କଟକ ୨୫/୦୯: କଟକି ଦଶହରାର ସ୍ବତନ୍ତ୍ରତା ପଛରେ ରହିଛି ଚାନ୍ଦିର ଚମକ । ସୁଉଚ୍ଚ ଓ ସୁନ୍ଦର ମୃଣ୍ମୟ ପ୍ରତିମା ସହିତ, ଯେବେ ପୁଜା ମଣ୍ତପରେ ଚାନ୍ଦିମେଢ଼ ଶୋଭାପାଏ , ତେବେ ଦେଖଣାହାରୀ ମନ୍ତ୍ରମୁଗ୍ଧ ହୋଇଯିବାଟା ସ୍ୱାଭାବିକ । ଏମିତିରେ କଟକି ତାରକସି କାମ, ବିଶ୍ୱ ପ୍ରସିଦ୍ଧ । ପୁଣି କଟକର ଦଶହରାର ରହିଛି ସ୍ୱତନ୍ତ୍ର ପରିଚୟ । ତେଣୁ ଚଳିତ ବର୍ଷ ପୁଜାକୁ ଆହୁରି ରୋମାଞ୍ଚକର କରିବାଲାଗି ପ୍ରସ୍ତୁତ ହେଉଛି ୩ ଟି ନୂଆ ଚାନ୍ଦିମେଢ ।

ଚାନ୍ଦିମେଢର ପ୍ରତିଯୋଗିତାରେ ଏଥର ସାମିଲ ହେବାକୁ ଯାଉଛି କାଫ୍ଲା ବଜାର । ଯେଉଁ ମେଢର ନିର୍ମାଣ କାର୍ଯ୍ୟ ଏବେ ସରିବା ଉପରେ । ଚଳିତ ବର୍ଷ କଟକି ଦଶହରାରେ ସାମିଲ ହେବ ଆଉ ୩ ଟି ଚାନ୍ଦିର ମେଢ । ଯାହାକୁ ପ୍ରସ୍ତୁତି ପର୍ବରେ ଲାଗିଛନ୍ତି ଚାନ୍ଦି କାରିଗର ମାନେ । ପ୍ରାୟ ୭୦ କେଜିର ରୂପାରେ ପ୍ରସ୍ତୁତ ହେବାକୁ ଯାଉଛି ,କାଫ୍ଲା ବଜାର ପୁଜା ମଣ୍ତପର ଚାନ୍ଦିମେଢ ।

ଯାହାକୁ ପୂର୍ଣ୍ଣାଙ୍ଗ ରୂପ ଦେବାଲାଗି ,୧୦ ରୁ ଉର୍ଦ୍ଧ କାରିଗର ଦିନରାତି ଏକ କରିଦେଇଛନ୍ତି । ଶେଖ୍‌ ବଜାରରେ ଥିବା ଏହି ତାରକସି କାରଖାନାରେ ଏବେ ନିର୍ମାଣ ଚାଲିଛି କାଫଲାବଜାର ପୁଜା ମଣ୍ତପର ଚାନ୍ଦିମେଢ । ନିର୍ମାଣ ସରିଯାଇଥିବା ପାଖୁଡା , କଲିଆ , ପିଣ୍ତି ଏବଂ ମୁକୁଟ ଆଦିକୁ ୪ ରୁ ୫ ଥର ସଫେଇ କଲାପରେ ଯାଇ , ଏହାର ଅସଲ ଚମକ ଆସିବ । ତେବେ ସାଧାରଣ ଲୋକେ ବୁଝିପାରିବେନେହିଁ, ଯେ ଗୋଟିଏ ଚାନ୍ଦିମେଢକୁ ପ୍ରସ୍ତୁତ କରିବାଲାଗି କାରଗର ମାନଙ୍କୁ କେତେ ପରିଶ୍ରମ କରିବାକୁ ପଡେ ।

ମୁଖ୍ୟ କାରିଗର କୁହଁନ୍ତି, ଏଥିଲାଗି ସର୍ବନିମ୍ନ ୬ ମାସର ପରିଶ୍ରମ କରିବାକୁ ହୁଏ। ସ୍ଥଳ ବିଶେଷରେ ଗୋଟିଏ ମେଢର କାମ ସାରିବାକୁ ବର୍ଷେବି ଲାଗିଯାଏ । କେବଳ ଚାନ୍ଦିର କାମ ନୁହେଁ , ସୁନାଭଳି ମୂଲ୍ୟବାନ ଧାତୁରେ ମଧ୍ୟ କଟକର କାରିଗର ମାନେ ତାରକଶିର ଝଲକ ଠାଡିଛନ୍ତି । ଚଳିତ ବର୍ଷ କଟକର ଚାଉଳିଆଗଞ ପୁଜା କମିଟି କେତୋଟି ନୂଆ ସୁନା ମୁକୁଟ କରିବାକୁ ଲକ୍ଷ ରଖିଛି । ଯାହାର ନିର୍ମାଣ କମ ମଧ୍ୟ ଏଠାରେ ଚାଲିଛି ।