ଭୁବନେଶ୍ୱର ୦୮/୦୪: ଡେରିରେ ହେଉ ପଛେ ଚେତିଛି କମିଶନରେଟ୍ ପୋଲିସ । ଭିଜିଲାନ୍ସ ଜାଲରେ ଖଣ୍ଡଗିରି ଥାନା ସବ୍‌ଇନ୍ସପେକ୍ଟର ସୁଶାନ୍ତ କୁମାର ସ୍ୱାଇଁ ପଡିବା ପରେ ଆକ୍ସନ ମୁଡରେ ରାଜ୍ୟ ପୋଲିସ ବିଭାଗ । ବଦଳି ନିର୍ଦ୍ଦେଶ ସତ୍ତ୍ୱେ ଦେଢ଼ ମାସ ଧରି ଥାନାରୁ ଯାଉନଥିବା ଏସ୍‌ଆଇ ଓ ଏଏସ୍‌ଆଇ ଅଧିକାରୀଙ୍କୁ ତାଗିଦ୍‌ କରିଛନ୍ତି ଭୁବନେଶ୍ୱର ଡିସିପି ପ୍ରତୀକ ସିଂ ।

ସେ ନିର୍ଦ୍ଦେଶ ଦେଇଛନ୍ତି, ଆସନ୍ତା ୩ ଦିନ ଭିତରେ ନୂଆ ଥାନାରେ ଦାୟିତ୍ୱ ନିଅ । ନହେଲେ, ସମ୍ପୃକ୍ତ ଥାନା ଅଧିକାରୀଙ୍କ ଉପରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନିଆଯିବ । ଗିରଫ ହୋଇଥିବା ଶ୍ରୀ ସ୍ୱାଇଁ ବଦଳି ନିୟମକୁ ବେଖାତିର୍‌ କରିଥିବାରୁ ଏହି ଫତୁଆ ଜାରି କରିଛି କମିଶନରେଟ୍ ପୋଲିସ ।

କମିଶନରେଟ୍‌ ପୋଲିସର ସୂଚନା ମୁତାବକ, ମୋଟ ୨୪ ଜଣ ସବ୍‌ଇନ୍ସପେକ୍ଟର ବଦଳି ନିୟମକୁ ବେଖାତିର୍‌ କରିଛନ୍ତି । ଏଥିରେ ୬ଜଣ ମହିଳା ସବ୍‌ଇନ୍ସପେକ୍ଟର ଅଛନ୍ତି । ସେହିପରି ୩ଜଣ ଏଏସ୍‌ଆଇ ମଧ୍ୟ ବଦଳି ସତ୍ତେ୍ୱ ନୂଆ ଥାନାରେ ଯୋଗ ଦେଇନାହାନ୍ତି । ଡିସିପି ତାଗିଦ୍‌ କରିଛନ୍ତି, ଆସନ୍ତା ୩ ଦିନ ଭିତରେ ଯଦି ଏମାନଙ୍କୁ ଅନ୍ୟ ଥାନାରେ ଯୋଗ ଦେବାକୁ ପଡ଼ିବ ।

ଯଦି କେହି ଏସ୍‌ଆଇ କିମ୍ବା ଏଏସ୍‌ଆଇ ଗାଦି ନଛାଡ଼ନ୍ତି ତେବେ ସେହି ଥାନାର ଅଧିକାରୀ ଅଥବା ବିଭାଗୀୟ ମୁଖ୍ୟଙ୍କୁ ଏନେଇ ଉପଯୁକ୍ତ କାରଣ ଦେବାକୁ ପଡ଼ିବ । କାରଣ ଗ୍ରହଣଯୋଗ୍ୟ ନହେଲେ ସମ୍ପୃକ୍ତ ଥାନା ଅଧିକାରୀଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।

ଫେବ୍ରୁଆରୀ ୧୬ ତାରିଖରେ ଏସ୍‌ଆଇସ୍ତରରେ ଏକ ବଡ଼ଧରଣର ଅଦଳବଦଳ ହୋଇଥିଲା । ଭୁବନେଶ୍ୱର ଓ କଟକ ସହରାଞ୍ଚଳ ଜିଲ୍ଲା ପୁଲିସ (ୟୁପିଡି)ରେ ଜଣେ ଇନ୍ସପେକ୍ଟରଙ୍କୁ ମିଶାଇ ମୋଟ୍‌ ୮୮ ଜଣଙ୍କ ବଦଳି ହୋଇଥିଲା । ଏଥିରେ ନୂଆ କରି କମିଶନରେଟ୍‌ ପୁଲିସକୁ ଆସିଥିବା ୬୨ଜଣ ଏସ୍‌ଆଇଙ୍କ ନାମ ଥିଲା । ପ୍ରକାଶିତ ଏକ ବିଜ୍ଞପ୍ତି ମୁତାବକ କମିଶନରେଟ୍‌ ପୁଲିସ୍‌ର ୨ଚର୍ଚ୍ଚିତ ଏସ୍‌ଆଇଙ୍କ ବଦଳି ହୋଇଛି । ଓସିଓପି/ସାଇବର ସେଲ୍‌ରେ ଥିବା ଏସ୍‌ଆଇ ଗୟାନନ୍ଦ ସାହାଙ୍କୁ ଲକ୍ଷ୍ମୀସାଗର ଥାନାଙ୍କୁ ବଦଳି କରାଯାଇଛି । ସେହି ଥାନାରେ ଥିବା ଏସ୍‌ଆଇ ଶଶୀକାନ୍ତ ରାଉତଙ୍କ ସ୍ପେଶାଲ୍‌ ସ୍କ୍ୱାଡ୍‌କୁ ବଦଳି ହୋଇଛି ।