ନୂଆଦିଲ୍ଲୀ: ତୁର୍କୀ ଏବଂ ସିରିଆରେ ହୋଇଥିବା ୭.୮ ତୀବ୍ରତାର ଶକ୍ତିଶାଳୀ ଭୂକମ୍ପରେ ବର୍ତ୍ତମାନ ସୁଦ୍ଧା ମୃତ୍ୟୁ ସଂଖ୍ୟା ୫୦୦୦ ଟପିଛି । ଏହାରି ଭିତରେ ମଙ୍ଗଳବାର ତୁର୍କୀ ରାଷ୍ଟ୍ରପତି ରିସେପ ତୟିପ ଆର୍ଦୋଗାନ ଦେଶର ଦକ୍ଷିଣପ୍ରାନ୍ତରେ ଥିବା ୧୦ ରାଜ୍ୟରେ ଆସନ୍ତା ତିନି ମାସ ପାଇଁ ଜରୁରୀ ସ୍ଥିତି ଘୋଷଣ କରିଛନ୍ତି । ଉଲ୍ଲେଖଯୋଗ୍ୟ ଯେ ସୋମବାର ଭୋର ସକାଳେ ହୋଇଥିବା ଭୂକମ୍ପରେ ତୁର୍କୀ ଏବଂ ସିରିଆର ଅନେକ ଅଞ୍ଚଳ ଅଧିକ ପ୍ରଭାବିତ ହୋଇଛି ।

ତୁର୍କୀ ରାଷ୍ଟ୍ରପତି ମଙ୍ଗଳବାର କହିଛନ୍ତି ଯେ ପ୍ରଭାବିତ ଅଞ୍ଚଳରେ ଉଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରାଯାଇଛି । ଲୋକଙ୍କ ପାଖରେ ଜରୁରୀ ସାମଗ୍ରୀ ପହଞ୍ଚାଇବା ପାଇଁ ଆବଶ୍ୟକୀୟ ପଦକ୍ଷେପ ଗ୍ରହଣ କରାଯାଉଛି । ସ୍ୱେଚ୍ଛାସେବୀ, ଜରୁରିକାଳୀନ ସେବାର କର୍ମଚାରୀଙ୍କ ଜରିଆରେ ଲୋକଙ୍କ ନିକଟରେ ସମସ୍ତ ପ୍ରକାର ସହାୟତା ପହଞ୍ଚାଇବା ପାଇଁ ପ୍ରୟାସ କରାଯାଉଛି ।

ଦେଶ ଉଦ୍ଦେଶ୍ୟରେ ବାର୍ତ୍ତା ଦେଇ ଏର୍ଦୋଗାନ କହିଛନ୍ତି, ‘ପ୍ରଭାବିତ ଅଞ୍ଚଳରେ ଉଦ୍ଧାର କାର୍ଯ୍ୟ ଏବଂ ଦ୍ରୁତ ପୁନରୁଦ୍ଧାର ପ୍ରକ୍ରିୟା ସୁନିଶ୍ଚିତ କରିବା ପାଇଁ ଆମେ ଜରୁରୀ ସ୍ଥିତି ଲାଗୁ କରିବାକୁ ନିଷ୍ପତ୍ତି ନେଇଛି । ଏହି ନିଷ୍ପତ୍ତିକୁ ଲାଗୁ କରିବା ନେଇ ଥିବା ସମସ୍ତ ସାମ୍ୱିଧାନିକ ପ୍ରକ୍ରିୟାକୁ ଯଥାଶୀଘ୍ର ଶେଷ କରାଯିବ । ଭୂକମ୍ପ ପ୍ରଭାବିତ ଅଞ୍ଚଳରେ ଆସନ୍ତା ତିନି ମାସ ଏହି ଜରୁରୀ ସ୍ଥିତି ଲାଗୁ କରାଯିବ ।’       

ଉଲ୍ଲେଖଯୋଗ୍ୟ ଯେ ଏର୍ଦୋଗାନ ସରକାର ବର୍ତ୍ତମାନ ସମୟରେ ଚାପରେ ରହିଛି । ଭୂକମ୍ପ ପରେ ତୁର୍କୀ ସରକାର ତ୍ୱରିତ ପଦକ୍ଷେପ ନେବାରେ ବିଫଳ ହୋଇଥିବା ନେଇ ଅଭିଯୋଗ ହୋଇଛି । ଅନ୍ୟପଟେ ଏର୍ଦୋଗାନ ସରକାର ଉଦ୍ଧାର କାର୍ଯ୍ୟରେ ୫୦,୦୦୦ ଅତିରିକ୍ତ ସହାୟତା କର୍ମଚାରୀଙ୍କୁ ନିୟୋଜିତ କରିବା ଏବଂ ୫.୩ ବିଲିୟନ ଡଲାର ଆର୍ଥିକ ସହାୟତା ଘୋଷଣା କରିସାରିଛନ୍ତି । ନିଜର ଦୁଇ ଦଶନ୍ଧିର ଶାସନକାଳ ଭିତରେ ଏର୍ଦୋଗାନ ଦେଶରେ ସବୁଠୁ ବଡ଼ ପ୍ରାକୃତିକ ବିପର୍ଯ୍ୟୟର ମୁକାବିଲା କରୁଛନ୍ତି ।