ନାଗପୁର: ରୋହିତ ଶର୍ମାଙ୍କ ଅଧିନାୟକତ୍ଵ ଶତକୀୟ ଇନିଂସ ଏବଂ ଅଲରାଉଣ୍ଡର ରବୀନ୍ଦ୍ର ଜାଡେଜାଙ୍କ ଉଭୟ ବୋଲିଂ ଏବଂ ବ୍ୟାଟିଂରେ ପ୍ରଭାବଶାଳୀ ପ୍ରଦର୍ଶନ ବଳରେ ଭାରତ ନାଗପୁର ଟେଷ୍ଟରେ ଦୃଢ ସ୍ଥିତିରେ ରହିଛି। ଦ୍ଵିତୀୟ ଦିନର ଖେଳ ଶେଷ ସୁଦ୍ଧା ଭାରତ ୭ ଓ୍ଵିକେଟ୍ ହରାଇ ୩୨୧ ରନ କରିଛି। ହାତରେ ଆହୁରି ୩ଟି ଓ୍ଵିକେଟ୍ ବାକି ଥିବା ବେଳେ ଦଳ ଭ୍ରମଣକାରୀ ଅଷ୍ଟ୍ରେଲିଆଠୁ ପ୍ରଥମ ଇନିଂସରେ ୧୪୪ ରନର ଗୁରୁତ୍ଵପୂର୍ଣ୍ଣ ଅଗ୍ରଣୀ ହାସଲ କରିଛି। ଜାଡେଜା ୬୬ ଏବଂ ଅକ୍ଷର ପଟେଲ୍ ୫୨ ରନ କରି କ୍ରିଜରେ ଅଛନ୍ତି। ଦ୍ଵିତୀୟ ଦିନରେ ଅଧିନାୟକ ରୋହିତ ଶର୍ମା ଦମଦାର ୧୨୦ ରନର ଶତକୀୟ ଇନିଂସ ଖେଳିଛନ୍ତି। ରବୀନ୍ଦ୍ର ଜାଡେଜାଙ୍କ ପରେ ଅକ୍ଷର ପଟେଲ୍ ମଧ୍ୟ ଅର୍ଦ୍ଧଶତକୀୟ ଇନିଂସ ଖେଳି ନାଗପୁର ଟେଷ୍ଟରେ ଭାରତକୁ ଫ୍ରଣ୍ଟଫୁଟରେ ରଖିଛନ୍ତି। ଏହା ପୂର୍ବରୁ ଅଷ୍ଟ୍ରେଲିଆ ପ୍ରଥମ ଇନିଂସରେ ୧୭୭ ରନରେ ଅଲଆଉଟ୍ ହୋଇଥିଲା।

