ନୂଆଦିଲ୍ଲୀ: ତୃତୀୟ ଥର ପାଇଁ ଟଳିଲା ଦିଲ୍ଲୀ ମେୟର ନିର୍ବାଚନ। ସୋମବାର ଦିଲ୍ଲୀ ନଗର ନିଗମ(ଏମ୍ସିଡି) ବୈଠକରେ ପୁଣି ବିଜେପି-ଆପ୍ ମୁହାଁମୁହିଁ ହୋଇଛନ୍ତି। ସଦନରେ ହଙ୍ଗାମା ଯୋଗୁ ତୃତୀୟ ଥର ପାଇଁ ମେୟର ନିର୍ବାଚନକୁ ସ୍ଥଗିତ ରଖାଯାଇଛି। ଏହା ପୂର୍ବରୁ ମଧ୍ୟ ଦୁଇଥର ମେୟର ନିର୍ବାଚନ ବାତିଲ ହୋଇସାରିଛି।
ମେୟର ପଦବି ପାଇଁ ବିଜେପି ରେଖା ଗୁପ୍ତାଙ୍କୁ ପ୍ରାର୍ଥୀ କରିଥିବା ବେଳେ ଆମ ଆଦ୍ମୀ ପାର୍ଟି ପକ୍ଷରୁ ଶୈଳୀ ଓବରୟଙ୍କୁ ପ୍ରାର୍ଥୀ କରାଯାଇଛି। ପୂର୍ବ ନିର୍ଦ୍ଧାରିତ ଯୋଜନା ଅନୁସାରେ ଆଜି ମେୟର, ଡେପୁଟି ମେୟର ଓ ଏମ୍ସିଡି ସ୍ଥାୟୀ ସମିତିର ୬ ସଦସ୍ୟ ପାଇଁ ନିର୍ବାଚନ ହେବାର ଥିଲା। ହେଲେ ନିର୍ବାଚନ ପୂର୍ବରୁ ସଦନରେ ଉଭୟ ବିଜେପି-ଆପ୍ କାଉନସେଲରଙ୍କ ମଧ୍ୟରେ ଆରୋପ-ପ୍ରତ୍ୟାରୋପ ଆରମ୍ଭ ହୋଇଯାଇଥିଲା। ପ୍ରବଳ ହଟ୍ଟଗୋଳ ହେବାରୁ ସ୍ଥିତି ଏମିତି ହୋଇଥିଲା ଯେ ପୁଣିଥରେ ନିର୍ବାଚନକୁ ସ୍ଥଗିତ ରଖିବାକୁ ପଡ଼ିଛି।
ଏହା ପୂର୍ବରୁ ଜାନୁଆରୀ ୬ ଓ ୨୪ ତାରିଖ ସଦନର ବୈଠକ ଡକାଯାଇଥିଲା। ହେଲେ ଉଭୟ ବିଜେପି ଓ ଆପ୍ କାଉନସିଲରମାନେ ହଟ୍ଟଗୋଳ କରିବାରୁ ସଦନକୁ ସ୍ଥଗିତ ରଖିଥଲେ ପୀଠାସୀନ ଅଧିକାରୀ।
ସୂଚନା ଥାଉକି,ଏମ୍ସିଡିର ମୋଟ ୨୫୦ ବୋର୍ଡରୁ ଆପ୍ ୧୩୪ରେ ବିଜୟ ହାସଲ କରିଥିବା ବେଳେ ବିଜେପିକୁ ୧୦୪ ଆସନ ମିଳିଥି। ସେହିପରି କଂଗ୍ରେସ ମାତ୍ର ୯ଟି ଆସନ ଜିତିଛି।
ଏମ୍ସିଡି ଅଧିନିୟମ ୧୯୫୭ ଅନୁସାରେ, ମେୟର ଓ ଡେପୁଟି ମେୟର ପାଇଁ ନିର୍ବାଚନ ନଗର ନିଗମର ପ୍ରଥମ ବୈଠକରେ ହେବା ଉଚିତ୍। ହେଲେ ଏମ୍ସିଡି ନିର୍ବାଚନକୁ ଦୁଇ ମାସ ବିତିଯାଇଥିଲେ ମଧ୍ୟ ଉଭୟ ଦଳର ଏଭଳି ହଟ୍ଟୋଗଳ ଯୋଗୁ ଏପର୍ଯ୍ୟନ୍ତ ମେୟର ଓ ଡେପୁଟି ମେୟର ନିର୍ବାଚନ ହୋଇପାରି ନାହିଁ।
ପୁଣି ସୁପ୍ରିମକୋର୍ଟ ଯିବ ଆପ୍
ସଦନରେ ହଙ୍ଗାମା ହୋଇ ତୃତୀୟ ଥର ପାଇଁ ମେୟର ନିର୍ବାଚନ ସ୍ଥଗିତ ରହିବା ପରେ ନିରାଶ ହୋଇଛି ଆପ୍। ସୁପ୍ରିମକୋର୍ଟ ଯିବା ଛଡ଼ା ଅନ୍ୟ କୌଣସି ଉପାୟ ନାହିଁ ବୋଲି ଆପ୍ କହିଛି। ଆପ ବିଧାୟକ ଆତିଶୀ କହିଛନ୍ତି ଯେ ବେଆଇନ କାର୍ଯ୍ୟ ହେଉଛି। ଆମ ପାଖରେ ୧୫୧ ଭୋଟ୍ ରହିଛି। ଆମେ ପୁଣିଥରେ ସୁପ୍ରିମକୋର୍ଟ ଯିବୁ ବୋଲି ଆତିଶୀ କହିଛନ୍ତି।
