ଗଜପତି ୧୭/୦୩: ଗଜପତି ଜିଲା ପାରଳାଖେମୁଣ୍ଡି ସାମୁଟିଆ ସାହିରେ ଯୌତୁକ ଜନିତ ବଧୁ ହତ୍ୟା ଭଳି ଘଟଣା ସାମ୍ନାକୁ ଆସିଛି । ସାମୁଟିଆ ସାହିର ସନ୍ତୋଷ ସାହୁଙ୍କ ଘରେ ତାଙ୍କ ପତ୍ନୀ ଜ୍ୟୋତି ସାହୁଙ୍କ ମୃତଦେହ ଝୁଲନ୍ତା ଅବସ୍ଥାରେ ଉଦ୍ଧାର ହୋଇଥିଲା । ଏହାପରେ ସନ୍ତୋଷ ପାରଳାଖେମୁଣ୍ଡି ପୋଲିସକୁ ଜଣାଇଥିଲେ । ପରେ ଜ୍ୟୋତିଙ୍କ ପରିବାର ଲୋକଙ୍କୁ ଜଣାଇଥିଲେ ।
ଜ୍ୟୋତିଙ୍କ ପରିବାର ଲୋକେ ରାଉରକେଲାରେ ରହୁଥିବା ହେତୁ ଗୁରୁବାର ବିଳମ୍ବିତ ରାତିରେ ପହଞ୍ଚି ଝିଅର ଅବସ୍ଥା ଦେଖିବା ସହ ପାରଳାଖେମୁଣ୍ଡି ଥାନାରେ ସନ୍ତୋଷ ,ତାଙ୍କ ପିତାମାତା ଓ ସାନ ଭାଇ ବିରୋଧରେ ଅଭିଯୋଗ କରିଥିଲେ । ଅଭିଯୋଗ ଅନୁଯାୟୀ ବାରମ୍ବାର ଟଙ୍କା ମାଗିବା,ଏବଂ ଅନେକ ସମୟରେ ମାଡ଼ମାରି ଗାଳିଗୁଲଜ କରିବା ଭଳି ଅଭିଯୋଗ ଥିଲା । ଏହା ଏକ ଯୌତୁକ ଜନିତ ହତ୍ୟା ହୋଇଥିବା ଅଭିଯୋଗ କରି ମାମଲା ଦାଏର ହୋଇଛି । ସକାଳୁ ପୋଲିସ ଓ ସାଇଣ୍ଟିଫିକ ଟିମ ମାଜିଷ୍ଟ୍ରେଟଙ୍କ ଉପସ୍ଥିତରେ ଜ୍ୟୋତିଙ୍କ ମର ଶରୀରକୁ ଉଦ୍ଧାର କରାଯାଇଛି ।
ଜ୍ୟୋତିଙ୍କ ପରିବାର ଲୋକଙ୍କ ଅଭିଯୋଗ କ୍ରମେ ଯୌତୁକ ଜନିତ ହତ୍ୟାକାଣ୍ଡ ରେ ମାମଲା ରୁଜୁ କରି ପୋଲିସ ତଦନ୍ତ ଆରମ୍ଭ କରିଛି । ତେବେ ସାହିପଡ଼ିଶା ଲୋକଙ୍କ କହିବା ହେଲା ୨୦୧୭ ରୁ ତାଙ୍କର ବିବାହ ହୋଇଥିଲା । କିନ୍ତୁ କେବେ ସ୍ୱାମୀ ସ୍ତ୍ରୀଙ୍କ ମଧ୍ୟରେ ଝଗଡା ହେବ କେବେ ଦେଖି ନାହାନ୍ତି କି ଶୁଣିନାହାନ୍ତି ।
