ନୂଆଦିଲ୍ଲୀ: ତୁର୍କୀ ଏବଂ ସିରିଆରେ ସୋମବାର ଭୋର ୪ଟାରେ ହୋଇଥିବା ଭୂକମ୍ପରେ ମୃତକଙ୍କ ସଂଖ୍ୟା ବର୍ତ୍ତମାନ ସୁଦ୍ଧା ୧୧୦୦୦ ଟପି ସାରିଛି । ୨୦ ହଜାରରୁ ଅଧିକ ଲୋକ ଆହତ ଥିବା କୁହାଯାଉଛି । ତୁର୍କୀରେ ହୋଇଥିବା ଭୂକମ୍ପରେ ହଜାର ହଜାର ବିଲ୍ଡିଂ ଧ୍ୱଂସ ହୋଇଯାଇଛି । ଭଗ୍ନାବଶେଷ ତଳେ ଏବେ ବି ଅନେକ ଜୀବନ ଫଶି ରହିଛି । ତେବେ ତୁର୍କୀରେ ଭୂକମ୍ପ ହେବା ଏକ ସାଧାରଣ ଘଟଣା ବୋଲି କୁହାଯାଏ, ଅନେକ ଥର ଏଠାରେ ଗୋଟିଏ ବର୍ଷ ଭିତରେ ହିଁ ହଜାର ହଜାର ଥର ଭୂକମ୍ପର ଝଟକା ଅନୁଭବ କରାଯାଇଛି ।

୨୦୨୦ରେ ୩୩୦୦୦ରୁ ଅଧିକ ଥର ଥରିଛି ଭୂମି

ତୁର୍କୀରେ ନିୟମିତ ସମୟ ବ୍ୟବଧାନରେ ଭୂକମ୍ପର ଝଟକା ଅନୁଭବ ହୋଇଥାଏ, ତେଣୁ ଏହି ଅଞ୍ଚଳକୁ ଭୂକମ୍ପର ସବୁଠୁ ବିପଦଜ୍ଜନକ ସ୍ଥାନ ମଧ୍ୟରେ ଗଣାଯାଏ । ତୁର୍କୀର ବିପର୍ଯ୍ୟୟ ଏବଂ ଜରୁରିକାଳୀନ ପ୍ରାଧିକରଣ (ଏଏଫଏଡି)ର ଡାଟା ଅନୁସାରେ କେବଳ ୨୦୨୦ ମସିହାରେ ୩୩,୦୦୦ରୁ ଅଧିକ ଭୂକମ୍ପ ଘଟଣା ରକେର୍ଡ କରାଯାଇଛି । ଏଥିରୁ ୩୨୨ ଭୂକମ୍ପର ତୀବ୍ରତା ୪.୦ ରହିଥିଲା ।

ଗତ ବର୍ଷ ମଧ୍ୟ ଦୁନିଆରେ ଘଟିଥିବା ତିନି ବଡ଼ ଭୂକମ୍ପ ତୁର୍କୀ ଅଖାପାଖ ଅଞ୍ଚଳରେ ହୋଇଥିଲା । ଜାନୁଆରୀରେ ପୂର୍ବ ଉଲେଡୁହରେ ୪୧ ଜଣଙ୍କ ମୃତ୍ୟୁ ହୋଇଥିଲା । ସେହି ବର୍ଷ ଅକ୍ଟୋବରରେ ପଶ୍ଚିମ ଇଜମିରରେ ୬.୬ ତୀବ୍ରତାର ଭୂକମ୍ପ ହୋଇଥିଲା, ଏଥିରେ ୧୧୭ ଜଣଙ୍କ ମୃତ୍ୟୁ ହୋଇଥିଲା । ତୁର୍କୀରେ ୧୯୩୯ ମସିହାରେ ମଧ୍ୟ ୭.୮ ତୀବ୍ରତାର ଭୂକମ୍ପ ହୋଇଥିଲା, ଏଥିରେ ୩୨ ହଜାରରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା ।

ତୁର୍କୀରେ ବାରମ୍ୱାର ଭୂକମ୍ପ ଆସିବା ପଛର କାରଣ ହେଉଛି ଟେକ୍ଟୋନିକ୍ ପ୍ଲେଟ୍ସ । ପ୍ରାୟ ୮ କୋଟି ଜନସଂଖ୍ୟା ଥିବା ଦେଶ ୪ଟି ଟେକ୍ଟୋନିକ ପ୍ଲେଟ୍ ଉପରେ ରହିଛି, ଏଥିରୁ ଗୋଟିଏର ପ୍ଲେଟର ଚଳନ ଦ୍ୱାରା ପୂରା ଅଞ୍ଚଳରେ ଝଟକା ଅନୁଭୂତ ହୋଇଥାଏ । ତୁର୍କୀର ସବୁଠୁ ବଡ଼ ଭାଗ ଏନାଟୋଲିୟନ ପ୍ଲେଟ୍ ଉପରେ ରହିଛି, ଯାହା ଦୁଇଟି ପ୍ରମୁଖ ପ୍ଲେଟ୍, ୟୁରେସିୟନ ଏବଂ ଆଫ୍ରିକି ଏବଂ ଏକ ଛୋଟିଆ ଆରେବିୟନ ମଧ୍ୟରେ ରହିଛି । ଆଫ୍ରିକି ଏବଂ ଅରବ ପ୍ଲେଟ୍ ସିଫ୍ଟ ହେବା ସମୟରେ ତୁର୍କୀ ଥରିଥାଏ ।