ଦୋହା, ୧୧ ।୫: ଅଲିମ୍ପିକ୍ସ ବିଶ୍ୱ ଚାମ୍ପିଅନ୍ ଜାଭେଲିନ ଖେଳାଳି ନୀରଜ ଚୋପ୍ରା ସିଜନର ପ୍ରଥମ ପ୍ରତିଯୋଗିତା ଦୋହା ଡାଏମଣ୍ଡ ଲିଗ୍ରେ ରୌପ୍ୟ ପଦକ ପାଇଛନ୍ତି । ଚେକ୍ ଗଣରାଜ୍ୟର ଜାକୁବ ଭଦଲେଚ ୮୮.୩୮ ମିଟର ଫିଙ୍ଗି ପ୍ରଥମ ସ୍ଥାନ ସହ ସ୍ୱର୍ଣ୍ଣ ପଦକ ଜିତିଥିଲେ । ନୀରଜ ଅନ୍ତିମ ତଥା ଷଷ୍ଠ ପ୍ରୟାସରେ ୮୮.୩୬ ମିଟର ଫିଙ୍ଗି ଦ୍ୱିତୀୟ ସ୍ଥାନରେ ରହିଥିଲେ । ସେ ମାତ୍ର ୦.୦୨ ମିଟରରୁ ଟାଇଟଲ ହାସଲରୁ ବଞ୍ଚିତ ହୋଇଛନ୍ତି ନୀରଜ । ଗ୍ରେନେଡାର ପିଟର୍ସ ଆଣ୍ଡରସନ ଅନ୍ତିମ ପ୍ରୟାସରେ ୮୬.୬୨ ମିଟର ଶ୍ରେଷ୍ଠ ପ୍ରଦର୍ଶନ ଦେଇ ତୃତୀୟ ସ୍ଥାନ ସହ ବ୍ରୋଞ୍ଜ ପଦକ ପାଇଛନ୍ତି । ଓଡ଼ିଶାର କିଶୋର ଜେନାଙ୍କ ପ୍ରଦର୍ଶନ ନୈରାଶ୍ୟଜନକ ରହିଥିଲା । ସେ ୭୬.୩୧ ମିଟର ଫିଙ୍ଗି ନବମ ସ୍ଥାନରେ ରହିଥିଲେ ।
ସିଜନର ପ୍ରଥମ ପ୍ରତିଯୋଗିତାରେ ନୀରଜ ଦୋହାରେ ୯୦ ମିଟର ମାର୍କ ଅତିକ୍ରମ କରିବେ ବୋଲି ଆଶା କରାଯାଉଥିଲା । ହେଲେ ଏଥିରେ ସଫଳ ହୋଇନାହାନ୍ତି । ଫାଉଲରୁ ସେ ଅଭିଯାନ ଆରମ୍ଭ କରିଥିଲେ । ଦ୍ୱିତୀୟ ପ୍ରୟାସରେ ୮୪.୯୩ ମିଟର, ତୃତୀୟରେ ୮୬.୨୪ ମିଟର, ଚତୁର୍ଥରେ ୮୬.୧୮ ମିଟର, ପଞ୍ଚମରେ ୮୨.୨୮ ମିଟର ଏବଂ ଅନ୍ତିମ ପ୍ରୟାସରେ ୮୮.୩୬ ମିଟର ଫିଙ୍ଗିଥିଲେ । ମାତ୍ର କିଶୋର ଜେନା ପଦାର୍ପଣ ଯାତ୍ରାରେ ୭୫.୭୨ ମିଟରରୁ ଆରମ୍ଭ ହୋଇଥିଲା । ଦ୍ୱିତୀୟ ପ୍ରୟାସ ଫାଉଲ ଓ ତୃତୀୟରେ ୭୬.୩୧ ମିଟର ଫିଙ୍ଗିବା ପରେ ତାଙ୍କର ଅଭିଯାନ ଶେଷ ହୋଇଥିଲା ।
