ଲଣ୍ଡନ ୧୫/୭: ଇଲଣ୍ଡ କ୍ରିକେଟର ନୂଆ ବିଶ୍ବ ବିଜେତା । ରୋମାଞ୍ଚକର ଫାଇନାଲରେ ନ୍ୟୁଜିଲାଣ୍ଡକୁ ପରାସ୍ତ କରି ପ୍ରଥମ ଥର ପାଇଁ ବିଶ୍ବକପ୍ ହାତେଇଛି ଇଂଲିଶ ଟିମ୍ । ପ୍ରଥମେ ମ୍ୟାଚ୍ ଓ ପରେ ସୁପରଓଭର ଟାଇ ହେବାରୁ ଶେଷରେ ବାଉଣ୍ଡାରୀ ଆଧାରରେ ଟାଇଟେଲ ଜିତିଛନ୍ତି ମୋର୍ଗାନ୍ ଆଣ୍ଡ କୋ । ଏଥିସହ କ୍ରିକେଟର ସବୁଠୁ ବଡ଼ ମହାକୁମ୍ଭରେ ଯବନିକା ପଡ଼ିଛି ।

କ୍ରିକେଟର ନୂଆ ବାଦଶାହା ହେଲା ଇଂଲଣ୍ଡ । ପ୍ରଥମ ଥର ପାଇଁ ବନିଲା ବିଶ୍ବ ବିଜେତା । କାଣ୍ଟେ କା ଟକ୍କର ମୁକାବିଲାରେ କିୱି ଟିମ୍ ବାଉଣ୍ଡାରୀ ଆଧାରରେ ପରାସ୍ତ କରି ବିଶ୍ବକପ୍ ଟାଇଟେଲ ହାସଲ କରିଛି ଇଂଲିଶ ଟିମ୍ । ପୂର୍ବରୁ ତିନି ଥର ଫାଇନାଲରେ ପହଞ୍ଚି ନିରାଶ ହୋଇଥିଲେ ମଧ୍ୟ ଶେଷରେ କ୍ରିକେଟର ମକ୍କା ଲର୍ଡସ୍ ଷ୍ଟାଡିୟମରେ ଚତୁର୍ଥ ଥରରେ ବାଜି ମାରି ନେଇଛନ୍ତି ମୋର୍ଗାନ୍ ଆଣ୍ଡ କୋ ।

ପୂର୍ବରୁ ଟସ୍ ଜିତି ପ୍ରଥମେ ବ୍ୟାଟିଂ କରିବାର ନିଷ୍ପତ୍ତି ନେଇଥିଲେ ନ୍ୟୁଜିଲାଣ୍ଡ କପ୍ତାନ କେନ୍ ୱିଲିୟମସନ୍ । ତେବେ ଇଂଲିଶ ବୋଲରଙ୍କ ମାପଚୁପ୍ ବୋଲିଂ ଯୋଗୁଁ ନିର୍ଦ୍ଧାରିତ ୫୦ ଓଭରରେ ଦଳ ୮ ୱିକେଟ ହରାଇ ୨୪୧ ରନ୍ କରିବାକୁ ସମର୍ଥ ହୋଇଥିଲା । କିୱି ଟିମ୍ ପକ୍ଷରୁ ଓପନର ହେନେରୀ ନିକୋଲାସ୍ ସର୍ବାଧିକ ୫୫ ରନ୍ କରିଥିବା ବେଳେ ୱିକେଟ୍ କିପର ଟମ୍ ଲାଥମ୍ ୪୭ ରନ୍ କରି ପାଭଲିଅନ ଫେରିଥିଲେ । ସେହିପରି ଇଂଲଣ୍ଡ ଟିମ୍ ପକ୍ଷରୁ କ୍ରିଶ୍ ଓକସ୍ ଓ ଲିଆମ୍ ପ୍ଲଙ୍କେଟ ୩ଟି ଲେଖାଏଁ ୱିକେଟ୍ ନେଇଥିବା ବେଳେ ଆର୍ଚର ଓ ମାର୍କ ଉଡ୍ ଙ୍କୁ ମିଳିଥିଲା ଗୋଟିଏ ଲେଖାଏଁ ୱିକେଟ୍ ।

