ଭୁବନେଶ୍ବର ୨୦।୭: ବଳଙ୍ଗାରେ ଡିଜିପି ଓ୍ବାଇ. ବି. ଖୁରାନିଆ । ଘଟଣାସ୍ଥଳକୁ ଯାଇ ତନ୍ନ ତନ୍ନ ଯାଞ୍ଚ କଲେ । ପୀଡିତାଙ୍କୁ କେଉଁବାଟ ଦେଇ ଦୁର୍ବୃତ୍ତମାନେ ନେଇଥିଲେ । ପୀଡିତା କେଉଁବାଟ ଦେଇ ଆସିଲେ । କେଉଁଠି ପ୍ରଥମେ ପହଞ୍ଚିଥିଲେ । ତାଙ୍କୁ କିଏ ଉଦ୍ଧାର କରିଥିଲେ ତାହା ପଚାରି ବୁଝିବା ସହ ସେହି ସ୍ଥାନ ସବୁ ବୁଲି ଦେଖିଥିଲେ । ଏହାପରେ ପୀଡିତାଙ୍କ ଘରକୁ ଯାଇ ପରିବାର ଲୋକଙ୍କୁ ଘଟଣା ସଂପର୍କରେ ପଚରାଉଚରା କରିଥିଲେ ଡିଜିପି । ତାଙ୍କ ସହ ଥିଲେ କେନ୍ଦ୍ରାଞ୍ଚଳ ଆଇଜି ଓ ପୁରୀ ଏସ୍ପି । ଡିଜିପି କହିଛନ୍ତି ତଦନ୍ତ ଜୋରଦାର ଚାଲିଛି ।ଘଟଣା ସମ୍ବେଦନଶୀଳ ଏବଂ ତଦନ୍ତ ଚାଲିଛି ଖୁବଶୀଘ୍ର ଅପରାଧୀଙ୍କୁ ଧରିବୁ ବୋଲି କହିଛନ୍ତି ଡିଜିପି ।
ସେପଟେ ଘଟଣାସ୍ଥଳରେ ପୋଲିସ ଓ ଫୋରେନସିକ୍ ଟିମ୍ର ୧୨ ଜଣିଆ ସଦସ୍ୟ ମଧ୍ୟ ଛାନଭିନ କରିଛନ୍ତି । ଘଟଣାସ୍ଥଳରୁ କିରାସିନି ବୋତଲ, ଦିଆସିଲି, ପୋଡ଼ା କପଡ଼ା, ସୁନା ମୁଦି, ଅଭିଯୁକ୍ତଙ୍କ ଚପଲ ଜବତ ହୋଇଛି । ଘଟଣାସ୍ଥଳରୁ ଏହି ଟିମ୍ ଆଉ କିଛି ପ୍ରମାଣ ମଧ୍ୟ ସଂଗ୍ରହ କରିଛି । ପୀଡିତାଙ୍କୁ ଯିଏ ଉଦ୍ଧାର କରିଥିଲେ ତାଙ୍କ ଘରେ ପହଞ୍ଚି ଫୋରେନସିକ୍ ଟିମ୍ ଓ ବଳଙ୍ଗା ଥାନା, ନିମାପଡ଼ା ଥାନା ପକ୍ଷରୁ ତଥ୍ୟ ହାସଲ କରାଯାଇଛି । ଏହାପରେ ତଦନ୍ତକାରୀ ଟିମ୍ ପୀଡିତାଙ୍କ ଘରକୁ ଯାଇ ପରିବାର ଲୋକଙ୍କୁ ପଚରା ଉଚରା କରିଛି । ପୀଡିତା ରହୁଥିବା ଘରେ ତାଲା ପଡିଥିବାରୁ ଘର ଖୋଲାଗଲେ ଆଉ କିଛି ତଥ୍ୟ ମିଳିପାରିବ ବୋଲି ଜଣାପଡିଛି । ପୀଡିତାଙ୍କ ବାପା ବଳଙ୍ଗା ବଜାରରେ କରିଥିବା ଗ୍ୟାରେଜ୍ ଖୋଲି ସେଠାରୁ କିଛି ସାମ୍ପଲ ସଂଗ୍ରହ କରିଛି । ସେହିପରି ପୀଡିତାଙ୍କ ପିଉସୀ ଓ ଦାଦାଙ୍କୁ ଏକ ଅଜଣା ସ୍ଥାନକୁ ନେଇ ପଚରା ଉଚରା କରୁଛି ପୋଲିସ । ସିସିଟିଭିରୁ ୨ଟି ସୁରାକ ମିଳିଛି । ଘଟଣାର ତଦନ୍ତ ପାଇଁ ୪ଟି ଟିମ୍ ଗଠନ କରାଯାଇଛି । ଏହି ମାମଲାରେ ୮ ଜଣଙ୍କୁ ପଚରାଉଚରା କରାଯାଇଛି । ଅପରାଧୀଙ୍କୁ ଧରିବାରେ ପୋଲିସ କୌଣସି କୋହଳ ମନୋଭାବ ରଖୁନାହିଁ ବୋଲି ପିପିଲି ଏସ୍ଡିପିଓ କହିଛନ୍ତି ।
ଏପଟେ ଏହି ଘଟଣାକୁ ନେଇ ତେଜିଛି ରାଜନୀତି । ଘଟଣାରେ ସଂପୃକ୍ତ ଅପରାଧୀଙ୍କୁ ଗିରଫ ଦାବିରେ ବଳଙ୍ଗା ଥାନା ଘେରିଛି ବିଜେଡି । ଘେରାଉ ବେଳେ ପୋଲିସ ଓ ବିଜେଡ଼ି କର୍ମୀଙ୍କ ମଧ୍ୟରେ ଧସ୍ତାଧସ୍ତି ପରିସ୍ଥିତି ସୃଷ୍ଟି ହୋଇଥିଲା । ଥାନା ସମ୍ମୁଖରେ ବିଜେଡ଼ି କର୍ମୀ ପ୍ଲା-କାର୍ଡ ଧରି ନାରାବାଜି, ବିକ୍ଷୋଭ ପ୍ରଦର୍ଶନ କରିଥିଲେ । ଆସନ୍ତା ୪୮ଘଣ୍ଟା ମଧ୍ୟରେ ଅଭିଯୁକ୍ତଙ୍କୁ ଗିରଫ କରାନଗଲେ ପିପିଲି ଠାରେ ଜାତୀୟ ରାଜପଥ ଅବରୋଧ କରିବାକୁ ଦଳ ପକ୍ଷରୁ କଡା ଚେତାବନୀ ଦିଆଯାଇଛି । ସେହିଭଳି ବଳଙ୍ଗା ଥାନା ପରିସରରେ ପୁରୀ ଅତିରିକ୍ତ ଏସପିଙ୍କୁ ଭେଟି ଦାବିପତ୍ର ଦେଇଛି କଂଗ୍ରେସ । ଶୀଘ୍ର ଅପରାଧୀଙ୍କୁ ଧରିବା ସହ ପୀଡିତଙ୍କୁ ନ୍ୟାୟ ଦାବି କରିଛି କଂଗ୍ରେସ । ସେହିପରି ଯୁବ ଛାତ୍ର କଂଗ୍ରେସ ପକ୍ଷରୁ ପୁରୀ ଏସ୍ପିଙ୍କ କାର୍ଯ୍ୟାଳୟ ଘେରାଉ କରାଯାଇ ଅଭିଯୁକ୍ତଙ୍କୁ ତୁରନ୍ତ ଗିରଫ ଦାବି କରାଯାଇଛି । ଏହି ଘଟଣାରେ ବିରୋଧୀଙ୍କୁ କଡ଼ା କାଉଣ୍ଟର କରିଛନ୍ତି ମତ୍ସ୍ୟ ଏବଂ ପ୍ରାଣୀ ସମ୍ପଦ ମନ୍ତ୍ରୀ । କହିଛନ୍ତି ବିରୋଧୀ ଅଯଥା ରାଜନୀତି କରୁଛନ୍ତି । ଲୋକଙ୍କ ପାଖରୁ ବିରୋଧୀ ପ୍ରତ୍ୟାଖିତ ହୋଇସାରିଲେଣି । ସେମାନଙ୍କ ଶାସନ ସମୟର ଅନେକ ଉଦାହରଣ ଅଛି । କିନ୍ତୁ ବିଜେପି ଏଭଳି ଘଟଣାରେ ରାଜନୀତି କରିବାକୁ ଚାହୁଁନାହିଁ ।
You Can Read:
ଭିଜିଲାନ୍ସ ଜାଲରେ କେନ୍ଦୁଝର କେନ୍ଦୁପତ୍ର ଡିଭିଜନ୍ ଡିଏଫ୍ଓ, ଏକକାଳୀନ ୭ ସ୍ଥାନରେ ଚଢ଼ାଉ
