ନୂଆଦିଲ୍ଲୀ ୧୯/୫: ଇସ୍ରାଏଲ୍ ସେନା ଗାଜା ଉପରେ ସାଙ୍ଘାତିକ ହମଲା କରିଛି । ଏହି ମସାଇଲ୍ ଆକ୍ରମଣରେ ୮୦ରୁ ଅଧିକ ଜଣଙ୍କ ମୃତ୍ୟୁ ହୋଇଛି । ଏହି ଆତ୍ମଘାତୀ ହମଲାରେ ଶହେରୁ ଅଧିକ ଲୋକ ଆହତ ହୋଇଛନ୍ତି । ଇସ୍ରାଏଲୀ ସେନା ଆବାସିକସ୍ଥଳୀଙ୍କୁ ଟାର୍ଗେଟ୍ କରି ଯୁଦ୍ଧ ବିମାନରେ ଘନଘନ ମିସାଇଲ ମାଡ଼ କରିଥିଲା । ଏମିତି କି ପାଣି ସଂଗ୍ରହ କରୁଥିବା ଲୋକଙ୍କ ଉପରେ ବି ହମ୍ଲା ହୋଇଥିଲା ।
ସୂଚନା ମୁତାବକ, ଶନିବାର ସକାଳେ ଉତ୍ତର ଗାଜାସ୍ଥିତ କମଲ ଅଦ୍ୱାନ ହସ୍ପିଟାଲ ନିକଟବର୍ତ୍ତୀ ଆବାସିକ ସ୍ଥଳୀ ଉପରେ ପ୍ରଥମ ଆକ୍ରମଣ ହୋଇଥିଲା । ଏହାଯୋଗୁ ମହିଳା ଓ ପିଲାଙ୍କୁ ମିଶାଇ ମୋଟ ୧୫ଜଣଙ୍କ ମୃତ୍ୟୁ ଘଟିଥିଲା । ଜଣେ ସ୍ଥାନୀୟ ଲୋକଙ୍କ କହିବା ମୁତାବକ ଇସ୍ରାଏଲ୍ର ଆକ୍ରମଣରେ ଏକ ଆବାସିକ କୋଠା ସମ୍ପୂର୍ଣ୍ଣ ଧୂଳିସାତ୍ ହୋଇଯାଇଛି । ଏହା ମଧ୍ୟରେ ଅନେକ ଲୋକ ଚାପିହୋଇ ରହିଥିଲେ । ଆହୁରି ଅନେକ ପରିବାର ଭଗ୍ନାବଶେଷ ତଳେ ଚାପିହୋଇ ରହିଛନ୍ତି । ଅଧିକାଂଶ ଲୋକ ସେମାନଙ୍କ ଘର ଭିତରେ ଥିଲା ବେଳେ ମିସାଇଲ ଆକ୍ରମଣ ହୋଇଥିଲା । ଫଳରେ ସେମାନେ ବାହାରକୁ ବାହାରିବା ପାଇଁ ସମୟ ପାଇ ନ ଥିଲେ । ତା’ଛଡ଼ା ପୂର୍ବରୁ ଆକ୍ରମଣ ନେଇ କୌଣସି ସୂଚନା ବି ନ ଥିଲା ।
ଉତ୍ତର ଗାଜାର ଜବାଲିଆ ଶିବିରର ପଶ୍ଚିମ ଭାଗରେ ଥିବା ଫଲୁଜା ଅଞ୍ଚଳରେ ମଧ୍ୟ ଆକ୍ରମଣ ହୋଇଛି । ଲୋକମାନେ ପାନୀୟ ଜଳ ସଂଗ୍ରହ କରୁଥିବା ବେଳେ ଗୁଳିଗୋଳା ଏବଂ ବୋମା ଦ୍ୱାରା ହମ୍ଲା ହୋଇଥିଲା । ଏଥିରେ ମହିଳା ଓ ପିଲାଙ୍କୁ ମିଶାଇ ମୋଟ୍ ୮ ଜଣ ପ୍ରାଣ ହରାଇଥିବା ବେଳେ ୧୦ ଜଣ ଆହତ ହୋଇଛନ୍ତି । ଜବାଲିଆ କ୍ୟାମ୍ପସ୍ଥିତ ଉଦ୍ଧାର କେନ୍ଦ୍ର ଉପରେ ହମ୍ଲା ହୋଇଥିଲା । ଇସ୍ରାଏଲ ସେନା ଉକ୍ତ ଅଞ୍ଚଳରୁ ପଳାଇବା ପରେ ଲୋକମାନେ ଉଦ୍ଧାର କେନ୍ଦ୍ରରୁ ବାହାରକୁ ବାହାରିଥିଲେ । ଏହି ସମୟରେ ସେମାନଙ୍କ ଉପରେ ପୁଣି ଏୟାରଷ୍ଟ୍ରାଇକ୍ ହୋଇଥିଲା । ଏଥିରେ ୧୫ ଜଣ ପ୍ରାଣ ହରାଇଛନ୍ତି ।
ଗତବର୍ଷ ଡିସେମ୍ବରରେ ଜବାଲିଆ କ୍ୟାମ୍ପ୍ ଉପରେ ହୋଇଥିବା ହମଲାରେ ଅତିକମ୍ରେ ୯୦ ପାଲେଷ୍ଟିନୀୟଙ୍କ ମୃତ୍ୟୁ ହୋଇଥିଲା । ଚଳିତବର୍ଷ ଫେବ୍ରୁଆରୀ ଆରମ୍ଭରେ ଇସ୍ରାଏଲ ସେନା ଗାଜାର ଉତ୍ତର ଭାଗରୁ ଚାଲିଯାଇଥିଲେ । କିନ୍ତୁ କିଛିଦିନ ହେଲା ଏଠାରେ ଆକ୍ରମଣ ପୁଣି ବଢ଼ିଛି ।
ଗତବର୍ଷ ଅକ୍ଟୋବର ୭ରୁ ଗାଜାରେ ଇସ୍ରାଏଲ-ହମାସ୍ ଯୁଦ୍ଧ ଜାରି ରହିଛି । ଏହାଦ୍ୱାରା ଅତିକମ୍ରେ ୩୫, ୩୮୬ ପାଲେଷ୍ଟିନୀୟ ପ୍ରାଣ ହରାଇଥିଲା ବେଳେ ୭୯, ୩୬୬ ଜଣ ଆହତ ହୋଇଥିବା ଗାଜା ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି । ଗତ ୨୪ ଘଣ୍ଟାରେ ୮୩ ଲୋକଙ୍କ ମୃତ୍ୟୁ ହୋଇଥିବା ବେଳେ ୧୦୫ ଜଣ ଆହତ ହୋଇଥିବା ମନ୍ତ୍ରଣାଳୟ ଏହାର ରିପୋର୍ଟରେ ଦର୍ଶାଇଛି ।