ନିଶ୍ଚିନ୍ତକୋଇଲି ୫/୬: ଇଞ୍ଜିନିୟର ଅସିତ ଦାସଙ୍କ ମୃତ୍ୟୁ ମାମଲାକୁ ବିତିଲାଣି ୩ ଦିନ । ତଥାପି ରହସ୍ୟ ଉପରୁ ପରଦା ହଟାଇପାରୁନି ନେମାଳ ଥାନା ପୋଲିସ । କଟକ ନେମାଳ ଥାନା ମଙ୍ଗଳପୁର ଗାଁର ସାରଙ୍ଗଧର ଦାସଙ୍କ ପୁଅ ଅସିତ ପେଶାରେ ଇଞ୍ଜିନୟର । ଗତ ୩ତାରିଖରେ ସେ ବଡ ଭାଇ ରଞ୍ଜିତଙ୍କ ସାଙ୍ଗରେ ନେମାଳ ମାଳିଗଡା ଗାଁକୁ ଯାଇଥିଲେ । ସେଠାରେ ରଞ୍ଜିତ ତାଙ୍କୁ ଛାଡିଦେଇ ଘରକୁ ଚାଲିଆସିଥିଲେ । ଆସିବାର କିଛି ଘଣ୍ଟା ପରେ ରଞ୍ଜିତଙ୍କୁ ଫୋନ ଆସିଲା,ତୁମ ଭାଇ କୂଅରେ ପଡିଯାଇଛି ତୁରନ୍ତ ଆସ । ପରିବାର ଲୋକ ମାଳିଗଡା ଗାଁରେ ପହଞ୍ଚିବା ପରେ ଅସିତଙ୍କ ଅବସ୍ଥା ସାଂଘାତିକ ଥିଲା । ସଙ୍ଗେ ସଙ୍ଗେ ନେମାଳ ପୋଲିସ ସହାୟତାରେ ତାଙ୍କୁ ମେଡିକାଲରେ ଭର୍ତ୍ତି କରାଯାଇଥିଲେ ମଧ୍ୟ ସେଠାରେ ଡାକ୍ତର ମୃତ ଘୋଷଣା କରିଥିଲେ ।
ପରିବାର ଲୋକଙ୍କ ଅଭିଯୋଗ ପୁଅକୁ ହତ୍ୟା କରି କୂଅରେ କିଏ ଫିଙ୍ଗି ଦେଇଛି । ଅଭିଯୋଗ ଆଧାରରେ ପୋଲିସ ହତ୍ୟା ମାମଲା ରୁଜୁ କରି ଛାନଭିନ ଚଳାଇଥିଲେ ମଧ୍ୟ ଏଯାଏ ଅସିତଙ୍କ ମୃତ୍ୟୁ କେମିତି ହେଲା ସ୍ପଷ୍ଟ ହୋଇପାରିନି । ତେବେ ଏଠାରେ ପ୍ରଶ୍ନ ଉଠୁଛି ପରିତ୍ୟକ୍ତ କୂଅରେ କେମିତି ପଡିଲେ ଅସିତ ? ନା ତାଙ୍କୁ କିଏ ଜାଣିଶୁଣି ଠେଲି ଦେଇଛି । ପୁଅର ହତ୍ୟାକାରୀକୁ ତୁରନ୍ତ ଗିରଫ କରିବାକୁ ଦାବି କରିଛନ୍ତି ପରିବାର ଲୋକ ।
