ଭୁବନେଶ୍ୱର ୦୬/୦୬: କୂଢ କୂଢ ଶବ । ଭୀଷଣ ଦୁର୍ଗନ୍ଧରେ ଫାଟି ପଡୁଛି ପରିବେଶ । ଖଣ୍ଡ ବିଖଣ୍ଡିତ ବୀଭତ୍ସ ମୃତଦେହ । କାହାର ମୁଣ୍ଡ ନାହିଁ, ତ କାହାର ହାତ । ତଥାପି ଏସବୁକୁ ଖାତିର ନକରି ଭୁଲିନାହାଁନ୍ତି ନିଜର କର୍ତ୍ତବ୍ୟ । ନିସ୍ୱାର୍ଥପର ଭାବେ ଲୋକଙ୍କୁ ଯୋଗାଇ ଚାଲିଛନ୍ତି ସେବା । ସ୍ୱାସ୍ଥ୍ୟକର୍ମୀ, ପ୍ରଶାସନିକ ଅଧିକାରୀ ଲାଗି ପଡିଛନ୍ତି ନିଜ ନିଜ କାମରେ । କରୋନା ସମୟରେ ଯେମିତି ପିପିଇ କିଟ୍ ପିନ୍ଧିି ଲୋକଙ୍କୁ ସେବା ଦେଉଥିଲେ । ଏବେ ପୁଣିଥରେ ସେମିତି ଟ୍ରେନ୍ ଟ୍ରାଜେଡି ପରେ ପରିବାର ଲୋକଙ୍କୁ ସେବା ଯୋଗାଉଛନ୍ତି । ଯାହାକି ଅସଲ ମାନବିକତାର ଦେଇଛି ପରିଚୟ । ସାରା ରାଜ୍ୟରେ ଏମାନଙ୍କ ମାନବିକତାକୁ ଦିଆଯାଉଛି ଶତ ସଲାମ ।

ତିନି ଦିନ ଧରି ମୃତଦେହ ରହିବାରୁ ପଚିଗଲାଣି । ଏମ୍ସ୍ ଶବାଗାର ଅଞ୍ଚଳ ଦୁର୍ଗନ୍ଧରେ ଫାଟି ପଡୁଛି । ବିନା ମାସ୍କରେ ଯିବା କଷ୍ଟ । ଏପରି ପରିସ୍ଥିତିରେ ଶବ ଚିହ୍ନଟ ଠାରୁ ଆରମ୍ଭ କରି ବ୍ୟବଚ୍ଛେଦ ଓ ପ୍ୟାକିଂ ପର୍ଯ୍ୟନ୍ତ ସବୁ କାର୍ଯ୍ୟରେ ସ୍ୱାସ୍ଥ୍ୟକର୍ମୀ ମାନେ ଲାଗିଛନ୍ତି । ଡାକ୍ତର, ନର୍ସ ଓ ପାରା ମେଡିକାଲ ଷ୍ଟାଫ୍ ସେବାରେ ଲାଗିଛନ୍ତି । ପ୍ରବଳ ଗରମ ସତ୍ତ୍ୱେ ଘଣ୍ଟା ଘଣ୍ଟା ଧରି ପିପି କିଟ୍ ପିନ୍ଧି ରହୁଛନ୍ତି । ଆଜି ଏମ୍ଏସ୍ ପରିସରରେ ଜଣେ ମହିଳା ଡାକ୍ତର ପିପିଇ କିଟ୍ ପିନ୍ଧି ଅଣନିଶ୍ୱାସୀ ହୋଇ ପଡ଼ିଥିଲେ । ତଥାବି ସେ ଧୈର୍ଯ୍ୟ ହାରିନଥିଲେ । ପୁଣି କିଛି ସମୟ ବିଶ୍ରାମ ନେବା ପରେ ଉଠି କାର୍ଯ୍ୟରେ ଲାଗିଥିଲେ । ତାଙ୍କର ଏପରି ଅତୁଳନୀୟ ସେବା ପାଇଁ ସାଥୀ କର୍ମଚାରୀ ମାନେ ତାଙ୍କୁ ସାବାସୀ ଦେଇଛନ୍ତି ।