ପ୍ରଥମ ଦିନର ଅସମାପ୍ତ ଖେଳ ୭୭/୧ରୁ ଭାରତ ଖେଳା ଆରମ୍ଭ କରିଥିଲା। କ୍ରିଜରେ ଥିଲେ ରୋହିତ ଶର୍ମା(୫୬) ଏବଂ ରବିଚନ୍ଦ୍ରନ ଅଶ୍ଵିନ(୦)। ଦୁଇ ଖେଳାଳି ଦ୍ଵିତୀୟ ଓ୍ଵିକେଟ୍ ପାଇଁ ୪୨ ରନ ଯୋଡିଥିଲେ। ଦଳୀୟ ସ୍କୋର ୧୧୮ ରନରେ ଅଶ୍ଵିନ(୨୩) ଆଉଟ୍ ହୋଇଥିଲେ। ଏହା ପରେ ଭାରତ ସଅଳ ତିନୋଟି ଓ୍ଵିକେଟ୍ ହରାଇଥିଲା। ଚେତେଶ୍ଵର ପୂଜାରା(୭)ଙ୍କ ପରେ ବିରାଟ କୋହଲି(୧୨) ମଧ୍ୟ ଅଧିକ ସମୟ କ୍ରିଜରେ ତିଷ୍ଠି ପାରିନଥିଲେ। ପଦାର୍ପଣ ଟେଷ୍ଟ ଖେଳୁଥିବା ସୂର୍ଯ୍ୟକୁମାର ଯାଦବ(୮) ମିଳିଥିବା ସୁଯୋଗର ଫାଇଦା ଉଠାଇ ପାରିନଥିଲେ। ଅନ୍ୟପଟେ ଅଧିନାୟକ ରୋହିତ ଶର୍ମା କ୍ରିଜରେ ଜମି ରହିଥିଲେ। ୧୬୮ ରନରେ ଭାରତ ୫ ଓ୍ଵିକେଟ୍ ହରାଇ ଅଡୁଆ ସ୍ଥିତିରେ ରହିଥିଲା। ତେବେ ରବୀନ୍ଦ୍ର ଜାଡେଜାଙ୍କ ସହ ମିଶି ରୋହିତ ଶର୍ମା ଦଳର ସ୍ଥିତିରେ ସୁଧାର ଆଣିଥିଲେ। ଏହି କ୍ରମରେ ରୋହିତ ଶର୍ମା ଟେଷ୍ଟରେ ନବମ ଶତକ ହାସଲ କରିଥିଲେ। ଜାଡେଜାଙ୍କ ସହ ମିଶି ସେ ଷଷ୍ଠ ଓ୍ଵିକେଟ୍ ପାଇଁ ୬୧ ରନ ଯୋଡିଥିଲେ। ରୋହିତ ୧୫ ଚୌକା ଏବଂ ୨ ଛକା ଜରିଆରେ ୧୨୦ ରନ କରି ଆଉଟ୍ ହୋଇଥିଲେ। ସୂର୍ଯ୍ୟଙ୍କ ପରି ଶ୍ରୀକର ଭରତ ମଧ୍ୟ(୮) ମିଳିଥିବା ସୁଯୋଗର ଫାଇଦା ଉଠାଇ ପାରିନଥିଲେ।

ଏହା ପରେ ଜାଡେଜା ଏବଂ ଅକ୍ଷର ପଟେଲ୍ ଦମଦାର ବ୍ୟାଟିଂ କରି ଭାରତର ଇନିଂସକୁ ସମ୍ଭାଳିଥିଲେ। ଦୁଇ ବ୍ୟାଟର ଧୈର୍ଯ୍ୟପୂର୍ଣ୍ଣ  ବ୍ୟାଟିଂ କରି ନିଜର ଅର୍ଦ୍ଧଶତକ ହାସଲ କରିଛନ୍ତି। ଦ୍ଵିତୀୟ ଦିନରେ ଭାରତର ଆଉ କୌଣସି କ୍ଷତି ହେବାକୁ ଦେଇ ନାହାନ୍ତି। ଫଳରେ ଭାରତ ଦ୍ଵିତୀୟ ଦିନର ଷ୍ଟମ୍ପ ଅପସାରଣ ସୁଦ୍ଧା ୭ ଓ୍ଵିକେଟ୍ ହରାଇ ୩୨୧ ରନ କରିଛି। । ଜାଡେଜା ୬୬ ଏବଂ ଅକ୍ଷର ପଟେଲ୍ ୫୨ ରନ କରି କ୍ରିଜରେ ଅଛନ୍ତି। ଭାରତ ହାତରେ ଆହୁରି ୩ ଓ୍ଵିକେଟ୍ ଥାଇ ପ୍ରଥମ ଇନିଂସରେ ୧୪୪ ରନ ଅଗ୍ରଣୀ ହାସଲ କରିଛି।

ଅଷ୍ଟ୍ରେଲିଆ ତରଫରୁ ଟଡ ମୁରଫି ଚମତ୍କାର ବୋଲିଂ କରି ୮୨ ରନ ଦେଇ ୫ ସଫଳତା ପାଇଛନ୍ତି। ଅଧିନାୟକ ପାଟ୍ କମିନ୍ସ ଏବଂ ନାଥନ ଲିୟନଙ୍କୁ ଗୋଟିଏ ଲେଖାଏଁ ସଫଳତା ମିଳିଛି। ଏହା ପୂର୍ବରୁ ଅଷ୍ଟ୍ରେଲିଆ ପ୍ରଥମ ଇନିଂସରେ ୧୭୭ ରନରେ ଅଲଆଉଟ୍ ହୋଇଥିଲା।