ପରେ ୨୪୨ ରନର ଟାର୍ଗେଟ୍ ପିଛା କରି ବ୍ୟାଟିଂ ଆରମ୍ଭ କରିଥିବା ଇଂଲଣ୍ଡ ଟିମ୍ ମଧ୍ୟ  ନିର୍ଦ୍ଧାରିତ ୫୦ ଓଭରରେ ୯ ୱିକେଟ୍ ହରାଇ ସମାନ ୨୪୧ ରନ୍ କରିଥିଲା । ବେନ୍ ଷ୍ଟୋକସ୍ ଓ ଜୋଶ ବଟଲରଙ୍କ ଚମତ୍କାର ପାର୍ଟନରସିପ ପାଇଁ ଇଂଲିଶ ଟିମ୍ ୨୪୧ ରନ୍ ରେ ପହଞ୍ଚି ପାରିଥିଲା । ଷ୍ଟୋକସ୍ ସର୍ବାଧିକ ୮୪ ରନ୍ କରି ନଟ୍ ଆଉଟ୍ ଥିବା ବେଳେ ବଟଲର୍ ୫୯ ରନ୍ କରିଥିଲେ । କିୱି ଟିମ୍ ପକ୍ଷରୁ ଲୋକି ଫର୍ଗୁସନ୍ ଓ ଜିମି ନିସମ୍ ୩ଟି ଲେଖାଏଁ ୱିକେଟ୍ ନେଇଥିବା ବେଳେ ମ୍ୟାଟ୍ ହେନେରୀ ଓ କୋଲିନ୍ ଗ୍ରାଣ୍ଡହୋମ୍ ଗୋଟିଏ ୱିକେଟ୍ ହାସଲ କରିଥିଲେ ।

ତେବେ ଏହା ପରେ ହିଁ ଆରମ୍ଭ ହୋଇଥିଲା ଅସଲି ଖେଳ । ମ୍ୟାଚ୍ ଟାଇ ହେବା ପରେ ସୁପର ଓଭର  ଖେଳାଯାଇଥିଲା ।

ଇଲଂଣ୍ଡ ଟିମ୍ ପ୍ରଥମେ ବ୍ୟାଟିଂ କରି ୬ଟି ବଲ୍ ରେ ୧୫ ରନ୍ କରିଥିଲା । ତେବେ ଆଶ୍ଚର୍ଯ୍ୟଜନକ ଭାବେ ନ୍ୟୁଜିଲାଣ୍ଡ ମଧ୍ୟ ସମାନ ୬ଟି ବଲ୍ ଖେଳି ୧୫ ରନ୍ କରିଥିଲା । ତେଣୁ ଶେଷରେ ବାଉଣ୍ଡାରୀ ଆଧାରରେ  ହୋଇଥିଲା ଫାଇନାଲ ଫଇସଲା । ମ୍ୟାଚରେ ଇଂଲଣ୍ଡ ୨୬ଟି ବାଉଣ୍ଡାରୀ ଓ ନ୍ୟୁଜିଲାଣ୍ଡ ୧୮ଟି ବାଉଣ୍ଡାରୀ ସ୍କୋର କରିଥିବାରୁ ଅଧିକ ବାଉଣ୍ଡାରୀ ଆଧାରରେ ପ୍ରଥମ ଥର ପାଇଁ ବିଶ୍ବକପ୍ ବିଜେତା ହୋଇଥିଲା ଇଂଲଣ୍ଡ ।

ଶେଷରେ ଷ୍ଟୋକସ୍ ଙ୍କୁ ମ୍ୟାଚ୍ ୱିନିଂ ଇଂନିସ ପାଇଁ ପ୍ଲେୟାର ଅଫ୍ ଦି ମ୍ୟାଚ୍ ଓ କିୱି କ୍ୟାପଟେନ୍ କେନ୍ ୱିଲିଅନସନଙ୍କୁ ଟୁର୍ଣ୍ଣାମେଣ୍ଟ ସାରା ଭଲ ପ୍ରଦର୍ଶନ ପାଇଁ  ପ୍ଲେୟାର ଅଫ୍ ଦି ସିରିଜ ବିବେଚିତ କରାଯାଇଛି । ଏଥିସହ ଦେଢ ମାସ ଧରି ଚାଲିଥିବା କ୍ରିକେଟର ସର୍ବବୃହତ ଫେଷ୍ଟିଭାଲରେ ପୂର୍ଣ୍ଣଛେଦ ପଡ଼ିଛି ।