ନୂଆଦିଲ୍ଲୀ ୨୪।୨: ଆଗାମୀ ଲୋକସଭା ନିର୍ବାଚନକୁ ଦୃଷ୍ଟିରେ ରଖି ଅଧିକାରୀଙ୍କ ଟ୍ରାନ୍ସଫର ଓ ପୋଷ୍ଟିଂକୁ ନେଇ ନିର୍ବାଚନ ଆୟୋଗ ବଡ଼ ପଦକ୍ଷେପ ଗ୍ରହଣ କରିଛନ୍ତି। ନିର୍ବାଚନ ଆୟୋଗ ସବୁ ରାଜ୍ୟ ସରକାରମାନଙ୍କୁ ଏହା ସୁନିଶ୍ଚିତ କରିବାକୁ କହିଛନ୍ତି ଯେ ଯେଉଁ ଅଧିକାରୀମାନେ ୩ ବର୍ଷ ପୂରଣ କରିବା ପରେ ଜିଲ୍ଲାରୁ ବାହାରକୁ ସ୍ଥାନାନ୍ତରିତ  ହୋଇଛନ୍ତି ସେମାନେ ଯେପରି ସେହି ଲୋକସଭା ନିର୍ବାଚନମଣ୍ଡଳିର ଜିଲ୍ଲାରେ ଅବସ୍ଥାପିତ ନହୁଅନ୍ତି।

ବର୍ତ୍ତମାନ ନିର୍ଦ୍ଦେଶରେ ଥିବା ତ୍ରୁଟି ସୁଧାର କରି ଆୟୋଗ ନିର୍ଦ୍ଦେଶ ଦେଇଛନ୍ତି ଯେ ସେହି ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶ ଯେଉଁଠାରେ ଦୁଇଟି ସଂସଦୀୟ ନିର୍ବାଚନ ମଣ୍ଡଳି ରହିଛି ସେମାନଙ୍କୁ ଛାଡି ଅନ୍ୟ ରାଜ୍ୟ ସରକାରମାନେ ଏହା ସୁନିଶ୍ଚିତ କରନ୍ତୁ ଯେଉଁ ଅଧିକାରୀଙ୍କୁ ଜିଲ୍ଲାରୁ ବାହାରକୁ ସ୍ଥାନାନ୍ତରିତ କରାଯାଇଛି ସେମାନେ ଯେପରି ସେହି ସଂସଦୀୟ କ୍ଷେତ୍ରରେ ଅବସ୍ଥାପିତ ନ ଥାନ୍ତି।

{"id":913141,"sizeSlug":"large","linkDestination":"none"}

ଉଲ୍ଲେଖଯୋଗ୍ୟ ଯେ ନିର୍ବାଚନ ଆୟୋଗଙ୍କ ନୀତି ଅନୁସାରେ ସେହି ସବୁ ଅଧିକାରୀମାନଙ୍କୁ ଟ୍ରାନ୍ସ ଫର କରାଯାଇଛି ଯେଉଁମାନେ ହୁଏତ ସେମାନଙ୍କ ଗୃହ ଜିଲ୍ଲାରେ ଅବସ୍ଥାପିତ ଥିଲେ ଅଥବା ଗୋଟିଏ ସ୍ଥାନରେ ୩ ବର୍ଷ ପୂରଣ କରିଛନ୍ତି। ଏଥିରେ ସେହି ଅଧିକାରୀମାନେ ମଧ୍ୟ ସାମିଲ ଅଛନ୍ତି ଯେଉଁମାନେ ସିଧା ଅଥବା ପର୍ଯ୍ୟବେକ୍ଷକ କ୍ଷମତାରେ କୌଣସି ପ୍ରକାରେ ନିର୍ବାଚନ କାର୍ଯ୍ୟ ସହିତ ସମ୍ପୃକ୍ତ।

ନିର୍ବାଚନରେ ଯେପରି କୌଣସି ପ୍ରକାରର ବାଧା ଉତ୍ପନ୍ନ ନ ହୁଏ ସେଥି ପାଇଁ ନିର୍ବାଚନ କମିଶନ ଜିରୋ ଟୋଲେରାନ୍ସ ନୀତି ଅବଲମ୍ବନ କରୁଛନ୍ତି। ଉଲ୍ଲେଖଯୋଗ୍ୟ ଯେ ନିକଟରେ ସମ୍ପନ୍ନ ହୋଇଥିବା ୫ ରାଜ୍ୟଙ୍କ ବିଧାନସଭା ନିର୍ବାଚନରେ ଆୟୋଗ ବିଭିନ୍ନ ଅଧିକାରୀ, ଏପରିକି ରାଜ୍ୟରେ ବରିଷ୍ଠ ପଦପଦବୀରେ ଅବସ୍ଥାପିତ ପୋଲିସ ଅଧିକାରୀଙ୍କୁ ଟ୍ରାନ୍ସଫର ଆଦେଶ ଦେଇଥିଲେ। ଆଗାମୀ ଲୋକସଭା ନିର୍ବାଚନକୁ ଦୃଷ୍ଟିରେ ରଖି ଓ ନିର୍ବାଚନକୁ ନିରପେକ୍ଷ କରିବା ପାଇଁ ନିର୍ବାଚନ ଆୟୋଗଙ୍କ ପକ୍ଷରୁ ନିଆଯାଉଥିବା ପଦକ୍ଷେପରେ ଏହାକୁ ସବୁଠୁ ବଡ଼ ପଦକ୍ଷେପ ମନେ କରାଯାଉଛି।