ନୂଆଦିଲ୍ଲୀ: ଡି-ମାର୍ଟର ପ୍ରତିଷ୍ଠାତା ରାଧାକିଷନ ଦମାନୀ ନିକଟରେ ଦେଶର ପ୍ରପର୍ଟି ମାର୍କେଟର ସବୁଠୁ ବଡ଼ ରିୟଲ ଇଷ୍ଟେଟ୍ ଚୁକ୍ତି କରିଛନ୍ତି । ରିପୋର୍ଟ ଅନୁସାରେ, ରାଧାକିଷନ ଦମାନୀଙ୍କ ପରିବାର ସଦସ୍ୟ ଏବଂ ସମ୍ପର୍କୀୟ ମୁମ୍ୱାଇରେ ୧,୨୩୮ କୋଟି ଟଙ୍କାରେ ୨୮ ହାଉସିଂ ୟୁନିଟ୍ କିଣିଛନ୍ତି । ଏହି ଡିଲ୍ ଏଥିପାଇଁ ମଧ୍ୟ ଗୁରୁତ୍ୱପୂର୍ଣ୍ଣ କାରଣ ବଜେଟ ୨୦୨୩ ଘୋଷଣା ପରେ ଏପ୍ରିଲ ୧ରୁ ସୁପର ଲଜଗରୀ ସମ୍ପତ୍ତି ବିକ୍ରି ଉପରେ ପ୍ରଭାବ ପଡିବା ନେଇ ଅନୁମାନ କରାଯାଉଛି । ବଜେଟରେ ହାଉସିଂ ପ୍ରପର୍ଟି ସହ ଦୀର୍ଘ ମିଆଦୀ ସମ୍ପତ୍ତିର ବିକ୍ରିରୁ ହୋଇଥିବା କ୍ୟାପିଟାଲ ଗେନ (capital gain)ର ପୁନଃନିବେଶ ଉପରେ ୧୦ କୋଟି ଟଙ୍କାର କ୍ୟାପ (ସୀମା) ଲଗାଇ ଦିଆଯାଇଛି । ବର୍ତ୍ତମାନ ସମୟରେ ଏହିପରି କୌଣସି ସୀମା ଲାଗୁ ନାହିଁ ।

ଖବର ଅନୁସାରେ, କିଛି ପ୍ରପର୍ଟିକୁ କମ୍ପାନିଙ୍କ ନାଁରେ କିଣାଯାଇଛି । ଭାରତର ଶୀର୍ଷ ରିଟେଲର୍ସଙ୍କ ମଧ୍ୟରୁ ଜଣେ ରାଧାକିଷନ ଦମାନୀ ଏବଂ ସେମାନଙ୍କ ସମ୍ପର୍କୀୟଙ୍କ ଦ୍ୱାରା ମୋଟ ୧,୮୨,୦୮୪ ବର୍ଗ ଫୁଟର କାରପେଟ୍ କିଣାଯାଇଛି । ଏଥିରେ ୧୦୧ କାର ପାର୍କିଂ ପାଇଁ ବ୍ୟବସ୍ଥା ରହିଛି । ଫେବ୍ରୁଆରୀ ୩ରେ ଏହା ସହ ଜଡିତ ସମସ୍ତ ଆର୍ଥିକ ନେଣଦେଣର ପଞ୍ଜିକରଣ କରାଯାଇଛି ।  

ମୁମ୍ୱାଇର ବର୍ଲିରେ ଆନିବେସାଣ୍ଟ ରୋଡ୍ ସ୍ଥିତ ଥ୍ରୀ ସିକ୍ସଟି ୱେଷ୍ଟର ଟାୱାର Bରେ ଆପାର୍ଟମେଣ୍ଟ କିଣାଯାଇଛି । ଏହାର ବିକ୍ରେତା ବିଲ୍ଡର ହେଉଛନ୍ତି ସୁଧାକର ସେଟ୍ଟୀ । ପ୍ରୋଜେକ୍ଟର ପୁର୍ନବିକାଶ ପାଇଁ ରିୟଲ ଇଷ୍ଟେଟ୍ ଡେଭଲପର ବିକାଶ ଓବେରୟ ସହ ଚୁକ୍ତି କରିଥିଲେ । ଏଥିରେ ଅଧିକାଂଶ ଆପାର୍ଟମେଣ୍ଟ ୫ ହଜାର ବର୍ଗ ଫୁଟ ଏବଂ ଏହାର ମୂଲ୍ୟ ହାରାହାରି ୪୦-୫୦ କୋଟି ଟଙ୍କା ।

ଏହା ପୂର୍ବରୁ ରାଧାକିଷନ ଦମାନୀଙ୍କ ଡି-ମାର୍ଟ ମଧ୍ୟ ୪୦୦ କୋଟି ଟଙ୍କାରେ ୭ଟି ପ୍ରପର୍ଟି କିଣିଥିଲେ । ରାଧାକିଷନ ଦମାନୀଙ୍କ ଡି-ମାର୍ଟ ୧୧ ରାଜ୍ୟ ଏବଂ ଗୋଟିଏ କେନ୍ଦ୍ର ଶାସିତ ପ୍ରଦେଶରେ ବ୍ୟବସାୟ କରୁଛି । ଘର ଗୁଡିକୁ ଲିଜରେ ନେବା ପରିବର୍ତ୍ତି ରିଟେଲର ଏହାକୁ କିଣି ନେଉଛି ।