ନୂଆଦିଲ୍ଲୀ: ପ୍ରତିରକ୍ଷା ମନ୍ତ୍ରାଳୟ ମଙ୍ଗଳବାର ହିନ୍ଦୁସ୍ତାନ ଏୟରୋନଟିକ୍ସ ଲିମିଟେଡ୍ ସହ ୭୦ ଏଚଟିଟି-୪୦ ବେସିକ୍ ଟ୍ରେନର ବିମାନ ପାଇଁ ବୁଝାମଣା ସ୍ୱାକ୍ଷର କରିଛି । ବାୟୁସେନା ପାଇଁ ୬,୮୦୦ କୋଟି ଟଙ୍କା ଖର୍ଚ୍ଚ କରିବ ମନ୍ତ୍ରାଳୟ ।

ଏହାସହ ପ୍ରତିରକ୍ଷା ମନ୍ତ୍ରାଳୟ ୩,୧୦୦ କୋଟି ଟଙ୍କାରେ ତିନି କେଡେଟ୍ ଟ୍ରେନିଂ ଶିପ୍ ଅଧିଗ୍ରହଣ ପାଇଁ ଲାର୍ସନ ଏବଂ ଟୁବ୍ରୋ ସହ ବୁଝାମଣାକୁ ଚୂଡାନ୍ତ ରୂପ ଦିଆଯାଇଛି । ଦୁଇ ଚୁକ୍ତିକୁ ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ଥିବା କମିଟି ସିସିଏସ (କ୍ୟାବିନେଟ୍ କମିଟି ଅନ୍ ସିକ୍ୟୁରିଟି) ମାର୍ଚ୍ଚ ୧ରେ ମଞ୍ଜୁରୀ ଦେଇଥିଲା । ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ ମଙ୍ଗଳବାର ଏହି ସୂଚନା ଦିଆଯାଇଛି ।

ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ ଜାରି ବୟାନରେ କୁହାଯାଇଛି ଯେ ଏଚଏଏଲ ୭୦ ଏଚଟିଟି-୪୦ ଏୟାରକ୍ରାଫ୍ଟଟ ଅସନ୍ତା ଛଅ ବର୍ଷରେ ଉପଲବ୍ଧ କରାଇବ । ସେହିପରି ଶିପ୍ ଗୁଡିକୁ ୨୦୨୬ ସୁଦ୍ଧା ହସ୍ତାନ୍ତର କରାଯିବ । ଏଚଏଏଲ ଏବଂ ଏଲ ଆଣ୍ଡ ଟି ସହ ଚୁକ୍ତି ଉପରେ ହସ୍ତାକ୍ଷର ସମୟରେ ରକ୍ଷା ସଚିବ ଗିରିଧର ଅରାମାନେ ଏବଂ ଅନ୍ୟ ଅଧିକାରୀ ଉପସ୍ଥିତ ରହିଥିଲେ ।