ନୂଆଦିଲ୍ଲୀ ୧।୫: ଇୟୁରୋପିୟନ ସ୍ପେସ୍ ଏଜେନ୍ସୀ (ଇସା) ଏକ ରିପୋର୍ଟରେ ଏପ୍ରିଲ ୨୯ ତାରିଖ ଦିନ ସାଟେଲାଇଟରୁ ନିଆଯାଇଥିବା ଚିତ୍ରରେ ଉତ୍ତର ଓ ପଶ୍ଚିମ ଭାରତର କେତେକ ଅଞ୍ଚଳରେ ଭୂ-ପୃଷ୍ଠ ତାପମାତ୍ରା (ଲ୍ୟାଣ୍ଡ ସର୍ଫେସ୍ ଟେମ୍ପରେଚର) ୬୦ ଡିଗ୍ରି ସେଲସିୟସରୁ ଅଧିକ ଥିବାର ସୂଚିତ କରିଛନ୍ତି। ଇନସାଟ୍ ୩ଡି, କୋପରନିକସ ସେଣ୍ଟିନଲ-୩ ଓ ନାସାର ଏକ ସାଟେଲାଇଟରୁ ନିଆଯାଇଥିବା ଛବିରୁ ଏହି ଉଚ୍ଚତାପମାତ୍ରା ସମ୍ପର୍କରେ ସୂଚିତ କରାଯାଇଛି।
{"id":622511,"sizeSlug":"full","linkDestination":"none"}ଏଣୁ ବୈଜ୍ଞାନିକମାନେ ହିଟ୍ ୱେଭର ଗୁରୁତର ପରିଣାମ ନେଇ ଚିନ୍ତାବ୍ୟକ୍ତ କରିଛନ୍ତି। ଭାରତୀୟ ପାଣିପାଗ ବିଭାଗ (ଆଇଏମଡି)ଙ୍କ ବୈଜ୍ଞାନିକ ଅସୀମ ମିତ୍ର ଏ ନେଇ ଏକ ଟ୍ୱିଟ୍ କରିଥିବା ବେଳେ ବିଭିନ୍ନ ସାଟେଲାଇଟ୍ ସେନସରରୁ ଭୂ-ପୃଷ୍ଠର ତାପମାତ୍ରା ନୋଟ କରିଥିବା ଉଲ୍ଲେଖ କରିଛନ୍ତି। ଯାହା ସାଧାରଣ ଅବଲୋକନରୁ ମଧ୍ୟ ସହଜରେ ଜଣାପଡିଥାଏ । ତେବେ ସେଦିନ ଅନେକ ସ୍ଥାନରେ ଭୂ-ପୃଷ୍ଠର ତାପମାତ୍ରା ୬୦ ଡିଗ୍ରି ସେଲସିୟସରୁ ଅଧିକ ଥିଲା ବୋଲି ଉଲ୍ଲେଖ କରିଛନ୍ତି।
ସେ କହିଛନ୍ତି ଯେ ଏହି ଋତୁରେ ସାଧାରଣତଃ ଭୂ-ପୃଷ୍ଠର ତାପମାତ୍ରା ୪୫ରୁ ୫୫ ଡିଗ୍ରି ସେଲସିୟସକୁ ପହଞ୍ଚିଥାଏ । ଆଣ୍ଟି ସାଇକ୍ଲୋନିକ ପବନ ଭୂମି ଉପରକୁ ଗରମ ପବନ ପ୍ରବାହ କରୁଥିବା ବେଳେ ଅନେକ ଦିନରୁ ବର୍ଷା ଛାଡିଗଲାଣି। ଏଣୁ ଭୂମି ଶୁଷ୍କ ହୋଇଯାଇଥିବାରୁ ଉପରୁ ସିଧା ସୂର୍ଯ୍ୟକିରଣ ପଡିବା ଭୂ-ପୃଷ୍ଠ ତାପମାତ୍ରା ବୃଦ୍ଧିର କାରଣ ବୋଲି କହିଛନ୍ତି।
{"id":622500,"sizeSlug":"full","linkDestination":"none"}ତେବେ ଆଇଏମଡି ମହାନିର୍ଦ୍ଦେଶକ ମୃତ୍ୟୁଞ୍ଜୟ ମହାପାତ୍ର ଏହାର ସତ୍ୟାପନ କରାଯିବା ଜରୁରି ବୋଲି କହିଛନ୍ତି। ନଚେତ ଏପରି ତଥ୍ୟ ଭୟ ଓ ଆତଙ୍କ ସୃଷ୍ଟି କରିବ । କାରଣ ୬୦ ଡିଗ୍ରି ସେଲସିୟସରେ ସଡ଼କ ଓ ଅନ୍ୟ ଭିତ୍ତିଭୂମି ତରଳିବାର ଅନେକ ସମ୍ଭାବନା ରହିଛି ବୋଲି ସେ କହିଛନ୍ତି। କାରଣ ରାଜସ୍ଥାନରେ ୫୦ ଡିଗ୍ରି ସେଲସିୟସରେ ସଡକ ତରଳିବାର ରେକର୍ଡ ରହିଛି। ଏଣୁ ଏ ବାବଦେ କୌଣସି ତଥ୍ୟ ଦେବା ବେଳେ ଆମକୁ ଅତ୍ୟନ୍ତ ସତର୍କତା ଅବଲମ୍ବନ କରିବା ଦରକାର ବୋଲି କହିଛନ୍ତି।
ଏପ୍ରିଲ ୨୯ ତାରିଖ ସ୍ଥାନୀୟ ସମୟ ପୂର୍ବାହ୍ନ ସାଢେ ୧୦ଟା ବେଳେ ଆକାଶରେ ବାଦଲ ଅନୁପସ୍ଥିତି କାରଣରୁ ଅନେକ ଅଞ୍ଚଳର ଭୂ-ପୃଷ୍ଠ ତାପମାତ୍ରା ୬୦ ଡିଗ୍ରି ସେଲସିୟସକୁ ପହଞ୍ଚିଥିଲା। ଏହି ସମୟରେ ଜୟପୁର ଓ ଅହମ୍ମଦାବାଦରେ ଭୂ-ପୃଷ୍ଠର ତାପମାତ୍ରା ୪୭ ଡିଗ୍ରି ସେଲସିୟସ ପର୍ଯ୍ୟନ୍ତ ରେକର୍ଡ ହୋଇଛି। ତେବେ ଏହି ସମୟରେ ଦକ୍ଷିଣ-ପୂର୍ବ ଓ ଦକ୍ଷିଣ-ପଶ୍ଚିମ ଅହମ୍ମଦାବାଦର ଭୂ-ପୃଷ୍ଠ ତାପମାତ୍ରା ୬୫ ଡିଗ୍ରି ସେଲସିୟସ ପର୍ଯ୍ୟନ୍ତ ପହଞ୍ଚିଥିଲା। ମାର୍ଚ୍ଚ ଓ ଏପ୍ରିଲ ମାସରେ ଅସାଧାରଣ ଭାବେ ଉଚ୍ଚତାପମାତ୍ରା ଜଳବାୟୁ ସଂକଟ ସମ୍ପର୍କିତ । ତେବେ ଭାରତ ଓ ପାକିସ୍ତାନରେ ଅତ୍ୟଧିକ ଗରମ ଲାଗି କେବଳ ଜଳବାୟୁ ପରିବର୍ତ୍ତନକୁ ଦାୟି କରିବା ତରବରିଆ ହେବ ବୋଲି ବିଶେଷଜ୍ଞ କହିଛନ୍ତି।