ନୂଆଦିଲ୍ଲୀ ୨୪।୦୯: ବିୟର୍ ପିଇବାରେ ରେକର୍ଡ । ବର୍ଷକୁ ଜଣେ ବ୍ୟକ୍ତି ପିଅନ୍ତି ୧୪୦ ଲିଟର । ଶୁଣି ଆଶ୍ଚର୍ଯ୍ୟ ଲାଗୁଥିଲେ ବି ସତ । ଏହି ଦେଶଟି ହେଉଛି ଚେକ୍ ରିପବ୍ଲିକ ।  ଓ୍ବାର୍ଲ ଅଫ୍ ଷ୍ଟାଟିଷ୍ଟିକ୍ସର ରିପୋର୍ଟ ଅନୁଯାୟୀ, ଏମିତି କେବଳ ଗୋଟିଏ ଦେଶ ନୁହେଁ ଏହି ଲିଷ୍ଟରେ ଅଛନ୍ତି ୧୦ଟି ଦେଶର ଲୋକ । ଆସନ୍ତୁ ଜାଣିବା ଏହି ଦେଶ ଗୁଡିକ ବିଷୟରେ…

ସବୁଠାରୁ ଅଧିକ ବିୟର ଚେକ୍ ରିପବ୍ଲିକରେ ପିଆଯାଇଥାଏ ।  ଏଠାକାର ଲୋକମାନେ ବିୟର ପିଇବାକୁ ଅଧିକ ପସନ୍ଦ କରନ୍ତି  । ଜାଣି ଆଶ୍ଚର୍ଯ୍ୟ ହେବେ ଯେ ଚେକ୍ ରିପବ୍ଲିକରେ ଜଣେ ବ୍ୟକ୍ତି ବାର୍ଷିକ ୧୪୦ ଲିଟର ବିୟର ପିଇଯାଆନ୍ତି ।  ଯଦି ମାସିକ ହିସାବ କରାଯାଏ, ତେବେ ଜଣେ ବ୍ୟକ୍ତି ମାସକରେ ସାଢେ ୧୧ ଲିଟର ବିୟର ପିଇଥାନ୍ତି । 

ରିପୋର୍ଟ ଅନୁଯାୟୀ, ସର୍ବାଧିକ ବିୟର ପିଉଥିବା ୧୦ ଦେଶ ମଧ୍ୟରୁ ୯ଟି ହେଉଛି ୟୁରୋପର । ସବୁଠାରୁ ଟପ୍ରେ ଚେକ ରିପବ୍ଲିକ୍ ରହିଥିବା ବେଳେ ଏହା ପଛକୁ ରହିଛି ଅଷ୍ଟ୍ରିଆ, ରୋମାନିଆ, ଜର୍ମାନୀ, ପୋଲାଣ୍ଡ, ଆୟର୍ଲାଣ୍ଡ, ସ୍ପେନ୍, କ୍ରୋଏସିଆ ଏବଂ ଲାଟଭିଆ । ଟପ୍ ୧୦ ଦେଶ ମଧ୍ୟରେ ଏକମାତ୍ର ଅଣ-ୟୁରୋପୀୟ ଦେଶ ହେଉଛି ନାମିବ୍ୟା । ଏଠାକାର ପ୍ରତ୍ୟେକ ବ୍ୟକ୍ତି ଗୋଟିଏ ବର୍ଷରେ ୯୫.୫ ଲିଟର ପିଇଥାନ୍ତି ବିୟର ।

ଚେକ୍ ରିପବ୍ଲିକ ପରେ ଦ୍ୱିତୀୟ ସ୍ଥାନରେ ରହିଛି ଅଷ୍ଟ୍ରିଆ । ଏହି ଦେଶର ପ୍ରତ୍ୟେକ ବ୍ୟକ୍ତି ବର୍ଷକରେ ୧୦୭.୮ ଲିଟର ବିୟର ପିଅନ୍ତି । ସେହିପରି ରୋମାନିଆରେ ଜଣେ ବ୍ୟକ୍ତି ବାର୍ଷିକ ୧୦୦.୩ ଲିଟର, ଜର୍ମାନୀରେ ୯୯.୮ ଲିଟର ଏବଂ ପୋଲାଣ୍ଡରେ ୯୭.୭  ଲିଟର ବିୟର୍ ପିଇଥାନ୍ତି । ଆୟର୍ଲାଣ୍ଡର ପ୍ରତ୍ୟେକ ବ୍ୟକ୍ତି ବାର୍ଷିକ ୯୨.୯ ଲିଟର ଏବଂ  ସ୍ପେନରେ ବାର୍ଷିକ ମୁଣ୍ଡପିଛା ବିୟର  ପିଇଥାନ୍ତି ୮୮.୮ ଲିଟର । ସେହିପରି କ୍ରୋଏସିଆରେ ୮୫.୫  ଲିଟର ଏବଂ ଲାଟଭିଆରେ ୮୧.୪ ଲିଟର ।

ଏହାପଛକୁ ଅଛନ୍ତି ଇଷ୍ଟୋନିଆ (୮୦.୫ ଲିଟର), ସ୍ଲୋଭେନିଆ (୮୦ ଲିଟର), ନେଦରଲ୍ୟାଣ୍ଡ (୭୯.୩ ଲିଟର), ବୁଲଗେରିଆ (୭୮.୭ ଲିଟର), ପାନାମା (୭୮.୩ ଲିଟର), ଅଷ୍ଟ୍ରେଲିଆ (୭୫.୧ ଲିଟର) ଏବଂ ମୁଣ୍ଡପିଛା ବିୟର ଲିଥୁଆରେ ପିଅନ୍ତି (୭୪.୪ ଲିଟର) । ବିୟର ପିଇବା ଦୃଷ୍ଟିରୁ ଭାରତ ବହୁତ ତଳେ ରହିଛି । ଭାରତରେ ସାଧାରଣ ବ୍ୟକ୍ତି ବର୍ଷକରେ ୨ ଲିଟର ବିୟର ପିଇଥାନ୍ତି ।  କେବଳ ଇଣ୍ଡୋନେସିଆ ଭାରତ ତଳେ ଅଛି ।

You Can Read: