କୋଲକାତା: ଡେଓ୍ଵାର୍ଲ୍ଡ ବ୍ରେଭିସଙ୍କ ବିସ୍ଫୋରକ ବ୍ୟାଟିଂ। କୋଲକତା ହାତରୁ ମ୍ୟାଚ୍ ଛଡ଼ାଇ ନେଲା ଚେନ୍ନାଇ। ଆଇପିଏଲ୍ର ୫୭ତନ ମ୍ୟା୍ରେ ଚେନ୍ନାଇ ସୁପର କିଙ୍ଗ୍ସ ୨ ଓ୍ଵିକେଟ୍ରେ କୋଲକାତା ନାଇଟ୍ ରାଇଡର୍ସକୁ ହରାଇଛି। ପରାଜୟ ସହ କୋଲକାତାକୁ ପ୍ଲେ ଅଫ ଆଶାକୁ ବଡ଼ ଝଟକା ଲାଗିଛି। କୋଲକାତା ୧୨ଟି ମ୍ୟାଚ୍ ଖେଳି ଷଷ୍ଠ ପରାଜୟ ଭୋଗିଛି। ପ୍ରଥମେ ବ୍ୟାଟିଂ କରିଥିବା ଚେନ୍ନାଇ ୬ ଓ୍ଵିକେଟ୍ ହରାଇ ୧୭୯ ରନ କରିଥିଲା। ଦଳ ପକ୍ଷରୁ ଅଧିନାୟକ ଆଜିଙ୍କ୍ୟ ରାହାଣେ ୪୮ ରନ, ମନୀଷ ପାନ୍ଡେ ୩୬ ଓ ରସେଲ ୩୮ ରନ କରିଥିଲେ। ଜବାବରେ ଚେନ୍ନାଇ ଡେଓ୍ଵାର୍ଲ୍ଡ ବ୍ରେଭିସଙ୍କ ବିସ୍ଫୋରକ ୫୨ ରନ ଓ ଶିବମ ଦୁବେଙ୍କ ୪୫ ରନ ବଳରେ ୮ ଓ୍ଵିକେଟ୍ ହରାଇ ମ୍ୟାଚ୍ ଜିତି ନେଇଛି।
୧୮୪ ରନର ବିଜୟ ଲକ୍ଷ୍ୟ ପିଛା କରିଥିବା ଚେନ୍ନାଇର ଆରମ୍ଭ ନିରାଶଜନକ ଥିଲା। ଆୟୂଷ ମହାତ୍ରେ ଓ ଡେବନ କନଓ୍ଵେ ଖାତା ଖୋଲି ପାରି ନ ଥିଲେ। ଉର୍ବିଲ ପଟେଲ୍ ବିସ୍ଫୋରକ ବ୍ୟାଟିଂ କରି ମାତ୍ର ୧୧ ବଲ୍ରୁ ୪ ଛକା ସହ ୩୧ ରନ କରି ପାଭିଲିୟନ ଫେରିଥିଲେ। ଏହା ପରେ ଅଶ୍ଵିନୀ ୮ ରନ, ରବୀନ୍ଦ୍ର ଜାଡେଜା ୧୯ ରନ କରି ଆଉଟ୍ ହୋଇଥିଲେ। ୬୦ ରନରେ ୫ ଓ୍ଵିକେଟ୍ ହରାଇ ଚେନ୍ନାଇ ସଙ୍କଟରେ ପଡିଥିଲା। ତେବେ ଡେଓ୍ଵାର୍ଲ୍ଡ ବ୍ରେଭିସ କ୍ରିଜକୁ ଆସିବା ମାତ୍ରେ ବିସ୍ଫୋରକ ବ୍ୟାଟିଂ କରିଥିଲେ। ସେ ଓ ଶିବମ ଦୁବେ ଷଷ୍ଠ ଓ୍ଵିକେଟ୍ରେ ୬୭ ରନ ଯୋଡ଼ି ଦଳର ସ୍ଥିତି ସୁଧାରିବା ସହ ବିଜୟ ସମ୍ଭାବନା ବଢାଇଥିଲେ। ବ୍ରେଭିସ ୨୫ ବଲରୁ ୪ ଚୌକା ଓ ୪ ଛକା ସହ ୫୨ ରନର ବିସ୍ଫୋରକ ମ୍ୟାଚ୍ ବିଜୟୀ ଇନିଂସ ଖେଳିଥିଲେ। ଦୁବେ ୪୫ ରନର ଉପଯୋଗୀ ଇନିଂସ ଖେଳି ଦଳକୁ ବିଜୟର ଦ୍ଵାର ଦେଶରେ ପହଞ୍ଚାଇଥିଲେ। ଏମଏସ ଧୋନୀ ୧୭ ରନ କରି ଅପରାଜିତ ଥିଲେ।
