିକ୍ଷୋଭ ପ୍ରଦର୍ଶନ କରିବାକୁ ଅନୁମତି ଶିକ୍ଷକ ସଂଘ ମାଗିଥିଲେ ମଧ୍ୟ ଗତକାଲି ରାତିରେ ପୋଲିସ ଅନୁମତିକୁ ରଦ୍ଦ କରିଛି। ଏନେଇ ତୀବ୍ର ଅସନ୍ତୋଷ କନିଷ୍ଠ ଶିକ୍ଷକ ସଂଘ ପ୍ରକାଶ କରିଛି ।