ନୂଆଦିଲ୍ଲୀ ୧।୧୦: ଦିଲ୍ଲୀ ନଗରନିଗମ (ଏମସିଡି) ମେୟର ନିର୍ବାଚନ ଜାନୁୟାରୀ ୬ ତାରିଖରେ ହେବାର ଥିଲା। ତେବେ ସେଦିନ ଏମସିଡିରେ ଭାରତୀୟ ଜନତାପାର୍ଟି (ବିଜେପି) ଓ ଆମ ଆଦମୀ ପାର୍ଟି (ଆପ) କାଉନସିଲରଙ୍କ ମଧ୍ୟରେ ଜୋରଦାର ହଟ୍ଟଗୋଳ ହୋଇଥିଲା। କାଉନସିଲରଙ୍କ ହୋ ହଲ୍ଲା ଯୋଗୁ ସଦନକୁ ମୁଲତବୀ କରିଦିଆଯାଇଥିଲା। ଫଳରେ ମେୟର ନିର୍ବାଚନ ହୋଇପାରିନଥିଲା। ତେବେ ଦିଲ୍ଲୀ ସରକାର ଲେଫ୍ଟନାଣ୍ଟ ଗଭର୍ଣ୍ଣର (ଏଲଜି)ଙ୍କୁ ପତ୍ର ଲେଖି ୩,୪ ଅଥବା ଫେବୃଆରୀ ୬ ତାରିଖରେ ଏମସିଡି ବୈଠକ ଆୟୋଜନ ଲାଗି ପ୍ରସ୍ତାବ ଦେଇଥିଲେ। ସେହି ଅନୁସାରେ ଦିଲ୍ଲୀ ଏଲଜି ଫେବୃଆରୀ ୬ ତାରିଖ ଦିନ ଏମସିଡି ବୈଠକ ଆୟୋଜନକୁ ମଞ୍ଜୁର କରିଛନ୍ତି।

ବୈଠକ ଲାଗି ଏଲଜିଙ୍କ ମଞ୍ଜୁରୀ ମିଳିବା ପରେ ଫେବୃଆରୀ ୬ ତାରିଖ ଦିନ ଏମସିଡିର ମେୟର ଓ ଉପମେୟର ନିର୍ବାଚନ ହେବା ଏକ ପ୍ରକାର ଚୂଡ଼ାନ୍ତ ହୋଇଛି। ସେହିପରି ଫେବୃଆରୀ ୬ ତାରିଖ ଦିନ ୬ ସଦସୟୀ ସ୍ଥାୟୀ କମିଟି ଗଠନ ହେବ ବୋଲି ମଧ୍ୟ ଆଶା କରାଯାଉଛି। ତେବେ ସବୁଠୁ ଯାହା ଚର୍ଚ୍ଚାର ବିଷୟ ତାହା ହେଉଛି ଜାନୁୟାରୀ ୬ ତାରିଖ ଦିନ ଦିଲ୍ଲୀ ମେୟର ନିର୍ବାଚନ ହେବାକୁ ଥିଲା। ଯାହା ଏବେ ଠିକ୍ ମାସକ ପରେ ୬ ଫେବୃଆରୀରେ ହେବ।

ତେବେ ଜାନୁୟାରୀ ୬ ତାରିଖ ଦିନ ମେୟର ନିର୍ବାଚନ ନ ହୋଇ ପାରିବା ଯୋଗୁ ଏମସିଡିରେ ଆରମ୍ଭ ହୋଇଥିବା ହଟ୍ଟଗୋଳ ସଡକକୁ ପହଞ୍ଚିଥିଲା। ବିଜେପି ଓ ଆପ ମଧ୍ୟରେ ଆରୋପ ପ୍ରତ୍ୟାରୋପର ପର୍ବ ଆରମ୍ଭ ହୋଇଥିବା ବେଳେ ଏଲଜିଙ୍କ ବିରୋଧରେ ଆପ  ଅସାମ୍ବିଧାନିକ କାଉନସିଲରଙ୍କ ନିଯୁକ୍ତି  ଅଭିଯୋଗ ଆଣିଥିଲା। ଦିଲ୍ଲୀ ଏମସିଡିରେ ଆପ୍ ୧୩୪ଟି ଆସନ ଜିତିଛି। ବିଜେପିକୁ ୧୦୪ଟି ଆସନ ମିଳିଛି। ତେବେ ବିଜେପି ମେୟର ପ୍ରାର୍ଥୀ ଦେବା ଯୋଗୁ ବିବାଦର ସୂତ୍ରପାତ ହୋଇଛି। ମେୟର ପଦବୀ ଲାଗି ବିଜେପି ଓ ଆପ ମଧ୍ୟରେ ଏବେ ଜୋରଦାର ପ୍ରତିଦ୍ୱନ୍ଦ୍ୱୀତା ହେଉଛି।

ତେବେ ଫେବୃଆରୀ ୬ ତାରିଖ ଦିନ ଏମସିଡିର ବୈଠକ ହେବାକୁ ଯାଉଛି। ସେହି ଦିନ ମେୟର ସମେତ ଉପମେୟର ନିର୍ବାଚନ ସାଙ୍ଗକୁ ସ୍ଥାୟୀ କମିଟି ମନୋନୟନ ମଧ୍ୟ ହେବ ବୋଲି ଆଶା କରାଯାଉଛି।