ଓ୍ବାଶିଂଟନ୍ ୫।୧୧: ଆମେରିକା ରାଷ୍ଟ୍ରପତି ନିର୍ବାଚନ ଭୋଟ୍ ଗଣତି ଜାରି ରହିଛି । ନିର୍ବାଚନ ଜିତିବା ପାଇଁ ଆଉ ମାତ୍ର ୬ଟି ଇଲେକ୍ଟୋରାଲ ଭୋଟ୍ ଦୂରରେ ଅଛନ୍ତି ଡେମୋକ୍ରାଟିକ୍ ପ୍ରାର୍ଥୀ ଜୋ ବିଡେନ୍ । ବିଡେନ୍ ଙ୍କୁ ଏ ପର୍ଯ୍ୟନ୍ତ ୨୬୪ଟି ଇଲେକ୍ଟୋରାଲ ଭୋଟ୍ ମିଳିଥିବା ବେଳେ ରିପବ୍ଲିକାନ୍ ପ୍ରାର୍ଥୀ ଡୋନାଲ୍ଡ ଟ୍ରମ୍ପଙ୍କୁ ମିଳିଛି ୨୧୪ ଇଲେକ୍ଟୋରାଲ ଭୋଟ୍ । ଆମେରିକାରେ ରାଷ୍ଟ୍ରପତି ନିର୍ବାଚିତ ହେବା ପାଇଁ ଦରକାର ୨୭୦ ଇଲେକ୍ଟୋରାଲ ଭୋଟ୍ ।
ରିପବ୍ଲିକାନ୍ ପ୍ରାର୍ଥୀ ଡୋନାଲ୍ଡ ଟ୍ରମ୍ପ୍ ଡେମୋକ୍ରାଟିକ୍ ପ୍ରାର୍ଥୀ ଜୋ ବିଡେନଙ୍କ ମଧ୍ୟରେ କଡା ଟକ୍କର ଜାରି ରହିଛି । ଏ ଭିତରେ ଜୋ ବିଡେନ୍ ବିଜୟର ଅତି ନିକଟତର ହେଉଥିବା ନଜରକୁ ଆସିଛନ୍ତି । ଡୋନାଲ୍ଡ ଡ୍ରମ୍ପ୍ ନିଜର ପରାଜୟ ହେଉଥିବା ଦେଖି ବିଚଳିତ ହୋଇ ଉଠିଛନ୍ତି । ଭୋଟ୍ ଗଣତିରେ ଅନିୟମିତତା ଅଭିଯୋଗ କରି ସୁପ୍ରିମକୋର୍ଟ ଯାଇଛନ୍ତି ଡୋନାଲ୍ଡ ଟ୍ରମ୍ପ୍ । ଟ୍ରମ୍ପ୍ଙ୍କ ପ୍ରଚାର ଟିମ୍ ସଦସ୍ୟ ଏବେ ଭୋଟ୍ ଗଣତି ହୋଇନଥିବା ରାଜ୍ୟରେ ଗଣତି ରୋକିବାକୁ କୋର୍ଟଙ୍କୁ ଅନୁରୋଧ କରିଛନ୍ତି । ଟ୍ରମ୍ପ୍ ଲଗାତର ଭୋଟ୍ ଗଣତିରେ ହେରାଫେରି କରିଥିବା ଅଭିଯୋଗ ଆଣିବା ସହ ମେଲ୍ ଇନ୍ ବାଲେଟ୍କୁ ବଡ ସ୍କାମ୍ ବୋଲି କହିଛନ୍ତି ।
ଏବେବି କେତେକ ଗୁରୁତ୍ବପୂର୍ଣ୍ଣ ରାଜ୍ୟର ଫଳାଫଳ ଆସିବାକୁ ବାକି ଅଛି । ନେଭାଡା ଏବଂ ପେନସିଲଭାନିଆ ଭଳି ରାଜ୍ୟରେ ଭୋଟ୍ ଗଣତି ଜାରି ରହିଛି । ଏହି ଦୁଇ ରାଜ୍ୟର ଫଳାଫଳ ନିର୍ଣ୍ଣାୟକ ହୋଇପାରେ। ସେପଟେ ଡେମୋକ୍ରାଟିକ୍ ପ୍ରାର୍ଥୀ ବିଡେନ୍ ଟ୍ବିଟ୍ କରି କହିଛନ୍ତି ଯେ ତାଙ୍କର ପୁରା ବିଶ୍ବାସ ଜିତିବେ ।
ଏହି ସମୟରେ ହିଂସାକାଣ୍ଡ ଆଶଙ୍କାରେ ସୁରକ୍ଷା ବ୍ୟବସ୍ଥା କଡା କଡି କରାଯାଇଛି । ହ୍ବାଇଟ୍ ହାଉସ୍ ସମେତ ପ୍ରମୁଖ ବାଣିଜ୍ୟିକ କ୍ଷେତ୍ର ଏବଂ ବଜାରରେ କଡା ସୁରକ୍ଷା ବ୍ୟବସ୍ଥା କରାଯାଇଛି । ଜର୍ଜିଆରେ ଟ୍ରମ୍ପଙ୍କ ଟିମ୍ ଅବିଯୋଗ ଆଣିଛନ୍ତି ଯେ, ବିଳମ୍ବରେ ଆସିଥିବା ୫୩ ଭୋଟରଙ୍କୁ ଭୋଟ୍ ଦେବା ପାଇଁ ଦିଆଯାଇଥିଲା । ସେ ଅଭିଯୋଗ କରିଛନ୍ତି ଯେ, ନିର୍ବାଚନ ଅଧିକାରୀ ଡେମୋକ୍ରାଟିକ୍ ପାର୍ଟିକୁ ସମର୍ଥନ କରୁଛନ୍ତି ।
