ନୂଆଦିଲ୍ଲୀ: ରାଜଧାନୀ ଦିଲ୍ଲୀ ତିସ୍ ହଜାରୀ କୋର୍ଟ ବାହାରେ ହଙ୍ଗାମା । ଅଦାଲତ ବାହାରେ ଗର୍ଜିଲା ବନ୍ଧୁକ । ବୁଧବାର ଦୁଇ ଆଇନଜୀବୀ ଗୋଷ୍ଠୀଙ୍କ ମଧ୍ୟରେ ସଂଘର୍ଷ ହୋଇଥିଲା । ବିବାଦରେ ମାରପିଟ୍ ଓ ସଂଘର୍ଷ ହୋଇଥିଲା । ଗୋଟିଏ ପକ୍ଷରର ଜଣେ ଆଇନଜୀବୀ ବନ୍ଧୁକ ବାହାର କରି ଫାୟାରିଂ କରିଥିଲେ । ହେଲେ ଏଥିରେ କାହା ଉପରେ ଗୁଳି ବାଜିନଥିବା ସୂଚନା ମିଳିଛି । ପୋଲିସ ସୂଚନା ଅନୁଯାୟୀ, କୌଣସି କାରଣ ନେଇ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ହୋଇଥିଲା । ଏଥିରେ ଗୁଳି ମଧ୍ୟ ଫୁଟିଛି । ଏହି ଭିଡିଓ ଏବେ ସୋସିଆଲ୍ ମିଡିଆରେ ଭାଇରାଲ୍ ହୋଇଛି ।
ଆଇନଜୀବୀଙ୍କ ଏହି ଗୋଷ୍ଠୀ ସଂଘର୍ଷରେ ୯ ରାଉଣ୍ଡ ଫୁଟିଛି । ଘଟଣାରେ ୩୦ ସେକେଣ୍ଡର ଭିଡିଓ ସାମ୍ନାକୁ ଆସିଛି । ଜଣେ ଓକିଲ ପିସ୍ତଲ ବାହାର କରି ଗୁଳି ଫୁଟାଇଛନ୍ତି । ଗୁଳି ଫୁଟିବା ପରେ କିଛି ଓକିଲ ଧାଁଦୌଡ଼ କରି ପଳାଇଥିଲେ । ସେହିପରି ଅନ୍ୟ ଜଣେ ଲାତ ମଧ୍ୟ ପ୍ରୟାସ କରୁଛନ୍ତି । ପୋଲିସ ଘଟଣାସ୍ଥଳରେ ପହଞ୍ଚି ଭିଡିକୁ ନିୟନ୍ତ୍ରଣ କରିଥିଲେ ।