ଆମ୍ବୁଲାନ୍ସ ଡ୍ରାଇଭର ମାନଙ୍କ ଅବଦାନ ମଧ୍ୟ ଅତୁଳନୀୟ । ମୃତଦେହ ଚିହ୍ନଟ ପରେ ପ୍ରଶାସନ ପକ୍ଷରୁ ମାଗଣା ଆମ୍ବୁଲାନ୍ସ ସେବା ଯୋଗାଇ ଦିଆଯାଉଛି । ପଚା ଦୁର୍ଗନ୍ଧ ସତ୍ତେ୍ୱ ସୁଦୂର ବିହାର, ପଶ୍ଚିମବଙ୍ଗକୁ ମୃତଦେହ ବୋହି ନେଉଛନ୍ତି ଆମ୍ବୁଲାନ୍ସ ଡ୍ରାଇଭର । ବାଲେଶ୍ୱରରୁ ଶବ ଭୁବନେଶ୍ୱରରେ ପହଞ୍ଚାଇବା ହେଉ କିମ୍ବା ଏମ୍ଏସ୍‌ରୁ ମୃତକଙ୍କ ଘର । ନିସ୍ୱାର୍ଥପର ଭାବେ ସେବା ଯୋଗାଉଛନ୍ତି ।

ସେହିପରି ପ୍ରଶାସନିକ ଅଧିକାରୀ ମାନେ ମଧ୍ୟ ଡେରା ପକାଇ ରହୁଛନ୍ତି । ଶବାଗାରରୁ ହେଲ୍ପ ଡେକ୍ସ ପର୍ଯ୍ୟନ୍ତ ସମସ୍ତ ନିଜ କର୍ତ୍ତବ୍ୟ ଭୁଲି ନାହାନ୍ତି । ବିଏମ୍ସି, ଜିଲ୍ଲା ପ୍ରଶାସନ, ରେଳ କର୍ମଚାରୀ, ପୁଲିସ ମାନେ ଆସୁଥିବା ଲୋକଙ୍କୁ ଶବ ଚିହ୍ନଟ ଠାରୁ ନେବା ପର୍ଯ୍ୟନ୍ତ ସହଯୋଗ ଯୋଗାଇ ଆସୁଛନ୍ତି । ଦୁର୍ଗନ୍ଧ ସତ୍ତେ୍ୱ ବାହାରେ ବସି ରହୁଛନ୍ତି । ସେହିପରି ଗଣମାଧ୍ୟମ କର୍ମଚାରୀ ବାହାରେ ରହି ଟିକିନିଖି ଖବର ପ୍ରସାରଣ କରୁଛନ୍ତି ।

ବାହାର ରାଜ୍ୟରୁ ଆସୁଥିବା ମୃତକଙ୍କ ପରିବାର ଲୋକଙ୍କ ପାଇଁ ସ୍ୱେଚ୍ଛାସେବୀ ମାନେ ଲାଗି ପଡିଛନ୍ତି । ସେମାନଙ୍କୁ ଖାଇବା ପିଇବା ଯୋଗାଇ ଦିଆଯାଉଛି । ଏହା ସହ ବିଶ୍ରାମ କରିବା ପାଇଁ ମଧ୍ୟ ଅସ୍ଥାୟୀ ଟେଣ୍ଟ ନିର୍ମାଣ କରାଯାଇଛି । ସେ ରକ୍ତଦାନ ହେଉ କିମ୍ବା ସ୍ୱାସ୍ଥ୍ୟ ସେବା ସବୁ କ୍ଷେତ୍ରରେ ଏହି ଦୁଃଖ ସମୟରେ ଆଗେଇ ଆସିଛନ୍ତି ଓଡ଼ିଶାବାସୀ । ସେମାନଙ୍କ ନିସ୍ୱାର୍ଥପର ସେବା ପାଇଁ ଓଡ଼ିଶା ସବୁଆଡ଼େ ପ୍ରଶଂସା ସାଉଁଟିଛି ।