ସୂର୍ଯ୍ୟକୁମାର ଯାଦବଙ୍କ ସମର୍ଥନରେ କୋଚ୍ ଦ୍ରାବିଡ୍, କହିଲେ- ସେ ଏବେ ଦିନିକିଆ ଖେଳ ଶିଖୁଛନ୍ତି…
22/03/2023 at 11:28 AM
ମୁମ୍ବାଇ ୨୨।୦୩ : ଦିନିକିଆରେ ଲଗାତର ଫ୍ଲପ୍ ହେଉଛନ୍ତି ସୂର୍ଯ୍ୟକୁମାର ଯାଦବ । ଅଷ୍ଟ୍ରେଲିଆ ବିପକ୍ଷ ଦିନିକିଆ ସିରିଜ୍ରେ ଏବେ ଯାଏଁ ନିଜର ଖାତା ଖୋଲିପାରିନାହାନ୍ତି ସୂର୍ଯ୍ୟକୁମାର । ଏଭଳି ସମୟରେ କୋଚ ରାହୁଲ ଦ୍ରାବିଡ୍ ସୂର୍ଯ୍ୟକୁମାର ଯାଦବଙ୍କ ସମର୍ଥନରେ ବାହାରିଛନ୍ତି ।
ସେ କହିଛନ୍ତି ଯେ, ସୂର୍ଯ୍ୟକୁମାର ଯାଦବ ଏବେ ୫୦ ଓଭର ଖେଳ ଶିଖୁଛନ୍ତି । ତାଙ୍କ ବିଷୟରେ ଆମେ ଅଧିକ ଚିନ୍ତିତ ହେଉନାହୁଁ । ବୋଲରଙ୍କ ଭଲ ବଲ୍ ସେ ଆଉଟ୍ ହୋଇଛନ୍ତି । ଟି-୨୦ରେ ସେ ଜଣେ ଭିନ୍ନ ଖେଳାଳି । ୧୦ ବର୍ଷ ଧରି ଟି-୨୦ (ଆଇପିଏଲ୍) ଖେଳି ଆସୁଛନ୍ତି । ଟି-୨୦ କ୍ରିକେଟ୍ରେ ପ୍ରେସର ସମୟରେ ସୂର୍ଯ୍ୟକୁମାର ଯାଦବ ଭଲ ଖେଳିଥାନ୍ତି । ସେ ଟି-୨୦ କ୍ରିକେଟ୍ ଖେଳୁଥିଲେ ବି ଦିନିକିଆରେ ତାଙ୍କୁ ସମୟ ଲାଗିବ । ତାଙ୍କୁ ଆଉ କିଛି ସମୟରେ ଦେବାକୁ ପଡିବ । ଭବିଷ୍ୟତରେ ସୂର୍ଯ୍ୟକୁମାର ଯାଦବ ନିଶ୍ଚିତ ଭାବେ ଭଲ ପ୍ରଦର୍ଶନ କରିବେ ।
ସୂଚନାଯୋଗ୍ୟ ଯେ, ବୁଧବାର ଦିନ ଚେନ୍ନାଇର ଚିଦାମ୍ବରମ୍ ଷ୍ଟାଡିୟମରେ ଭାରତ-ଅଷ୍ଟ୍ରେଲିଆ ମଧ୍ୟରେ ତୃତୀୟ ଦିନିକିଆ ମ୍ୟାଚ୍ ଖେଳାଯିବ । ଶେଷ ମ୍ୟାଚ୍କୁ ଜିତି ଉଭୟ ଦଳ ସିରିଜ୍ କବଜା ଲକ୍ଷ୍ୟରେ ରହିଛନ୍ତି । ଟିମ୍ ଇଣ୍ଡିଆରେ ଗତ ୪ ବର୍ଷ ହେଲା ଚେନ୍ନାଇରେ କୌଣସି ମ୍ୟାଚ୍ ହାରିନଥିବାରୁ ଆଜିର ମ୍ୟାଚ୍ ରୋମାଞ୍ଚକର ହେବ ବୋଲି କ୍ରିକେଟ୍ ପ୍ରେମୀ ଆଶା ରଖିଛନ୍ତି ।
ସମ୍ଭାବ୍ୟ ଦଳ
ଭାରତ : ରୋହିତ ଶର୍ମା(ଅଧିନାୟକ), ଶୁଭମନ ଗିଲ୍, ବିରାଟ କୋହଲି, ସୂର୍ଯ୍ୟକୁମାର ଯାଦବ, କେ ଏଲ ରାହୁଲ, ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡେଜା, ୱାସିଂଟନ ସୁନ୍ଦର/ ସର୍ଦୁଲ ଠାକୁର, କୁଲଦୀପ ଯାଦବ, ମହମ୍ମଦ ସିରାଜ, ମହମ୍ମଦ ସାମି ।
ଅଷ୍ଟ୍ରେଲିଆ : ଟ୍ରେଭିସ ହେଡ୍, ମିଚେଲ ମାର୍ଶ, ଷ୍ଟିଭେନ ସ୍ମିଥ୍(ଅଧିନାୟକ), ମାର୍ନସ ଲାବୁସାନ, ଆଲେକ୍ସ କ୍ୟାରୀ, କାମେରନ ଗ୍ରୀନ, ଗ୍ଲେନ ମ୍ୟାକ୍ସୱେଲ୍, ମାର୍କସ ଷ୍ଟଇନିସ, ସିନ ଆବୋଟ, ମିଚେଲ ଷ୍ଟାର୍କ, ଆଡାମ ଜାମ୍ପା ।
