ବଡବିଲ ୧୫।୩: କେନ୍ଦୁଝର ଜିଲ୍ଲା ଯୋଡ଼ା ସହରରେ ହାତୀ ଆତଙ୍କ । ମଙ୍ଗଳବାର ବିଳମ୍ବିତ ରାତି ପ୍ରାୟ ଦେଢଟା ସମୟରେ ଯୋଡା ପୌରାଞ୍ଚଳର ୱାର୍ଡ ନଂ ୬, ରମଜାନ ହଟିଂ ଅଞ୍ଚଳରେ ୧୦ ଟିକିଆ ହାତୀପଲ ପଶି ଆତଙ୍କ ସୃଷ୍ଟି କରିଥିଲେ । ରାମଚନ୍ଦ୍ର ପିଙ୍ଗୁଆଙ୍କ ଗୋଟିଏ ଘର ଭାଙ୍ଗିବା ସହିତ ରେଳ ଧାରଣା ନିକଟରେ ଥିବା ଟାଟା ଷ୍ଟିଲର ପାଚେରୀ ଓ ଅନ୍ୟ ଜଣେ ବ୍ୟକ୍ତିଙ୍କ ପାଚେରୀ ଭାଙ୍ଗିଦେଇଥିଲେ ହାତୀ ପଲ । ତେବେ ଘର ଭାଙ୍ଗିବା ସମୟରେ ରାମଚନ୍ଦ୍ର ପିଙ୍ଗୁଆ ନିଜ ଦୁଇ ପୁଅ ଓ ତିନି ଝିଅଙ୍କ ସହ ବାହାରକୁ ପଳାଇ ନିଜର ଜୀବନ ବଞ୍ଚାଇଥିଲେ ।

ଏନେଇ ତୁରନ୍ତ ବନ ବିଭାଗକୁ ଖବର ଦିଆଯିବା ପରେ ବନ ବିଭାଗ କର୍ମଚାରୀ ସେଠାରେ ପହଞ୍ଚି ଲୋକଙ୍କ ସହାୟତାରେ ହାତୀ ପଲଙ୍କୁ ଘଉଡାଇବାରେ ସକ୍ଷମ ହୋଇଥିଲେ । ଏବେ ହାତୀ ପଲ ନିକଟସ୍ଥ ଚମ୍ପୁଆ ରେଞ୍ଜ, ଝରଣ ଜଙ୍ଗଲରେ ଥିବା ବନ ବିଭାଗ ସୂଚନା ଦେଇଛି । ମୋଟ୍ ୨୪ଟି ହାତୀ ଝରଣ ଓ ଆଖପାଖ ଅଞ୍ଚଳରେ ବେଶ୍ କିଛି ଦିନ ଧରି ରହୁଥିବା ବେଳେ, ଗତ ରାତିରେ ଡଡୁଆଁ ଦେଇ ରେଳ ଧାରଣା ପାରକରି ଯୋଡା ପୌରାଞ୍ଚଳ ଭିତରକୁ ପ୍ରବେଶ କରିଥିଲେ । ଏହି ଘଟଣା ପରେ ଲୋକେ ଭୟଭୀତ ହୋଇପଡିଛନ୍ତି ।