ଦୁବାଇ, ୦୫।୧୧:   ସନରାଇଜର୍ସ ହାଇଦ୍ରାବାଦ ମୁମ୍ବାଇ ଇଣ୍ଡିଆନ୍ସକୁ ପରାସ୍ତ କରି ପ୍ଲେ-ଅଫରେ ପ୍ରବେଶ କରିଛି । ଗୁରୁବାର ପ୍ଲେ-ଅଫର ପ୍ରଥମ ମୁକାବିଲା ଖେଳାଯିବ । ଏହି ମ୍ୟାଚରେ ମୁହାଁମୁହିଁ ହେବେ ମୁମ୍ବାଇ ଇଣ୍ଡିଆନ୍ସ ଓ ଦିଲ୍ଲୀ କ୍ୟାପିଟାଲ୍ସ । ତେବେ ସନରାଇଜର୍ସ ମୁମ୍ବାଇକୁ ପରାସ୍ତ କରିବା ପାଇଁ ଏକ ସ୍ୱତନ୍ତ୍ର ରଣନୀତି ପ୍ରସ୍ତୁତ କରିଥିଲା । ଯାହା ଉପରୁ ଗୁମର ଫିଟାଇଛନ୍ତି ଦଲର ଅଧିନାୟକ ଡେଭିଡ ଓ୍ୱାର୍ଣ୍ଣର ।

ଓ୍ୱାର୍ଣ୍ଣର କହିଛନ୍ତି ଯେ, କେବେ ବି ହାର୍ ମାନିବା ଅନୁଚିତ । ଏହି ମନୋବଳ ନେଇ ଦଲ ପ୍ଲେ-ଅଫରେ ପ୍ରବେଶ କରିଛି । ପଞ୍ଜାବଠୁ ହାରିବା ପରେ ବିଭିନ୍ନ ଭୁଲକୁ ଦଳ ସୁଧାରିବକୁ ଚେଷ୍ଟା କରିଥିଲା । ଏବେ ଭଲ ଲାଗୁଛି ।  ଦଳ  ପଏଣ୍ଟ ତାଲିକାରେ ଶୀର୍ଷରେ ଥିବା ମୁମ୍ବାଇକୁ ହାଇଦ୍ରାବାଦ ୧୦ ଓ୍ୱିକେଟରେ ପରାସ୍ତ କରିଥିଲା । ମୁମ୍ବାଇ କିଛି ଖେଳାଳିଙ୍କୁ ବିଶ୍ରାମ ଦେଇଥିଲା । କିନ୍ତୁ ୧୫୦ ରନରେ ବିରୋଧୀଙ୍କୁ ରୋକିବା ପାଇଁ ଯୋଜନା ହୋଇଥିଲା । ଯାହା ସଫଳ ସାବ୍ୟସ୍ତ ହୋଇଥିଲା । ସହବାଜ ନଦୀମ ଭଲ ବୋଲିଂ କରିଥିଲେ ।

ସେ ଆହୁରି କହିଛନ୍ତି ଯେ, ଭଲ ବୋଲିଂ ପରେ ଦ୍ୱିତୀୟ ଇନିଂସରେ ବ୍ୟାଟସମ୍ୟାନମାନେ ଯୋଜନା ଅନୁସାରେ ଖେଳିଥିଲେ । ଦଳର କିଛି ଖେଳାଳି ଆହତ ଥିଲେ ମଧ୍ୟ ସେମାନଙ୍କ ଭାବନା ଟିମ୍ ସହ ଥିଲା । ସେମାନଙ୍କ ପାଇଁ ଜିତିବା ନେଇ ଖେଳାଳିମାନେ ଆଶା ରଖିଥିଲେ । ଯଦି ଆସନ୍ତା ମ୍ୟାଚରେ ମଧ୍ୟ ଖେଳାଳିମାନେ ଏପରି ପ୍ରଦର୍ଶନ କରିବେ ତେବେ ଦଳ ଫାଇନାଲରେ ମଧ୍ୟ ପ୍ରବେଶ କରିବ ବୋଲି ସେ କହିଛନ୍ତି ।