ଢେଙ୍କାନାଳ ୯।୬: ଖାଦ୍ୟରେ ଅତ୍ୟଧିକ ମାତ୍ରାରେ ନିଦ ବଟିକା ଦେଇ ଶାଶୁକୁ ମାରିଦେଇଛି ବୋହୂ । ମୃତକଙ୍କ ପୁଅ ତାଙ୍କ ପତ୍ନୀ ନାମରେ ଆଣିଛି ଏହି ହତ୍ୟା ଅଭିଯୋଗ । ଫଳରେ ପୋଲିସ ଅଭିଯୁକ୍ତ ବୋହୂକୁ ଅଟକ ରଖି ଛାନଭିନ ଆରମ୍ଭ କରିଛି । ଢେଙ୍କାନାଳ ଜିଲ୍ଲା ରାସୋଳ ବ୍ରାହ୍ମଣ ସାହିରେ ଏପରି ଅଭାବନୀୟ ଘଟଣାକୁ ନେଇ ବେଶ ଆଲୋଡନ ସୃଷ୍ଟି କରିଛି ।

ଢେଙ୍କାନାଳ ଜିଲ୍ଲା ରାସୋଳ ଥାନା ବ୍ରାହ୍ମଣ ସାହିରେ ଶାଶୁକୁ ଖାଦ୍ୟରେ ଅତ୍ୟଧିକ ନିଦ ବଟିକା ଦେଇ  ମାରିଦେଲା ବୋହୂ । ମୃତକ ହେଉଛନ୍ତି ରାସୋଳ ବ୍ରାହ୍ମଣ ସାହିର ଅବସରପ୍ରାପ୍ତ ରାଜସ୍ୱ ନିରୀକ୍ଷକ ତାରେଶ୍ୱର ସରଙ୍କ ପତ୍ନୀ ୬୨ ବର୍ଷୀୟ ବୃଦ୍ଧା ସୁଲୋଚନା ସର । ଗୁରୁବାର ଦ୍ୱିପ୍ରହରରେ ସୁଲୋଚନାଙ୍କୁ ଖାଦ୍ୟରେ କୁଆଡେ ତାଙ୍କ ବୋହୂ ତୃପ୍ତିମୟୀ ଅତ୍ୟଧିକ ନିଦ ବଟିକା ଦେଇଦେଇଥିଲେ । ଫଳରେ ରାତି ପ୍ରାୟ ୮ଟା ସମୟରେ ତାଙ୍କ ପାଟିରୁ ରକ୍ତ ଓ ଫେଣ ବାହାରି ତାଙ୍କର ମୃତ୍ୟୁ ଘଟିଥିଲା । ତେବେ ତାଙ୍କୁ ସ୍ଥାନୀୟ ରାସୋଳ ପ୍ରାଥମିକ ଚିକିତ୍ସାଳୟରେ ଭର୍ତ୍ତି କରାଯାଇଥିଲେ ମଧ୍ୟ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତେବେ ସୁଲୋଚନା ସୁସ୍ଥ ଥିବା ଓ ଗୁରୁବାର ପୁଅ ଜୟନ୍ତଙ୍କ ସହ ବ୍ୟାଙ୍କ ଯାଇ ଘରକୁ ଫେରିବା ପରେ ଖାଇ ଶୋଇଥିଲେ । ମାତ୍ର ତାଙ୍କର ଏପରି ଆକସ୍ମିକ ମୃତ୍ୟୁକୁ ସହଜରେ ଗ୍ରହଣ କରୁନାହାନ୍ତି ଗ୍ରାମବାସୀ ଓ ସମ୍ପର୍କୀୟ । ପୂର୍ବରୁ ଅତ୍ୟାଚାର କରି ଆସୁଥିବା ତାଙ୍କ ବୋହୂ ଖାଦ୍ୟରେ ବିଷ ମିଶାଇ ମାରିଦେଇଥିବା ଅଭିଯୋଗ ଉଠାଇ ଦୃଢ଼ କାର୍ଯ୍ୟାନୁଷ୍ଠାନରେ ଅଡ଼ି ବସିଛନ୍ତି ।