ଧର୍ମଗଡ଼ ୨୧।୦୩ : ଜେଲ ଗଲେ ଦୁଇ ଦୁର୍ନୀତିଗ୍ରସ୍ତ ବନ ଅଧିକାରୀ l ବନୀକରଣ ନାଁରେ କରିଥିଲେ ଦୁର୍ନୀତି l ଜାମିନ୍‌ ନାମଞ୍ଜୁର ପରେ ଦୁଇ ଅଧିକାରୀଙ୍କୁ ଜେଲ୍‌ ପଠାଯାଇଛି । କଳାହାଣ୍ଡି ଜିଲ୍ଲା ଧର୍ମଗଡ଼ ନର୍ଲା ବନ ବିଭାଗର ଘଟଣା ।  

ଖବର ଅନୁଯାୟୀ, କଳାହାଣ୍ଡି ଜିଲ୍ଲା ଉତ୍ତର ବନଖଣ୍ଡ ନର୍ଲାରେଞ୍ଜ ରେ ଆମ ଜଙ୍ଗଲ କାମ୍ପା ଯୋଜନାରେ ୨୦୧୫-୧୬, ୧୬-୧୭ ବର୍ଷରେ ଖେରାବାଣ୍ଡି, ନର୍ଲା ଏବଂ ସର୍ଗିଗୁଡା ତିନିଟି ବିଟରେ ୧୪୫୦ ହେକ୍ଟର ଜଙ୍ଗଲରେ ବନୀକରଣ ନାଁରେ ଦୁର୍ନୀତି କରିଥିବା ଅଭିଯୋଗ ହୋଇଥିଲା l ବନ ଅଧିକାରୀ ମାନେ ୨୩ ଲକ୍ଷ ୬୩ ହଜାର ଟଙ୍କା ଆତ୍ମସାତ୍‌ ହୋଇଥିବା ନେଇ ଲୋକାୟୁକ୍ତରେ ଅଭିଯୋଗ ହୋଇଥିଲା । ଲୋକାୟୁକ୍ତ ଏହାର ତଦନ୍ତ ପାଇଁ ଭିଜିଲାନ୍ସକୁ ନିର୍ଦ୍ଦେଶ ଦେଇଥିଲେ ।

ଶେଷରେ ପୂର୍ବତନ ଡିଅଫଓ, ପୂର୍ବତନ ଏସିଅଫ, ପୂର୍ବତନ ରେଞ୍ଜର, ପୂର୍ବତନ ଫରେଷ୍ଟର ଏବଂ ଫରେଷ୍ଟ ଗାର୍ଡଙ୍କ ନାଁରେ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲେ l ତଦନ୍ତରେ ଅଭିଯୋଗ ସତ୍ୟ ପ୍ରମାଣିତ ହେବା ପରେ ସମସ୍ତଙ୍କୁ ଭିଜିଲାନ୍ସ କୋର୍ଟରେ ହାଜର ହେବା ପାଇଁ ସମନ ହୋଇଥିଲା l ଦୁଇ ଅଧିକାରୀ କୋର୍ଟରେ ହାଜର ହୋଇ ଜାମିନ ପାଇଁ ଆବେଦନ କରିଥିଲେ । କିନ୍ତୁ ଜାମିନ ନାମଞ୍ଜୁର ହେବା ପରେ ଦୁଇ ଅଧିକାରୀଙ୍କୁ ଜେଲକୁ ପଠାଯାଇଛି । ବାକି ଅନ୍ୟ ତିନି ଜଣଙ୍କୁ ସମନ କରାଯାଇଛି l