ନୂଆଦିଲ୍ଲୀ: ଆମେରିକା ବାଚସ୍ପତି ନାନ୍ସି ପେଲୋସିଙ୍କ ଯାତ୍ରା ପରେ ଚୀନ ଏବଂ ତାଇଓ୍ଵାନ ମଧ୍ୟରେ ଉତ୍ତେଜନା ବଢିବାରେ ଲାଗିଛି। ପେଲୋସିଙ୍କ ଯାତ୍ରାରେ ବିଳିବିଳେଇ ହେଉଥିବା ଚୀନ ତାଇଓ୍ଵାନ ଆଖପାଖ ଅଞ୍ଚଳରେ ଯୁଦ୍ଧାଭ୍ୟାସ୍କୁ ତୀବ୍ର କରିଛି। ତାଇଓ୍ଵାନ ଆଖପାଖରେ ଚୀନ ୧୦୦ରୁ ଅଧିକ ଯୁଦ୍ଧ ବିମାନ ମୁତୟନ କରିଛି। ଏଥିସହ ନୂତନ ପିଢିର ଆକାଶରେ ଇନ୍ଧନ ଭରୁଥିବା ଓ୍ଵାଇୟୁ-୨୦ ବିମାନ ମୁତୟନ କରିଛି।
ତାଇଓ୍ଵାନ ନିକଟରେ ଡ୍ରାଗନର ଗତିବିଧିକୁ ଦୃଷ୍ଟିରେ ରଖି ଆମେରିକା, ଅଷ୍ଟ୍ରେଲିଆ ଏବଂ ଜାପାନ ଚୀନକୁ ନିଜର ସମରାଭ୍ୟାସ୍ ବନ୍ଦ କରିବାକୁ ଅପିଲ୍ କରିଛନ୍ତି। ଚୀନର ସରକାରୀ ମିଡିଆ ଗ୍ଲୋବାଇ ଟାଇମ୍ସ ପକ୍ଷରୁ ହୋଇଥିବା ଟୁଇଟ୍ରେ ଏହା ଜଣାଇବାକୁ ଉଦ୍ୟମ କରାଯାଇଛି ଯେ, କେମିତି ଚୀନ ସେନା ତାଇଓ୍ଵାନକୁ ଘେରୁଛି।
ତାଇଓ୍ଵାନ ସହିତ ଉତ୍ତେଜନା ମଧ୍ୟରେ ଚୀନ ପକ୍ଷରୁ ଜାରି ଭିଡିଓର ମୁଖ୍ୟ ଏଜେଣ୍ଡା ଚୀନ ସୈନିକ କେତେ ଶକ୍ତିଶାଳୀ। ଯୁଦ୍ଧ ବିମାନଠୁ ନେଇ ନୁତନ ପିଢିର ବିମାନକୁ ସାମିଲ୍ କରି ଚୀନ ତାଇଓ୍ଵାନକୁ ଚେତାବନୀ ଦେବାକୁ ଚେଷ୍ଟା କରୁଛି। ତାଇଓ୍ଵାନ ନିଜର ବୋଲି ଚୀନ କେବେଠୁ ଦାବି କରି ଆସୁଛି।
ଚୀନ ମୁତାବକ, ତାଇଓ୍ଵାନ ଆଖପାଖ ଅଞ୍ଚଳର ଛଅଟି କ୍ଷେତ୍ରରେ ତାର ଯୁଦ୍ଧ ବିମାନ, ନୌସେନା ଜାହାଜ ଏବଂ ମିସାଇଲ୍ ଯୁଦ୍ଧାସ୍ତ୍ର ସହ ଯୁଦ୍ଧାଭ୍ୟାସ୍ ଆରମ୍ଭ କରି ଦେଇଛି। ଚୀନର ଯୁଦ୍ଧ ଜାହାଜ ଦ୍ଵୀପ କୂଳରୁ ୨୦ କିଲୋମିଟର ଦୂରରେ ରହିଛି, ଯାହା ସମ୍ଭାବିତ ତାଇଓ୍ଵାନ ଜଳକ୍ଷେତ୍ରର ଉଲ୍ଲଂଘନ କରୁଛି।
