ଲକ୍ଷ୍ନୌ: ଲକ୍ଷ୍ନୌ ମଇଦାନ୍ରେ ଦିଲ୍ଲୀର ହାଲ୍ଲାବୋଲ। ସୁପର ଜାଏଣ୍ଟକୁ ୬ ୱିକେଟ୍ରେ ପରାସ୍ତ କଲା ଦିଲ୍ଲୀ କ୍ୟାପିଟାଲ୍। ଆଇପିଏଲ୍ର ୨୬ ତମ ମ୍ୟାଚ୍ର ଲକ୍ଷ୍ନୌ ସୁପର ଜାଏଣ୍ଟ ପ୍ରଥମେ ବ୍ୟାଟିଂ କରି ୧୬୬ ରନ୍ କରିଥିଲା। ଜବାବରେ ଦିଲ୍ଲୀ ୧୮.୧ ଓଭରରେ ୪ ୱିକେଟ୍ ହରାଇ ୧୭୦ ରନ୍ କରି ମ୍ୟାଚ୍ ଜିତି ନେଇଛି।
ଦିଲ୍ଲୀ ପକ୍ଷରୁ ଜେକ୍ ଫ୍ରେଜର ମ୍ୟାକ୍ଗର୍କ ସର୍ବାଧିକ ୫୫ ରନ୍ କରିଥିବା ବେଳେ କ୍ୟାପ୍ଟେନ୍ ଋଷବ ପନ୍ତ ୪୨ ଓ ପୃଥ୍ୱୀ ଶ ୩୨ ରନ୍ କରିଛନ୍ତି।
ଲକ୍ଷ୍ନୌର ୧୬୮ ରନ୍ ଟାର୍ଗେଟ୍କୁ ପିଛା କରି ବ୍ୟାଟିଂ କରିବାକୁ ଆସିଥିବା ଦିଲ୍ଲୀକୁ ଆଜି ପୁଣି ନିରାଶ କରିଥିଲେ ଓପନର ବ୍ୟାଟର ଡେବିଡ୍ ୱାର୍ଣ୍ଣର। ସେ ମାତ୍ର ୮ ବଲ୍ ଖେଳି ୯ କରି ଆଉଟ୍ ହୋଇଥିଲେ। ସେହିପରି ପୃଥ୍ୱୀ ଶ ଦଳ ପାଇଁ ୩୨ ରନ୍ର ଯୋଗଦାନ ଦେବା ପରେ ସେ ମଧ୍ୟ ଆଉଟ୍ ହୋଇଥିଲେ। ଏହାପରେ ଜେକ୍ ଫ୍ରେଜର ମ୍ୟାକ୍ଗର୍କ ଓ କ୍ୟାପ୍ଟେନ୍ ଋଷବ ପନ୍ତ ଦୁହେଁ ମିଶି ଦଳ ସ୍କୋରକୁ ଆଗକୁ ବଢ଼ାଇଥିଲେ। ଦୁହେଁ ଦ୍ରୁତ ଗତିରେ ରନ୍ କରିଥିଲେ।
ମ୍ୟାକ୍ଗର୍କ ଓ ପନ୍ତଙ୍କ ୱିକେଟ୍ ଯିବା ପରେ ତ୍ରିଷ୍ଟାନ ଷ୍ଟବ୍(୯ ବଲ ୧୫ ରନ୍) ଓ ସାଇ ହୋପ୍(୧୦ ବଲ୍ ୧୧ ରନ୍) ଶେଷ ପର୍ଯ୍ୟନ୍ତ ବ୍ୟାଟିଂ କରି ମ୍ୟାଚ୍ ଜିତାଇଥିଲେ।
ଅନ୍ୟପଟେ ବ୍ୟାଟିଂ ଭଳି ଆଜି ବୋଲିଂରେ ବି ଖରାପ ପ୍ରଦର୍ଶନ କରିଛି ଲକ୍ଷ୍ନୌ। କେବଳ ରବି ଭିଷ୍ଣୋଇ ୪ ଓଭର କରି ମାତ୍ର ୨୫ ରନ୍ ଦେଇ ୨ଟି ୱିକେଟ୍ ନେଇଥିବା ବେଳେ ଅନ୍ୟ କୌଣସି ବୋଲର ସେତେଟା ଭଲ ପ୍ରଦର୍ଶନ କରିପାରି ନଥିଲେ। ନବୀନ ଉଲ ହକ୍ ଓ ୟସ୍ ଠାକୁର ଗୋଟିଏ ଲେଖାଏ ୱିକେଟ୍ ନେଇଥିଲେ।
