କେନ୍ଦୁଝର ୧୨/୧୨: କେନ୍ଦୁଝର ଜିଲ୍ଲାପାଳଙ୍କ ମହାନତା । ଦିବ୍ୟାଙ୍ଗଙ୍କ ହାତରୁ ହଟିବ ଆଶାବାଡ଼ି, ମିଳିବ ସ୍ଵୟଂଚାଳିତ ସ୍କୁଟି । ଗତକାଲି ପାଟଣା ବ୍ଲକରେ ଜିଲ୍ଲାପାଳଙ୍କ ଅଭିଯୋଗ ଶୁଣାଣୀ ଅନୁଷ୍ଠିତ ହେବା ଅବସରରେ ମହାନତା ଦେଖାଇଲେ ପାଟଣା ପୋଲିସ ଓ ଜିଲ୍ଲାପାଳ । ଅଭିଯୋଗ ପ୍ରକୋଷ୍ଠକୁ ଆସୁଥିବା କେନ୍ଦେଇ ପଶିର ଶରତ ଚନ୍ଦ୍ର ନାଏକ ଗୋଡ଼ରେ ସମସ୍ୟା ଯୋଗୁଁ ସେ ଆଶାବାଡ଼ି ଧରି ମଧ୍ୟ ସଠିକ୍ ରୂପେ ଚାଲିପାରୁ ନଥିଲେ ।
ଏହା ଦେଖି ଗୋଟିଏ ପଟେ ପାଟଣା ଥାନାଧିକାରୀ ଓ ଅନ୍ୟପଟେ ଅନ୍ୟଜଣେ ପୋଲିସ କର୍ମଚାରୀ ଶରତଙ୍କୁ ଟେକିନେଇ ଜିଲ୍ଲାପାଳଙ୍କ ନିକଟରେ ପହଞ୍ଚାଇଥିଲେ । ଏଭଳି ଭାବେ ଜଣେ ଦିବ୍ୟାଙ୍ଗ ଆସୁଥିବା ଦେଖି ଜିଲ୍ଲାପାଳ ନିଜ ଚୌକିରୁ ଉଠିଆସି ତାଙ୍କ ଅଭିଯୋଗ ଶୁଣିଥିଲେ ।
ତତକ୍ଷଣାତ୍ ଶରତଙ୍କ ଚଳପ୍ରଚଳ ପାଇଁ ଏକ ସ୍ଵୟଂଚାଳିତ ସ୍କୁଟି ମଞ୍ଜୁର କରିବାକୁ ପାଟଣା ବିଡ଼ିଓଙ୍କୁ ନିର୍ଦ୍ଦେଶ ଦେଇଥିଲେ ।ଏଥିସହିତ, ତାଙ୍କର ଅନ୍ୟ ସମସ୍ତ ଅଭିଯୋଗର ଯଥାଶୀଘ୍ର ସମାଧାନ ପାଇଁ ଆଶ୍ୱାସନା ଦେଇଥିଲେ ଜିଲ୍ଲାପାଳ ଆଶିଷ ଠାକରେ ।
